Косово независно од 17 февруари

Иако според очекувањата властите на Косово овој викенд ќе прогласат независност, се помалку е веројатно дека Европа ќе даде единствена поддршка, оценуваат високи функционери и дипломати во регионот, а пренесува дневникот „Лос Анџелес тајмс“ (ЛАТ).

Според либералниот дневен весник од западниот брег на САД, постои страв во неколку земји дека прогласувањето на независноста на Косово ќе отвори прашање за способноста со покраината, која повеќето е населена со етнички Албанци, да управува корупциски разорена локална власт.

ЛАТ забележува дека САД, кои се најжестокиот заговорник за независност на Косово, сметаат на поддршка на ЕУ за да направат претстава за општа поддршка за овој чекор, иако неколку држави се воздржани, посебно оние кои и сами имаат „непокорни етнички малцинства“. Ова укажува дека земјите кои се оградуваат од поддршка за независност на Косово, нема, или барем не веднаш да го признаат отцепувањето, констатира американскиот дневник.

ЛАТ наведува дека меѓу 27 држави членки на ЕУ, проблеми со етничките малцинства имаат Шпанија, Грција, Романија, Кипар, Белгија, Бугарија и Словачка и дека тие се држат резервирано во поглед на едностраното прогласување на независноста на Косово.

„Подигнете рака ако немате сепаратисти во својата куќа“, пишува италијанскиот дневник „Коријере дела Сера“ додавајќи дека „домино ефектот внесува страв меѓу многу централни влади“.

Весникот наведува и тоа дека европските лидери се разочарани од неуспехот на Косово за последните девет години да изгради државни институции, да ја одржува економијата и да го запре зголемениот криминал. „Многумина косовски лидери се поранешни герилци со мали искуства во управување на држава, додека истовремено две третини на работно способното население е невработено, народот се дави во сиромаштија и покрај пристигнатата парична помош како од Европа така и од многу земји, која се мери со милијарди долари“, наведе ЛАТ.

„Ова за Европа не е добитна ситуација“, оцени за ЛАТ Ведран Ѕиниќ од Центарот за европска стратешка интеграција со седиште во Виена. Според Ѕиниќ, „ЕУ всушност ќе стане нов заштитник и ќе ги замени сегашните Обединети нации на Косово и ќе се соочи со проблеми на лоша економска ситуација, фрустрации и немање иднина“, заклучи ЛАТ.