Рецепт на денот: Несквик карамела торта

Можеби нема да биде готова додека трепнете, но ќе бидете благодарни за секоја потрошена минута.

Потребни состојки:

За кори

• 7 белки
• 125g шеќер
• 2 кесички ванилин шеќер
• 180g печени лешници
• 2 лажици брашно
• 2 лажици какао
• 1 лажица Несквик
• Прашок за печиво
• 100ml масло

За фил

• 1l млеко
• 7 жолчки
• 200g карамели
• 160g густин
• 150g шеќер + 1 ванилин шеќер
• 125g маргарин
• 200ml слатка павлака

За потопување

• Млеко и Несквик

За глазура

• 200g Милка noissete
• 200ml слатка павлака
• 2-3 лажици Несквик

Подготовка:

Белките изматете ги со малку сол, па постепено додавајте ги шеќерите додека не се создаде цврста пена. Истурете го брашното, прашокот за печиво, Несквикот и какаото, па рачно измешајте.

На крајот додајте ги исечканите лешници и маслото.

Печете 4 кори на 180 степени околу 15 минути. Во меѓувреме подгответе го филот.

Ставете 900ml млеко на оган и додадете ги карамелите. Мешајте додека целосно не се стопат. Останатите 100ml млеко изматете го со жолчките, шеќерот и густинот, па додадете ја мешавината во млекото со карамели.

Откако филот малку ќе се излади, додадете го маргаринот и матете со миксер. Слатката павлака изматете ја во посебен сад додека не добиете густ снег, па потоа промешајте ја во оладениот фил.

За да ја подготвите глазурата потребно е да ја оставите павлаката да зоврие, па тогаш да го додадете Несквикот и коцките чоколадо. Оставете целосно да се олади.

Секоја кора натопете ја со мешавината од млеко и Несквик, па прелијте го филот. Преку последниот слој од фил ставете ја оладената глазура.

Пресечете и уживајте!

Десерт на денот: Киндер пингви чоколадни коцки

Домашни Киндер пингви коцки со кои ќе ги израдувате најмладите, а и вие ќе бидете воодушевени со денови.

Откако еднаш ќе го пробате, големи се шансите овој рецепт да ги надмине купечките тортици.

Потребни состојки:

За бисквит

• 6 лажици брашно
• 6 лажици шеќер
• 6 јајца (одвоено белки и жолчки)
• 6 лажици жешка вода
• 1 прашок за печиво
• 3 лажици какао прав

За крем

• 3 крем сирења (од 70g)
• 5 лажици шеќер во прав
• ½ литар слатка павлака за шлаг
• 1 желатин во прав

За чоколаден крем

• 100g чоколадо за готвење
• 50g путер
• 1 лажица масло
• 50ml вода

За глазура

• 100g за готвење
• 50g путер
• 1 лажица какао прав

Подготовка:

Жолчките изматете ги со шеќерот и врелата вода додека смесата не стане густа и кремаста. Измешајте го какаото, прашокот за печиво и брашното во посебен сад, а потоа измешајте ги сувите состојки со жолчките. Додавајте лажица по лажица и мешајте со миксер.

На крај изматете ги белките додека не добиете снег, со неколку зрна сол. Додадете го во смесата од жолчки и брашно.

Печете во калап со мрсна хартија на 175 степени околу 40 минути. Изладениот бисквит пресечете го на 2 еднакви дела.

Во меѓувреме направете го кремот.

Желатинот прелијте го со 4 лажици вода и оставете го да нарасне. Измешајте го крем сирењето со шеќер и додајте слатка павлака. Желатинот стоплете го на ниска температура, па потоа додавајте го во смесата од крем сирење.

За чоколадниот крем потребно е чоколадото ситно да го исечкате, а во посебен сад да го загреете путерот со маслото и водата. Кога течноста ќе се соедини, тргнете од оган и додадете го чоколадото. Мешајте додека не се растопи.

Глазурата ќе ја подготвите така што на тивок оган ќе го загреете какаото со путерот додека не добиете еднолична смеса. На крај додадете го чоколадото.

Глазурата правете ја на крај, затоа што треба да е топла кога ќе ја прелиете.

