F1 Вести

Батон подготвен за домашна победа

Џенсон Батон вели дека е пресреќен што се враќа на својата домашна гран при трка како лидер во генерален пласман. Откако победи на шест од првите седум трки оваа сезона, со што го израмни рекордот на Џим Кларк и на Михаел Шумахер, британската публика ќе има шанса да има домашен победник втора година по ред во возачот на Браун ГП.

Кога пристигна на Силверстоун во 2008, Џенсон Батон беше само 16. во генерален пласман и 45 поени зад тогашниот лидер во генерален пласман Фелипе Маса. Една година подоцна, Батон влегува на патеката во Нортхемптоншајр на првото место со 26 поени предност пред колегата и најблизок конк*рент во шампионатот, Рубенс Баричело.

"Британското ГП секогаш е неверојатен викенд и едвај чекам да се тркам во Силверстоун пред домашните фанови во недела. Да се води во генерален пласман пред домашната трка е нешто што досега го немам искусено и затоа имам насмевка кога размислувам за тоа", вели Батон.

Негов најдобар пласман во Британија е 4. место за БАР во 2004 година, но сега има 61 поен од можните 65 и не може да биде претекнат најмалку до Унгарското ГП на 26 јули, иако од второто до четвртото место разликата е само 7.5 поени. Трката ќе биде преместена на Донингтон Парк во 2010, со што ќе се прекине серијата од 23 години оддржување на Силверстоун, поранешниот аеродром на кој се оддржа првата ГП трка во 1950.

"Силверстоун е една од класичните тркачки патеки како Сузука и Спа и за мене една од најдобрите патеки. Секој возач кој барем еднаш возел тука ја сака патеката, бидејќи е брза и бидејќи можеш да одиш до лимит. Навистина е чудно кога ќе размислиш дека ова е последната трка во Силверстоун и навистина не можам да замислам дека нема има Британско ГП на оваа патека", додава Батон.

БРАУН ГП СО НОВИ КРИЛА ВО БРИТАНИЈА

Лидерите во генерален пласман, Браун ГП ќе имаат сосема ново предно и задно крило на Британското ГП. Откако ги завршија подготовките на трката во Истанбул, тимот од Брекли ќе вози првпат со новите компоненти на петочниот тренинг. Со 96 поени и огромна предност од 39.5 поени пред второпласираните Ред Бул Рејсинг, најверојатно тимот ќе ја скрши бариерата од 100 поени.

"Бевме посебно добри во Турција, и покажавме дека на патека како Истанбул Парк можеме да бидеме конк*рентни. Направивме доволно прогрес во последните неколку недели и имаме пред нас серија подобрувања, вклучувајќи ги новите предни и задни крила за овој викенд. Во недела ќе имаме посебно собирање во нашата фабрика за сите кои работат за нашиот тим. Силверстоун е одлично место", вели Браун.

Британскиот гениј вели дека неговиот пулен Батон за првпат има болид со кој може да го потврди својот талент.

"Џенсон вози посебно добро оваа година. Лани видов малку од неговите квалитети при тешки услови, но не ја видов вистинската работа. Луѓето во тимот ми кажуваа дека ова не е Батон во најдобрите денови, а сега знам дека е способен за многу поголеми работи. Но, последните две години ја удираше главата од ѕид поради лошиот болид", додава Браун.

Рос Браун уште признава дека неговиот тим веќе почнал со работа на дизајнот на нивниот втор формула 1 болид и покрај тоа што нема сигурно место поради несогласувањата со ФИА.

"Морате да планирате за формула 1, бидејќи немате за што друго да планирате. Не смееме да дозволиме оваа политичка битка да биде пречка за нашите инжинерски и тркачки планови. Работиме на новиот болид веќе цел месец и една третина од времето во воздушниот тунел трошиме на новиот болид", признава Браун.


ФИА не отстапува - ќе има ограничен буџет за 2010

ФИА избра да продолжи со плановите за ограничен буџет од 45 милиони евра следната сезона. И покрај повеќето преговори помеѓу тимовите и ФИА во последните месеци, ФИА реши по состанокот со членовите на Асоцијацијата на Ф1 тимови (ФОТА) да не ја менува шемата околу новите правила . Со четири сегашни тимови (БМВ, Браун, Мекларен и Тојота) се уште под условна апликација за влез во 2010, останува да се види реакцијата на ФОТА.

"По состанокот со финансиските експерти на ФОТА, решивме да останеме на ограничениот буџет, бидејќи тимовите не беа подготвени да разговараат за тоа правило. Како резултат на тоа, не можевме да ги исполниме нашите цели без ограничен буџет. Во недостаток на вистински дијалог, стана јасно дека тимовите нема да можат да се ограничат на трошење без наше системско поставување", се вели во соопштението на ФИА.

