Хороскоп

Исус во хороскоп бил Близнаци 

 

Група австралиски астрономи тврдат дека Божиќ треба да се слави во јуни, затоа што пресметале дека тогаш се појавила Витлеемската ѕвезда, која според Библијата ја следеле тројцата мудреци за да стигнат до местото на кое е роден Исус Христос.

Ако оваа теорија се покаже како точна, тоа би значело дека Исус се родил во хороскопскиот знак Близнаци. Според истражувачите, Витлеемската ѕвезда е всушност величествено спојување на двете најсветли планети - Јупитер и Венера.

Австралискиот астоном Дејв Риники користел сложен компјутерски софтвер за да ја утврди точната позиција на небеските тела и да направи мапа на ноќното небо над Светата земја пред повеќе од 2000 години.

За време на истражувањето тој открил дека во времето на раѓањето на Исус се случил спектакуларен астрономски настан. Риники смета дека мудреците веројатно го протолкувале како знакот на кој што чекале и тргнале по ѕвездата водилка до родното место на Исус во Витлеем, како што е опишано во Библијата.

Користејќи го Евангелието по Матеј како појдовна референца, Риники утврдил дека спојувањето на планетите кое се појавило во соѕвездието на Лавот се случило точно на 17 јуни две години пред нашата ера. Австралискиот астроном, кој е и уредник на списанието „Скај енд Спејс“, изјави дека денес постои компјутерски софтвер кој може да ни покаже како точно изгледало небото во било кој момент во последните неколку илјади години.