1 ЈАНУАРИ/14 ЈАНУАРИ

            1. Обрезание на Господ и Бог и Спасителот наш Исус Христос. Осмиот ден по раѓањето божествениот Младенец бил донесен во храмот и бил обрезан според законот што постоел во Израел уште од времето на Аврама. Во таа прилика Му го дале името Исус како што ‘и благовестил архангел Гаврил на Пресвета Дева. Старозаветното обрезание го претставува новозаветното крштавање. Обрезанието на Господа покажува дека Он врз Себе примил вистинско човечко тело, а не привидно, како што подоцна за Него учеле еретиците. Господ е обрезан и затоа што сакал да го исполни законот што го дал Он преку пророците и праотците. Исполнувајќи го тој законски пропис, Он го заменил со крштавање во Својата Црква. 'Зашто во Исуса Христа ниту обрезанието има некаква сила, ниту необрезанието туку новата твар" (Гал. 6:15), објавува апостолот. (Во црковната служба овој Господов празник нема ни претпразненство ни попразненство.)

            2. Св. Василиј Велики архиепископ Кесариски. Роден е во времето на цар Константин. Уште како некрстен, 15 години учел во Атина: филозофија, реторика, астрономија и сите останати светски науки од тоа време. Соученици му биле Григориј Богослов и Јулијан, кој подоцна станал цар отстапник. На зрели години се крстил во реката Јордан заедно со својот поранешен учител Евул. Бил епископ на Кесарија Кападокиска околу 10 години, а својот земен живот го завршил кога наполнил 50 години од раѓањето. Голем поборник за православието, големо пристаниште на морална чистота и на верска ревност, голем богословски ум, голем творец и столб на Црквата Божја, Василиј потполно заслужено се нарекува Велики. Во црковната служба уште се нарекува и пчела на Христовата црква, која им носи мед на верниците и со осилото ги боде еретиците. Сочувани се многу дела од овој црковен отец и тоа: богословски, апологетски, подвижнички и канонски, како и служба наречена според неговото име. Оваа служба се служи 10 пати во годината и тоа: на 1 јануари, пред Божик, пред Богојавление, во сите недели на Великиот пост, освен на Цветници, на Велики Четврток и на Велика Сабота. Свети Василиј мирно се упокоил на 1 јануари 379 година и се преселил во царството Христово.

БЕСЕДА

за тоа како треба да го избегнуваме злото и да правиме добро

Нека се клони од зло и нека  прави добро (Пс. 33:14).

            Со овие зборови е искажан целиот наш труд со кој треба да се трудиме овде: на земјата и во земјата, т.е. на оваа материјална земја и во ова материјално тело. Што треба да биде нашиот труд? Да стекнеме две навики: една, да го избегнуваме злото, а втора, да правиме добро. За тоа што е добро а што е зло нашата совест ни кажува непотполно и нејасно зашто е помрачена со гревот; науката Христова ни кажува потполно и јасно.

            Што бара нашиот Господ од нас, браќа? Како што се нашите олтари секогаш свртени кон Исток, така бара и нашите души секогаш да бидат свртени кон доброто. Да го оставаме злото зад нас, во сенка, во јама на заборавот, во темнина на минатото а ние, од година во година, од ден на ден да се предаваме на доброто; да мислиме за доброто, да мечтаеме за доброто, да зборуваме за доброто и да правиме добро. Господ бара ѕидари а не урнувачи. Кој ѕида добро, го урива злото. Кој, пак, се свртува да го урне злото брзо заборава да го ѕида доброто и се претвора во злосторник.

            'Отстранувајте се од злото, прилепувајте се кон доброто" (Рим. 12:9), нé поучува апостолот Христов. Мрази го злото, но не мрази го човекот кој прави зло, бидејќи тој е болен. Ако можеш, лекувај го болниот, но не убивај го со твојата омраза. Придржувај се кон доброто  и само кон доброто затоа што тоа е од Бога, и затоа што Бог е ризница на сите добра.

            О Господи, добар и седобар, научи нé да го избегнуваме злото и да правиме добро заради Твојата слава и заради нашето спасение. На Тебе слава и вечна пофалба. Амин.