Шоуто на Victoria’s Secret 2015 – хипнотизирачки спектакл

Екстраваганција, сексапил, театралност, сензуалност – 20-тото шоу на Victoria’s Secret спектакуларно ги задоволи огромните очекувања.

Најсексапилната ревија се одржа во Њујорк со учество на 47 долгоноги манекенки кои носеа 75 костими.

Шоуто вклучуваше 6 сегмента. Хипи манијата од 60-тите и шармот на бохо стилот ги диктираа костимите за „Boho Psychedelic“, колоритноста и богатата текстура на крилата на пеперутките го дефинираа „Exotic Butterflies“, женственост и нежност доминираа во„Portrait of an Angel“, американската култура и историја го инспирираа „Pink USA“, деликатноста на мразот и снегулките и спортскиот изглед на скијачите се споија во „Ice Angels“, додека експлозивната и зашеметувачка убавина на огнометите беше прикажана преку „Fireworks“.

Американскиот дизајнер Брајан Етвуд беше задолжен за впечатливите обувки на ангелите.

Најскапоцената креација беше резервирана за Лили Одриџ. Градникот од фантазиите е проценет на 2 милиони долари, а е изработен од повеќе од 6.500 скапоцени камења како дијаманти, сини топази и жолти сафири и 18-каратно злато.

Ангелот Марта Хант носеше специјален костим со илјадници сваровски кристали и крилја кои светеа како огномет. Нејзиниот корсет беше декориран со неверојатни 90.000 златни, црвени, зелени и сини кристали, додека на нејзините крилја со LED сијалички беа поставени дополнителни 20.000 кристали.

Покрај искусните ангели Адријана Лима, Алесандра Амбросио, Кендис Сванапул, Лили Олдриџ и Беати Принсло, на ревијата дефилираа и 10-те нови ангели Тејлор Хил, Стела Максвел, Роми Страјд, Сара Сампајо, Моника Џак Јагачак, Џасмин Тукс, Лаис Рибеиро, Марта Хант, Екатерина Григориева и Елза Хоск.

Ним им се приклучија и Џиџи Хадид, Кендал Џенер, Даниела Брага, Изабел Голарт, Шанина Шајк, Џоан Смолс, Лили Доналдсон, Грејси Карвало, Синди Бруна, Девон Виндзор, Жаклин Јаблонски, Жозефина Скривер и многу други.