Возачот на Рено, Нелсон Пике Јуниор за холандскиот Формула 1 Рејс Репорт магазин изјави дека се навикнал на постојаните критики од шефот на тимот Флавио Бриаторе. "Тој смета дека со отворени критики ќе постави притисок на возачите да бидат подобри", вели Бразилецот. Претходно оваа година Бриаторе изјави дека Пике не би освоил титула со ниту еден болид, а потоа се зачуди дали неговиот возач мисли дека "колку повеќе се врти, толку повеќе поени ќе освои". "Такви работи морам да игнорирам. Не смеам да бидам загрижен", вели Пике.

ФИА мора да ги слуша големите тимови

ФИА мора да размисли добро околу идните правила во формула 1, кои мораат да се поклопуваат со желбите на постоечките тимови, вели поранешниот светски шампион Фернандо Алонсо. Зборувајќи на промоција на еден од неговите спонзори, Шпанецот вели дека ја сфаќа позицијата на својот тим и на преостанатите кои веќе се заканија дека ќе си заминат од спортот доколку се воведе ограничување на буџетот.

Ферари, Ред Бул и Тојота јасно се заканија дека ќе си заминат од формула 1, и Алонсо вели дека тоа мора да се сфати сериозно.

"Големите тимови го направија спортот спектакуларен. Поради таа причина не е исправно да се остават тимовите на една страна и да се обидеш во исто време да донесеш три нови тимови", вели 27-годишниот Алонсо за Диарио Ас.

По откажувањето на Хонда на стартот на сезоната, Макс Мозли предложи да има ограничување на буџетот за следната година и во исто време го зголеми бројот на можни тимови од 12 на 13.

"Во Премиер-лигата би било незамисливо да има слободни места, така што навистина нешто не е во ред со формула 1", изјави Мозли.

Алонсо, пак стравува дека постоечките тимови сакаат да се заменат со помали тимоив.

"Не се работи за тоа дека големите тимови не ги сакаат новите тимови, но не можеш да направиш се да привлечеш нови тимови, а потоа да изгубиш седум тимови кои ја изградија формула 1", вели Алонсо.

Ферари одбиен на суд, најверојатно се откажува од F1!



Судот во Франција, ја одби жалбата на италијанскиот F1 тим како неоснована и со тоа само го подгреа излегувањето на Ферари од спортот. Тимот таму ја тужеше FIA за двојните правила во новата сезона.

Сега, после губењето на суд, најверојатно ќе биде тешко и Макс Мозли да попушти околу правилата и покрај големиот притисок од тимовите, возачите и Берни Еклстоун, на кој се помалку му се допаѓа законот.

После сите овие случувања, Ферари изјави дека воопшто нема да размислува за напуштање на првенството, нормално доколку биде донесен спорниот закон. Уште пет тима се закануваат со напуштање (Тојота, Рено, Ред Бул/Торо Росо и БМВ), но истото го изјавуваат и возачите, на кои нема да им се допаѓа таквото првенство со мали тимови.

Сето ова може да заврши со два епилога – првенство без најважните тимови и нов закон или првенство со големите тимови без ограничувања наметнати од FIA.

Најпознатата F1 трка не е толку гламурозна оваа година


Индискиот магнат Виџај Малја не дозволува глобалната економска криза да влијае на неговиот стил, иако повеќето од негови колеги во Ф1 ќе бидат поскромни на Монако ГП трката овој викенд. Магнатот кој работи со авионски бизнис е сопственик на Форс Индија тимот и неговата 95-метарска јахта "Индиска Императорка" веќе е во пристаништето на Медитеранот и се подготвуваат за забава.

"Мислам дека гламурот и спортот одат рака-под-рака и тоа најдобро се гледа во Монако. Монте Карло е трка што е толку позната, така што сите ја знаат и сакаат да ја посетат. Ова не е важно само за тимот туку и за спонзорите. Повторно ќе бидеме домаќини на две забави бидејќи и во економска криза треба да се работи на брендот. Времињата на неограничени буџети заминаа, но мислам дека нема да има проблем", вели Малја, кој самиот се нарекува "Крал на добрата забава" и кој "страдаше" во економската криза - Форбс го постави на листата на 355 поранешни милијардери, и сега само милионери.

