ГРЧКА ПРОПАГАНДА, притисоци, уцени, инциденти...

Атина објавува „доверливи документи“ за Македонците

Дора Бакојани презентираше книга „Македонското прашање и Бугарија - Доверливи документи 1950-1967“

Шефицата на грчката дипломатија Дора Бакојани синоќа во Атина презентираше книга под наслов „Македонското прашање и Бугарија - Доверливи документи 1950-1967“.

Публикацијата заедно е подготвена од грчкото „Општество за македонски студии“ и бугарскиот Државен архив.

Книгата беше презентирана во Воениот музеј во Атина.

Паралелно со најавената презентација на книгата, партијата на македонското малцинство во Грција „Виножито“ го реобјави тајниот документ на грчката тајна служба од 1982 година кој содржи методи на Грција свесно да го уништи македонскиот идентитет.

Согласно планот објавен на 16 февруари 1982 година од шефот на тајната служба Димитрис Капеларис, Атина формирала таен тим наречен „Заговор против Македонија“ кој бил испратен во Егејска Македонија и инфилтриран во сите јавни служби.

Планот е донесен во време кога многу Македонци во Грција биле следени, затворани, тепани и отпуштани од работа затоа што изјавувале дека се Македонци, а притоа без да бидат свесни дека се шпионирани

„Активностите на скопјаните за автономија на Македонија може ефикасно да бидат спречени главно преку искоренување на нивниот идиом (македонски јазик) во регионите блиску до границата. Овој елемент самиот по себе би доволен да се исклучи било какво размислување за репатријација на политичките бегалци кои сега живеат во Југославија и биле задоени со ’македонската кауза‘, ’македонскиот јазик и култура‘, како и активности за отцепување на грчките територии во периодот 1946 -1949 година“, пишува во строго доверливиот документ.

Во документот се наведува формирање државна институција со главна задача „конспирација против Македонија“, контролирана од Владата, и во тесна соработка со безбедносните и сите јавни служби.

Инструкции за вработените во јавните служби, и особено во образовните институции, да го игнорираат идиомот македонски, формирање културна асоцијација, и нејзино економско помагање за организирање настани и објавување книги, весници и списанија кои потоа ќе бидат дистрибуирани во дијаспората. Ова требало да ги поттикнува кон националната самосвест и да ги заштитува од антиелинистичка пропаганда од организациите на „славо македонците“.

Меѓу методите било и попречување на грчки студенти кои сакале да студираат во Скопје, преку непризнавање на дипломите и одложување на воениот рок, како и регрутирање во армијата и полицијата на лица од регионот на Лерин и нивно задолжително испраќање на служба во други региони во Грција. (Макфакс)