Во исто време стјуардот на ФИА, Алан Донели се најде под притисок и дури 8 тима потпишале петиција за негово отстранување од позицијата поради конфликт на интереси. Донели го превзеде местото на Тони Скот Ендруз на стартот на сезоната 2008, но сега проблемот е неговото мешање во Ф1 политиката.

"Беше јасно дека на Турското ГП се оддржуваа неколку разговори помеѓу Донели и неколку претставници на тимовите со јасна цел - да се предизвика раздор во Асоцијацијата на Ф1 тимови (ФОТА)", оценува британскиот Гвардијан. Од ФИА го отфрлија ова барање.


Вебер ужива во битката со Фетел

Возачот на Ред Бул Рејсинг, Марк Вебер вели дека ужива во битката со својот тимски колега Себастијан Фетел, и дека најголемо задоволство му причинува неговата еднаквост со младиот Германец. Фетел оваа година дојде во "големиот" тим на Ред Бул откако лани дебитираше цела сезона со Скудерија Торо Росо.

"Уживам во битката со Себастијан цела година. Првпат да имам некој толку брз клупски колега и секогаш сум велел дека мораш да се мериш со најдобрите. Фетел завршува одлична работа, но има само 1.5 поен помеѓу нас двајца. Ќе биде еднакво до крајот на сезоната. Луѓето ме прашуваат дали сум под притисок, но мислам дека Себастијан вози под поголем притисок. Во очите на фановите, јас не треба да го правам тоа што го правам", вели Вебер.

Сепак, австралискиот ветеран смета дека на трката во Британија овој викенд неговиот тим повторно ќе биде послаб од Браун ГП.

"Ние сме единствениот тим кој го совладал Браун оваа година и тоа на дожд во Кина. Очекувам да бидеме силни во Силверстоун, но не знам дали тоа ќе биде доволно", додава Вебер.

Ф1 ФЛЕШ

Официјално лице од познатата трка на издржливост 24 Часа Ле Ман ги покани формула 1 тимовите на следната трка во Франција. Претседателот на Ферари, Лука Ди Монтеѕемоло го означи официјалниот старт на трката минатиот викенд и јавно изјави дека Ле Ман е алтернатива за италијанскиот тим. "Колку повеќе дојдат, тоаа подобро. Ако сакаат да дадат предлози, тука ќе ги слушнеме", вели Реми Бруар, генералниот менаџер на организаторот на трката, Аутомобил Клуб де Л'Ест (АЦО), кој исто така ја води и европската Ле Ман серија.

Поранешниот трикратен светски шампион, Австриецот Ники Лауда остро ја нападна политичката криза во формула 1 која се случила поради "егоцентричните менаџери" кои се вклучени во "лични пресметки". "Апсурдно е што сите се согласуваат за проблемот за намалување на трошоците, но најголемата шега е тоа што поради ваквото однесување може навистина да ја снема формула 1. Сите се загрижени повеќе за своите лични амбиции. Најчудни се Ферари, единствениот тим со договор со ФИА до 2012, кои предходно добија 100 милиони евра повеќе од конк*ренцијата", вели Лауда, кој две од трите титули ги освои токму со Ферари.

Фелипе Маса верува дека можеби сега е вистинското време за почеток на паралелен шампионат, бидејќи на прв поглед има единство помеѓу осумте членови на Асоцијацијата на Ф1 тимови (ФОТА). Возачот на Ферари признава дека ситуацијата го загрижува, прво околу неговата иднина, но и околу иднината на спортот. "Ситуацијата изгледа лошо во моментов, но ако се дојде до договор Ф1 има блескава иднина. Ако, не, тогаш треба да се разгледа која е најдобрата опција, бидејќи тимовите се обединети", вели Маса.

Тимот на Вилијамс се уште нема определено датум за деби на нивната уникантна КЕРС технологија. Тимот од Гроув најавуваше дека по шест-седум трки ќе се монтира новиот систем за поврат на кинетичката енергија, но плановите се променија. "Се уште работиме на КЕРС системот за ФВ31 болидот. Ние купивме компанија која го развиваше системот, и во последните 18 месеци дадовме доста ресурси за развој на технологијата", вели Австралиецот Сем Мајкл, техничкиот директор на тимот.

Лидерот во генерален пласман, Џенсон Батон минатата недела не се појави како што се најавуваше на Нокиа Виндзор Триатлонот. Возачот на Браун, кој редовно учествува во трки на издржливост се повлекол бидејќи не сфатил дека доаѓа само една недела пред Британското ГП. Тој се уште планира да настапи на триатлонот во Лондон во август, кој се поклопува со паузата во формула 1 шампионатот.