Принцот на Монако, Алберт, заедно со друштво на богати и познати ќе се појават на ексклузивна добротворна аукција и модно шоу в петок во знак на почит на фондацијата за Сида на Елтон Џон.

Другите, сепак, не сакаат да го покажуваат своето богатство во време на рецесија. Повеќето од банкарите се заминати, додека шефовите на тимовите и големите производители кои доминираат во спортот не сакаат да се покажуваат додека нивните акционери и вработените страдаат.

"Мислам дека насекаде луѓето мислат дека ова е погрешно време за трошење пари. Таква е ситуацијата. Луѓето кои имаат пари, кои можат да трошат како и порано, не трошат... Тоа е главниот проблем", вели Берни Еклстоун, кој признава дека ова ќе биде поинаква година во Монако.



СПОНЗОРИТЕ НЕ ВЛОЖУВААТ КАКО ПОРАНО

Кредит Свис си заминаа од БМВ Заубер, додека ИНГ на крајот на годината си заминуваат од тимот на Рено. Спонзорите на Вилијамс, Ројал Бенк оф Скотланд (РБС) станаа државна британска компанија и веќе нема буџет за трошење во Монако. Пензионираниот трикратен светски шампион и "глобален амбасадор" на РБС, Џеки Стјуарт откри дека неговиот престој во хотелот во Монако лани чинел 53.000 евра. Шкотланѓанецот нема да биде во Монако првпат од 1960-тите, иако смета дека Монако мора да биде извадено од контекст на кризата.

"Има чувство на неудобност, шефовите мислат дека нивните акционери ќе го сфатат тоа негативно место позитивно. Монако е напорна работа за сите таму поради причина. РБС направија одлука дека оваа година нема да биде пристојно да се расфрлаат пари таму. Според мене, требаше да се оди таму бидејќи мораш да продолжиш со бизнисот. Вака пропуштаат шанса", вели Стјуарт.

Пристигнувањето на трките во Сингапур минатата сезона и Абу Даби оваа година им дадоа шанса на Ф1 спонзорите шанса за две нови гламурозни трки.

"Во нашиот случај знам дека ќе имаме помалку гости во Монако. Сега ќе имаме повеќе гостиво Абу Даби", признава претседателот на Тојота, Џон Хаует.

Швајцарската компанија за производство на дијаманти, Штајнмец повторно ќе имаат дијаманти во кацигите на возачите на Мекларен, нивната импресивна јахта с$ уште е во Монако, но на неа нема многу гости.

"Очигледно работите се сменија од 2008 во 2009. Размислувавме за тоа што треба да направиме и затоа ќе потрошиме помалку пари", вели Лиор Левин од Штајнмец.

Стјуарт, кој победи во Монако во 1966, 1971 и 1973, вели дека нема опасност кнежевството да го загуби својот шарм.

"Монако е исто толку силно и гламурозно како секогаш. Ова е отворање на сезоната на француската ривиера и сите доаѓаат, дали од скијачките центри, од Латинска Америка или од Азија. Ако почне да се зборува дека не треба да одиме таму бидејќи ќе пратиме погрешна порака, тоа е навистина лошо", додава Стјуарт.



Роси повторно поврзуван со Ферари!

Валентино Роси повторно е поврзуван со трансфер во Ферари откако италијанскиот тим се закани дека ќе формира нова серија во која ќе можат да возат со три болиди. Италијанската Мото ГП ѕвезда претходно беше најавуван како големо име во спортот, но реши да остане до Јамаха и изјавуваше дека формула 1 за него е завршена приказна, но сега вели дека е можен трансфер. Роси тестираше неколкупати со Ферари од 2004 и беше блиску до трансфер во 2006.

"Изгледа тешко бидејќи имам договор со Јамаха, но ако направат серија со три болиди тогаш и тоа е можно. Денес би кажал дека тоа е неверојатна хипотеза бидејќи имам договор со Јамаха. Имам добри односи со Ферари и сега ќе почекам да видам што ќе се случи. Можеби Макс Мозли ќе попушти и тие ќе се вратат во формула 1. Секако дека с$ уште ми е сон да возам Ферари, но следната година тоа ќе биде невозможно", вели 30-годишниот Италијанец за Газета Дело Спорт.



