Владимир Путин, претседателот на Руската федерација во својот енергичен и критички говор пред руските амбасадори рече дека Западот слабее под влијание на се потешката економска ситуација, но ги предупреди дипломатите дека мораат да внимаваат дека нивните „бивши непријатели од времето на студената војна секогаш можат неочекувано да се кренат“.

Путин во својот говор остро ги нападна западноевропските земји и ги осуди обидите за какви било еднострани акции во решавањето на меѓународните спорови. Тој ја истакна важноста за решавање на овие спорови преку ОН. Русија ќе продолжи да ги брани сопствените интереси и интересите на сојузникот Сирија во ОН, рече Путин.

„Социо-економските проблеми кои последниве месеци се влошија под влијание на економската криза во западните земји ја слабеат доминатната улога на т.н. историски Запад. Борете се за интересите на Русија кога и да е тоа потребно. Бидете подготвени на каков било развој на ситуацијата, па дури и на она најлошото“.

Путин повтори дека Западот е замешан во едностраната дипломатија надвор од ОН за да се задржи влијанието во светската политика и имплицираше дека Арапската пролет е всушност резултат на влијанието на западните земји.