Внатрешни несогласувања во исламот

	< name="txtBaraj" id="txtBaraj" size="30" maxlength="70" ="text">

Четворица радикали обвинети за состојбите во ИВЗ

Идриз Идризи, Зенун Бериша, Зејнула Фазлиу и Осман Мехмети ја влечат радикалната струја во Исламската заедница, тврдат за А1 високи извори во ИВЗ.

Според нив, овие четворица вработени во ИВЗ стоеле зад инцидентите во последните неколку месеци. Не ги почитувале одлуките на авторитетите во Заедницата, дури им давале директиви како да постапуваат. Сето тоа со закани од вооружени луѓе и познати насилници.

Истите извори тврдат дека четворицата радикали ја најмиле и вооружената група на избеганите затвореници Рамадан Шити и Шукри Алија, обвинети за претепувањето на Реисот Емини во Теолошкиот Факултет во Кондово, но и на побунетите имами неколку недели подоцна во истото село.

Притисоците беа и причината поради која оставки поднесоа Реисот Емини и претседателот на привременото раководство Ружди Љата.

Нашите извори велат дека радикалната струја за нов поглавар на ИВЗ го поддржува Идриз Идризи, службеник во тетовското муфтивство. Идризи секојдневно му вршел притисок на Љата итно да го свика Собранието на ИВЗ и тој да биде избран за Реис.

Четворицата радикали денеска за А1 ги отфрлија овие информации како неточни. Идризи не крие дека се смета за сериозен кандидат за Реис и призна дека инсистира на итно свикување на Собранието на ИВЗ, иако сите 13 муфтивства немаат предложено кандидати.

„Нема никакви радикални струи. Верниците добро го знаат моето име и каков ислам сум проповедал изминативе 6 години“, изјави Идриз Идризи, кандидат за Реис ул Улема на ИВЗ.

Радикалната струја сакала со изборот на свој Реис, полесно да влијае врз изборот на скопски муфтија. Спротивно од она што се договорија привременото раководство и скопските имами - прво да се избере скопски муфтија, потоа поглавар.

Извори на А1 тврдат дека сите превирања се околу тоа кој да дојде до црните фондови што ИВЗ ги добива од земјите од Блискиот Исток.

А1 дознава дека најприфатлив за Реис за раскараните струи е Исмаил Барди, деканот на Теолошкиот Факултет во Кондово. Тој пак, сака да ја повлече кандидатурата.