БМВ и Браун тивки за 2010

Од сегашните формула 1 тимови само 2-3 може да се пријават за учество во Светскиот шампионат 2010 пред крајниот рок на ФИА на 29 мај. Официјалното пријавување може да почне денес, но Ферари, Рено, Тојота и двата тима на Ред Бул објавија дека нема да се пријават поради контроверзните правила за ограничување на буџетот. Од другите 5 тимови, Мекларен Мерцедес, кои неодамна избегнаа голема казна од ФИА, не кажуваат што ќе прават, додека БМВ Заубер признаа дека решението со буџетот може да ги натера членовите на бордот на БМВ да се предомислат за учеството во спортот.

"Ќе разговараме тогаш, а не сега. Мораме да бидеме позитивни дека може да се најде решение", вели Марио Тајзен од БМВ.

Се смета дека Вилијамс, Форс Индија и Браун, трите независни тимови ќе застанат зад идејата на ФИА, но шефот на Браун, Рос Браун не сакаше да го потврди тоа.

"Не сакам да коментирам бидејќи нон-стоп се разговара. Како тим ние го поддржуваме ограничениот буџет, но не сакаме такво буџет да ги истера тимовите од Ф1", вели Британецот.



Розберг повторно најбрз на тестирањето

Нико Розберг во Вилијамс повторно постави најбрз круг на второто тестирање на Монако ГП, додека Рубенс Баричело во Браун беше најбрз на првиот тест. Светскиот шампиуон Луис Хамилтон покажа добра форма со Мекларен поставувајќи топ-три пласман на двете сесии. Баричело беше исто така трет во втората сесија пред лидерот во генерален пласман и негов колега Џенсон Батон. Себастијан Фетел во Ред Бул и Роберт Кубица во БМВ Заубер имаа проблеми со моторот во првата сесија.



Ф1 ФЛЕШ

Стефано Доменикали одби да ги демантира постојаните шпекулации дека Фернандо Алонсо може да дојде во тимот на Ферари. Претходно оваа недела, на промотивна кампања на новиот спонзор на Ферари од 2010, шпанската банка Сантандер, Алонсо изјави дека е "престиж" да се вози во Ферари. "Што мислам за коментарите? Ми се допаѓаат, ми се допаѓаат. Тој е 'брависимо' возач. Ќе видиме!", изјави Доменикали за Диарио Ас.



Заканите на големите тимови за напуштање на формула 1 можеби не се сфаќаат целосно сериозно, но некои од возачите предупредија дека формула 1 може да "исчезне". "Ферари ќе најдат што да прават со мене бидејќи имам договор", вели возачот на Ферари Кими Раиконен, застанувајќи зад одлуката на својот тим. Марк Вебер од Ред Бул вели дека е загрижен и дека во битката има луѓе кои имаат проблем со своето его. "Тешко е да се биде позитивен кога толку често ги переме нашите алишта во јавност", вели Вебер.



По четири победи во првите пет трки од сезоната, лидерот во генерален пласман Џенсон Батон вели дека успехот го направил опсесивен и "досадно копиле". "Оваа сезона е навистина чудна бидејќи откако победив на трките, уживав во неделите, но потоа во понеделниците повторно мислев на следните трки. Сега мислам само на тркањето. Претходно кога не одеше добро се забавував, мислев на други работи, а сега станав досадно копиле. Мојата девојка ќе ви го потврди ова", вели 29-годишниот Батон, кој има 14 поени водство пред својот колега Рубенс Баричело.



Мекларен Аутомотив, одделот на Мекларен Групацијата во кој е вклучен и формула 1 тимот, аплицираше за дозвола за градење на нова фабрика покрај нивниот Технолошки Центар во Вокинг во која би се граделе 20 улични автомобили дневно. Мекларен Продакшн Центарот би вработувал 800 луѓе и е предводен од Рон Денис, поранешниот шеф на тимот. "Откако го презентиравме спортскиот автомобил на Мекларен во 1992 година, мој сон беше да имаме ваква компанија", вели Денис.

ОД ВИЛИЈАМС ПРВИ ПОТКЛЕКНАА



Вилијамс е првиот од сегашните Ф1 тимови со пријава за наредната Ф1 сезона, и покрај моменталната неизвесност околу правилата за идната година. Само 24 часа откако ФОТА тврдеше дека сите нејзини членови се обединети во своите напори како би добиле промена на правилата, Вилијамс одлучи да поднесе пријава за следната године.

