Новиот вирус - биотероризам или...?

ПРВ МОЖЕН СЛУЧАЈ ОД НОВИОТ ГРИП А ВО МАКЕДОНИЈА, СЕ ЧЕКА ПОТВРДА ОД ЛОНДОН

Четиригодишното момче од Австралија, со привремен престој во Прилеп, кое вчера беше хоспитализирано на Клиниката за инфективни болести, е позитивно на вирус од групата А, изјави денеска министерот за здравство Бујар Османи, посочувајќи дека дополнителните анализи што ќе се направат во рефертната лабораторија  во Лондон треба да покажат дали се работи за новиот грип од типот А (H1N1).

Доцна синоќа на инфективна Клиника во Скопје е примен и возрасен маж од Вевчани, кој пристигнал од САД, со симптоми од новиот грип од типот А, но кај него резултатите покажаа дека тој не е заболен од овој грип.

- Во текот на денешниот ден ќе се испратат анализите во рефенрентната лабораторија во Лондон и во наредните денови ќе ни биде потврдено дали детето е заболено од новиот грип, иако ние веќе го третираме случајот како позитивен, рече министерот Османи.

Поради превенција, во текот на вчерашниот и денешниот ден се испитува каде и со колку лица детето било во контакт и се прави дезинфекција во хотелот во Прилеп во кој момчето престојувало заедно со неговото семејство. Сите лица кои биле во контакт со него веќе примаат соодветна терапија.

Мајката на детето која е заедно со него на Клиниката за инфективни болести засега нема симптоми од новиот грип од типот А (H1N1).

Министерот истакна дека нема потреба од паника кај населението, обезбедени се сите потребни средства, заштитни маски и скафандери, како и доволно дози од лекот „тамифлу“, со кој превентивно се делува против грипот. Екипи на Министерството се постојано на терен и ја следат состојбата.

- Кај момчето состојбата веќе се подобрува, симптомите се во фаза на целосно повлекување, а исто и кај возрасниот човек, но сепак поради сигурност и кај него ќе бидат направени дополнителни анализи, додаде министерот Османи.

Од Министерството за здравство стравуваат дека патувањата на македонските граѓани низ земјите во Европа и светот во наредниот период и за време на летните одмори можно е да ги зголемат случаите на заболени лица од новиот грип од типот А (H1N1) во земјава.

Досега, на Клиниката за инфективни болести во Скопје беа примени околу десетина лица како потенцијални заболени случаи, но анализите покажаа негативни резултати.

ПРИЛЕП ПОД ЗАСИЛЕНИ КОНТРОЛИ 

ПРЕЗЕМЕНИ СИТЕ МЕРКИ ЗА ЗАШТИТА ОД ПАНДЕМСКИОТ ГРИП 

Четиригодишното дете од Прилеп, кое од вчера е хоспитализирано на Инфективната клиника во Скопје, под сомнение дека има симптоми на грипот А H1N1, од 21 јуни, по пристигнувањето од Австралија, заедно со својата мајка, баба и неколку години постарото братче, беа сместени во еден прилепски хотел. По регистрирањето на случајот, здравствените власти велат дека ги презеле сите неопходни превентивни мерки за заштита и на нивното престојувалиште, но и на останатите членови од семејството, односно бабата и другото дете кои се уште се во Прилеп и веќе ја примаат превентивната терапија, како и на другите лица кои во изминативе неколку дена доаѓале во контакт со нив.

И покрај нашите настојувања да откриеме од каде потекнува семејтвото, сепак, до овој момент не е познато дали тие се од Прилеп, или, пак, едноставно биле само на поминување односно во посета на некои свои роднини. Од овие причини, надлежните служби интензивно и будно и понатаму ја следат состојбата.