Редење на слоеви:

Првиот дел од испечената кора ставете ја во калапот во кој ја печевте и на неа намачкајте половина од кремот. На кремот ставете го чоколадниот крем и оставете да отстои во фрижидер 15 минути.

Откако ќе се олади, ставете ја и другата половина бел крем, па покријте со втората кора.

Прелијте со топла глазура и оставете го колачот во фрижидер неколку часа.

Потоа сечете коцки и уживајте! Ќе бидете благодарни за секоја потрошена минута....

Пробајте: Сочен колач кој брзо се подготвува, а уште побрзо се јаде

Ако не сте многу по кремастите торти и повеќе ги сакате сочните колачи со шербет, тогаш овој колач ќе сакате да го изедете толку брзо колку што ќе го подготвувате.

Одличен е и за со кафе, но и за намалување на апетитот пред спиење. Наместо обилна вечера, едно парче од овој колач ќе ве засити.

Потребни ви се само неколку состојки, кои најверојатно секогаш ги имате дома.

Потребни состојки:

За тестото

• 4 јајца
• 200 g шеќер
• 200 g путер
• 200 g гриз
• 2 супени лажици брашно
• 1 кисела павлака (250 ml)
• Пола кесичка прашок за печиво

За шербетот

• 500 g шеќер
• 750 ml вода
• 1 ванилин шеќер

Подготовка:

Во еден сад изматете ги јајцата и шеќерот, потоа додадете ги и останатите состојки за тестото и изматете сè со миксер.

Печете во загреана рерна на 180-200 степени, додека колачот не биде испечен, а тоа може да го проверите со чепкалка која не треба да има залепени остатоци од тесто, кога ќе боцнете и ќе ја извадите.

На страна подгответе го шербетот, така што ќе ја зовриете водата со обичниот и ванилиниот шеќер додека не добие златна боја и густина малку поретка од мед. Со шербетот прелијте го испечениот колач и вратете го во рерна уште 5 минути.

На крај исечете го на коцки и послужете го за да уживате во неговиот сочен вкус кој ќе ви се топи во устата.

Вкусна бајадера торта која се топи во уста

Нема кој не ја обожава бонбониерата со бајадера, па уште ако може да уживате во големо вкусно и кремасто парче торта, тоа би било вистинско задоволство. Сега наместо да купувате мали бонбони може да направите торта од која секој залак ќе ви се топи во уста.

Потребно ви е тесто и 3 филови за да го постигнете ефектот, но вкусот вреди и за трудот и за времето.

Потребни состојки:

Тесто:

• 6 јајца
• 6 лажици шеќер
• 6 лажици мелени ореви
• 5 лажици брашно
• Пола кесичка прашок за печиво
• 3 dl Фанта

Прв фил:

• 300 g мелена плазма
• 100 g чоколадо
• 2 dl Фанта
• ½ маргарин
• 50 g шеќер во прав

Втор фил:

• 200 g мелени ореви
• 1 dl млеко
• ½ маргарин
• 50 g шеќер во прав

Трет фил:

• 750 ml млеко
• 3 пудинзи
• ½ маргарин
• 50 g шеќер во прав
• 300 g шлаг

Подготовка:

Со миксер изматете ги 6-те белки и 6-те лажици шеќер, па додавајте една по една жолчка. Со лажица мешајте и додајте 5 лажици брашно, пола печиво, 6 лажици мелени ореви.

Печете го тестото на 180 степени околу 20 минути. Откако ќе се испече и излади потопете го со 3 dl сок Фанта.

За првиот фил изматете пола маргарин со 50 g шеќер во прав, па додајте 100 g стопено чоколадо и мешајте додека не се соедини, па додајте 300 g измелена плазма и 2 dl Фанта.

За вториот фил 200 g мелени ореви прелијте ги со 1 dl топло млеко, а во изладеното додајте го изматениот маргарин со прав шеќер.

За третиот фил ставете 500 ml млеко да зоврие, па сварете 3 разматени пудинзи во 250 ml. Изладениот пудинг мешајте го одвреме-навреме за да не ви фати кора на врвот. Изладениот пудинг соединете го со пола маргарин и 50 g шеќер во прав.

Преку натопената кора се става прво филот од мелена плазма, па половина од третиот фил, па филот од ореви и останатиот дел од пудингот, а на крај преку сè намачкајте со шлаг или стопено чоколадо.