CEO на Вилијамс, Adam Parr за Ројтерс изјавил дека оваа одлука на неговит тим не значи дека е нарушено единството на ФОТА.

"Единството на ФОТА е од најголема важност за Вилијамс. Знаете дека се придруживме кон другите членови на ФОТА во писменото обраќање кон ФИА, со барање да продолжат напорите да се пронајде компромис за правилата за 2010. "

Тимови писмено му се обратија на претседателот на ФИА Макс Мозли велејќи дека ќе се натпреваруваат до 2012, и ќе потпишат нов Конкорд договор, доколку ФИА ги измени правилата за идната година.

"Вилијамс има обврзувачки договор со FOM (Ecclestone's Formula One Management) и со ФИА да учествува во светските првенства 2008-2010. Ние бевме исплатени во целост за нашето учество во Ф1 и чуствуваме дека морално и правно сме обврзани да учествуваме во Формула 1 и во иднина како што го правевме тоа во последниве 30 години.

"Ние тоа им го должиме на нашите вработени, нашите спонзори и секако фанови, сите кои се погодени од изјавите дека тимовите можеби нема да се пријават за следната сезона на Ф1. Продолжуваме да работиме во ФОТА и со ФИА и ФОМ да најдеме заеднички прифатлив компромис, но никој не треба се сомнева во нашата лојалност кон Ф1 ФИА светското првенство. "

Останатите членови на ФОТА се очекува да се состанат во текот на неделава да одлучат што ќе прават со пријавите за следната сезона. Како што сите знаеме крајниот рок е овој петок.

НИКОЈ НЕ МОЖЕ ДА ГО СОПРЕ ТИМОТ НА БРАУН ГП
Батон со победата во Монако на чекор до титулата

Џенсон Батон ги отфрла тврдењата дека светската титула е веќе негова откако победи на Монако ГП трката во неделата за петта победа во шест трки во 2009. 29-годишниот Англичанец го зголеми водството на 16 поени пред својот тимски колега од Браун ГП тимот, Рубенс Баричело, кој беше втор.

"Поставувате негативна енергија со тоа што велите дека не можам да загубам. Имам предност пред останатите, но се уште ништо не е завршено, и титулата не е моја да ја загубам. Не сакам да размислувам така", вели Батон.

Британецот е само 7 возач во историјата кој победил на пет од првите шест трки во историјата на Ф1, по великаните како Алберто Аскари, Хуан Мануел Фанџо, Џим Кларк, Аиртон Сена, Најџел Менсел и Михаел Шумахер. Сите тие возачи ја имаат освоено титулата во сезоната во која стартувале така.

"Давам се од себе и во моментов тоа е доволно, но не знам што ќе се случи во следните неколку трки. Докажавме дека имаме силен болид и дека изгледаме моќно во блиска иднина. По победа на 5 трки се надевав дека ќе имам поголема предност, но повозбудливо е што првото и второто место ги делат само два поени. Но, ова е конк*рентна сезона. Ред Бул се тука, Мекларен, Ферари и Тојота се тука, и сите се борат за поени", вели Батон.

Актуелниот светски шампион Луис Хамилтон од Мекларен смета дека Батон е во одлична позиција да ја освои титулата.

"Џенсон завршува фантастична работа и секако дека е во најдобра позиција за титулата. Ако би се обложувал тогаш парите би оделе на него", вели Хамилтон.

Неверојатната позиција на Батон е уште позачудувачка кога ќе се знае дека во поголемиот дел од зимата неговиот тим се бореше за опстојување. Браун излезе од "рушевините" на тимот на Хонда, кога јапонскиот производител се повлече поради економската криза, а самиот Батон доби помала плата за тимот да опстане. Браун се уште немаат главен спонзор (освен договорот со Вирџин кој носи околу 250.000 фунти по трка), така што се уште постојат сомнежи за нивниот опстанок.

Генералниот директор на Браун, Ник Фрај пак вели дека Батон е блиску до нов договор со тимот.

"Џенсон е со нас долго време, во кое имавме неуспеси и успеси. Мојата цел и целта на тимот е да го задржиме до крајот на неговата кариера. Ништо не се сменило. Со спонзори можеби ќе можеме да си го приуштиме", вели Фрај.

