Офтопик II

Американка открива македонски корени

Кога пред три години првпат дојдов во земјата на моите предци, дојдов со ширум отворени очи, за да си одговорам на прашањето што е тоа што тие го викаат Македонија. Имав претстава дека тоа е некој стар свет, нешто поинакво, мистично, многу далеку од западната цивилизација, вели Керол Хај од Сан Франциско, Американка со македонско потекло по нејзината мајка. Таа деновиве вторпат престојува во Македонија, со својот сопруг Тод и ќерката Кортни. Ја запознава и истражува нашата земја, учи за народот, историјата и традицијата, вели дека се чувствува половина Македонка и се гордее со своето потекло.

- Токму овде ја почувствував слободата на животот. Ме освои блискоста на луѓето, меѓусебната комуникација, дружењето во доцните ноќни часови, без да ти пречи некој. Тоа го нема во Америка, освен можеби во Њујорк. Рестораните се затвораат во 21.30 часот, а луѓето се изолирани во најтесниот круг на семејството - вели Керол.