ФИФА СП (Мундијал)

До првите натпревари на Светското првенство во Јужна Африка преостануваат уште само шест месеци, а денес ќе го дознаeме и распоредот на репрезентациите по групи односно точниот распоред на сите натпревари вклучувајќи го и финалето на 11 јули 2010 година.

Затоа, денеска ви ги претставуваме сите стадиони и градови во кои ќе се одржува првенството, ќе ги изложиме на едно место сите градби, целиот труд, сите потрошени пари и сиот сјај во најбогатата земја на африканскиот континент.


Green point стадион

Новоизградениот стадион Green Point е еден од визуелно најатрактивните стадиони на СП во 2010 година во ЈАР. Сместен е на едно од најбараните земјишта во подрачјето на Кејптаун, само стотина метри од морето од една страна и неколку стотина метри од големите планински масиви од другата страна.

Локацијата на стадионот е идеална кога е во прашање превозот, бидејќи се наоѓа само неколку минути од главната градска сообраќајна мрежа. Капацитетот на стадионот изнесува 70 илјади гледачи, а изградбата би требало да биде финализирана овој месец. На овој стадион е предвидено да се одигра еден од полуфиналните натпревари.


Nelson Mandela Bay стадион

Сместен е на брегот на езерото Норт Енд во Порт Елизабет и е прв стадион наменет за фудбал во цел регион. Има многу интересно конструиран покрив и зашеметувачки поглед на езерото Норт Енд.

Капацитетот на стадионот изнесува 48 илјади гледачи, а доизграден е пред една година. На ’Нелсон Мандела Беј’ ке биде одигран натпреварот за трето место и едно од четвртфиналињата.


Moses Mabhida стадион

Новоизградениот стадион "Мозес Мабхида" во Дурбан е прекрасна архитектонска иновација, а својата инспирација за дизајнот се извлекува од знамето на Јужна Африка. Железниот лак кој поминува над стадионот на едната страна е разделен на две, а додека на другата страна се соединува симболизираќи единство на некогаш разделената нација.

Стадионот, кој сега се вбројува во најсилна светска класа, има капацитет од 70 илјади гледачи, а дизајниран е како повеќенаменски, па така има и амфитеатар со жичара која води до платформа од која се пружа спектакуларен поглед на околината. На овој стадион ќе се игра еден полуфинален натпревар.


Free State стадион

Фри Стејт стадионот, кој се наоѓа во градот Блоемфонтејн, дом е на најжестоките навивачи во цела Јужноафриканска република. Навиваат за Блоемфонтејн Селтик, а се нарекуваат ’Siwelele’ или ’Sotho team’.

Стадионот е изграден во 1953 година, а минатата година е завршена неговата обнова, додека на Купот на Конфедерациите беше неговото свечено крштевање. Сега неговиот капацитет изнесува 45 илјади гледачи.


Ellis Park стадион

Елис Парк стадионот се наоѓа во центарот на Јоханесбург и во него се имаат играно многу интересни натпревари како што е и епското финале на Купот на конфедерациите помеѓу Бразил и САД.

Изграден е во 1928 година како рагби натпревар, но потоа е срушен и обновен во 1982 година. Оваа година завршена е уште една обнова и сега стадионот има капацитет од 62 илјади гледачи, Овој стадион е дом на најпознатиот клуб во ЈАР- Орландо Пиратс.


Royal Bafokeng стадион

Стадионот Ројал Бакофенг, се наоѓа во градот Рустенбург на северот на ЈАР и името го добил по луѓето што живеат во таа област. Интересно е тоа што во 1999 Бакофенг ја доби правната битка со државата, по која му припаѓа 20% од сета платина што се вади од рудниците во регионот.

И стадионот е изграден во 1999 година, а неколку пати досега беше домаќин на репрезентацијата на ЈАР. Од неодамна почна и неговата обнова и финализирањето се очекува во 2010 година. Капацитетот изнесува 42 гледачи.


Стадионот Mbombela

Стадионот Мбобела е еден од новоизградените за СП, а името го доби по локалната општина. Инаку зборот Мбобела е на Сисвати, што е еден од 11 официјални јазици во ЈАР и буквално значи ’многу луѓе заедно во мал простор’. Стадионот со капацитет од 46 илјади, се наоѓа во градот Нелспруит.


Стадионот Loftus Versfeld

Стадионот Лофтус Версфелд се наоѓа во градот Тшване во Преторија и е еден од најстарите во Јужна Африка. Стадионот бил користен за големи манифестации уште од 1903 година, а на почетокот имал капацитет само од две илјади гледачи. Од 1948 поминал низ неколку надградби, а бил користен и за рагби и фудбалски натпревари. Последната обнова на овој стадион е завршена минатата година, а сега стадионот има капацитет од 50 илјади гледачи.

Да додадеме уште дека стадионот Лофтус Версфелд е дом на една од најдобрите рагби екипи во ЈАР, Блу Булс.


Peter Mokaba стадион

Наречен по еден од најпознатите синови на борбата за еманципација во ЈАР против апартхејдот, стадионот Peter Mokaba има големо историско значење во оваа држава. Изграден е во градот Полокване во провинцијата Лимпопо, а дизајнот кој е воглавно од бетонска конструкција, инспириран е по локалната икона - дрвото Баобаб.

Стадионот Питер Мокаба е уште еден во низата новоизградени стадиони, а неговата финализација се очекува на почетокот на 2010г. Капацитетот изнесува 45 илјади гледачи, па заедно со Royal Bafokeng е најмалиот стадион на кој ќе се игра претстојниот Мундијал.


Soccer city стадион

Сокер сити стадионот во Јоханезбург е најголемиот стадион во Јужна Африка и со својот изглед предизвикува воодушевување. Стадионот е ценет во целата држава, затоа што на него се одржани многу значајни натпревари во историјата, а меѓу другото тука е одржан и првиот масовен митинг по пуштањето на Нелсон Мандела од затвор во 1990г.


Изграден е во 1987 година и имал капацитет од 80 илјади, а оваа година е финализирана неговата обнова во која е вложено многу пари. Сега има капацитет од 95 илјади гледачи. Инаку, стадионот е дизајниран по пример на африкански лонец, познат како ’calabash’, а особено е впечатлив ноќе. На овој стадион ќе се отвори СП и ќе се игра финалето.