РЕЗУЛТАТИ (МОНАКО ГП)

1.Џенсон Батон (Браун) 1:40:44.282 10

2.Рубенс Баричело (Браун) +7.666 8

3.Кими Раиконен (Ферари) +13.442 6

4.Фелипе Маса (Ферари) +15.110 5

5.Марк Вебер (Ред Бул) +15.730 4

6.Нико Розберг (Вилијамс) +33.586 3

7.Фернандо Алонсо (Рено) +37.839 2

8.Себастиен Бурде (Торо Росо) +1:03.142 1

9.Џанкарло Физикела (Форс Индија) +1:05.040

10.Тимо Глок (Тојота) +1 круг

11.Ник Хајдфелд (БМВ) +1 круг

12.Луис Хамилтон (Мекларен) +1 круг

13.Јарно Трули (Тојота) +1 круг

14.Адријан Зутил (Форс Индија) +1 круг

НЕ ЗАВРШИЈА

15.Казуки Накаџима (Вилијамс) +2 кругови

16.Хеики Ковалаинен (Мекларен) +26 кругови

17.Роберт Кубица (БМВ) +48 кругови

18.Себастијан Фетел (Ред Бул) +62 кругови

19.Нелсон Пике Јуниор (Рено) +66 кругови

20.Себастиен Буеми (Торо Росо) +68 кругови

ГЕНЕРАЛЕН ПЛАСМАН

ВОЗАЧИ

1.Џенсон Батон (Браун) 51

2.Рубенс Баричело (Браун) 35

3.Себастијан Фетел (Ред Бул) 23

4.Марк Вебер (Ред Бул) 19.5

5.Јарно Трули (Тојота) 14.5

6.Тимо Глок (Тојота) 12

7.Фернандо Алонсо (Рено) 11

8.Кими Раиконен (Ферари) 9

8.Луис Хамилтон (Мекларен) 9

10.Фелипе Маса (Ферари) 8

11.Нико Розберг (Вилијамс) 7.5

12.Ник Хајдфелд (БМВ) 6

13.Хеики Ковалаинен (Мекларен) 4

14.Себастиен Буеми (Торо Росо) 3

15.Себастиен Бурде (Торо Росо) 2

КОНСТРУКТОРИ

1.Браун ГП Мерцедес 86

2.Ред Бул Рејсинг Рено 42.5

3.Тојота Панасоник 26.5

4.Скудерија Ферари 17

5.Мекларен Мерцедес 13

6.Рено Ф1 11

7.Вилијамс Ф1 Тојота 7.5

8.БМВ Заубер 6

9.Скудерија Торо Росо Ферари 5

-.Форс Индија Мерцедес 0

АЛОНСО "УМОРЕН" ОД СРЕДИНАТА
На Алонсо му е "доста"

Според шпанскиот печат, Фернандо Алонсо станува се поуморен од животот во средината на формула 1. Со секој следен ден се зголемуваат знаците дека Шпанецот дефинитивно ќе си замине од Рено на крајот на сезоната, најверојатно во тимот од неговите соништа Ферари.

Во серија интервјуа во Шпанија, 27-годишниот двократен светски шампион зборуваше блескаво за Скудерија, а во неделата изјави дека "возбуден" што во анкета на еден италијански весник се покажа дека италијанските фанови го сакаат зад воланот на Ферари.

Од друга страна тој станува се понезадоволен од неговиот сегашен Р29 болид на Рено, дури иако шефот Флавио Бриаторе му вети подобар болид за Турција и победнички болид пред крајот на сезоната. Бриаторе за слабиот резултат во Монако изјави дека беше виновна мешаницата и додаде дека "Фернандо ќе можеше да се бори со Ферари и Ред Бул, но не и Браун". За Ел Мундо, Алонсо веднаш одговори.

"Нема да поминам цело време на прес-конференцијата одговорајќи на тоа што го кажал или не го кажал Флавио. Ќе воведеме нови делови за Турција, но мислам дека ќе остане исто. Тоа се случи и во Барселона - сите ветуваа многу, а ситуацијата беше непроменета", вели Алонсо.

За Диарио Ас, тој продолжи: "Се уште сум многу мотивиран, но мака ми е што заостанувам се почесто".