Офтопик II

Грците масовно заминуваат во странство

Да им кажеше некој на Грците пред 20 години дека денес ќе заминуваат во потрага за подобар живот - во Чешка, веројатно би му се смееле. Но, тоа денес е реалност. Главно млади луѓе бараат спас од кризата некаде на север или на запад.

Сонцето, плажата и морето ќе му недостасуваат на Александрос, но и покрај тоа ова 18-годишно момче за неколку недели го чека обука за информатичар во една од големите фирми која произведува компјутери. Ништо повеќе не може да го задржи дома.

- Конк*рирав тука за неколку работни места, но не вредеше. Тоа го фрустрира човек. Таму каде што одам ме чека подобра иднина, изјави тој за „Дојче веле“.

Северен Егеј е провинција во која владее невработеност, посебно меѓу младите. Луѓето тука порано живееле од трговија со тутун, но индустриското производство во тој крај денес е замрено. Се уште има градби кои потсетуваат на некогашната благосостојба.

На Александрос не му е сеедно што го напушта ова место во тек на кризата. Но, тука наскоро нема повеќе да има млади луѓе. Сите заминуваат во големите градови, во Атина или Солун или во други земји, како што е на пример Германија. Во средното училиште во Кавала, учениците од највисоките класови не се радуваат на распустот. Единствено за кое разговараат во училишниот двор е како да си одат од тоа место.

- Кога за прв пат ќе одам во голем град, повеќе нема да се вратам тука, а ако успеам да одам во странство, толку ќе се навикнам на велеградскиот живот па во стариот крај ќе доаѓам само во посета, вели една ученичка.

Старците се уште се тука. Но, бидејќи нема млади, на рибарските бродови работат Египќани. За Александрос тоа не е алтернатива.

- Секако, тешко е да се замине, го оставаш тука семејството и пријателите, но верувам дека тоа ќе ми се исплати, вели тој.

Неговата пријателка Фотини се уште живее кај родителите. Нема пари за да плати сопствен стан, но се уште не губи надеж.

- Ќе настојувам некое време со упорна работа да се изборам за некое работно место. Но, ако за три години не успеам да се одделам од родителите, ќе морам да заминам во странство, вели таа.

Грчката младина е разочарана. Откако земјата пред помалку од 30 години пристапи кон Европската заедница и подоцна во Европската унија, стандардот постојано растеше. Но, се покажа дека е конструиран на лабаво тло - сега се се урива, а младите се чувствуваат измамени и масовно ја напуштаат земјата.