Последен гледан филм

Наслов:
„Предобра за мене“ (She’s out of my league)

Режија:
Џим Филд Смит

Сценарио:
Шон Андерс и Џон Морис

Главни улоги:
Џеј Барухел, Алис Ив, Ти Џеј Милер, Нејт Торенс

Жанр:
романтична комедија

Времетраење:
104 мин.

Година на издавање:
2010 -та





Велат убавината лежи во окото на тој што ја гледа. Таа е релативна, минлива работа, но сите ја посакуваат. Луѓето сакаат да ја имаат и да бидат опкружени со убавина. Но, сепак има многу повеќе од тоа што окото го гледа. Убавината е главна тема во последниот филм на младиот и надежен режисер Џим Филд Смит, наречен „She’s out of my league“.

„She’s out of my league (MaxTV видеотека) ја раскажува приказната за Кирк Кетнер (Џеј Барухел) просечен млад човек кој сонува еден ден да стане пилот, но работи на аеродромот во Питсбург. Тој е постојано исмејуван и омаловажуван од семејството и пријателите поради својата срамежливост и недостиг на привлечност за понежниот пол, па со текот на времето развил и комплекс на помала вредност. Тој дури се надева дека по две години „пауза “ ќе се смири со девојката, но таа всушност брзо го заборавила. Моли Меклиш (Алис Ив) пак е прекрасна, успешна богата девојка која работи како планер на настани и која случајно ќе го заборави телефонот на терминалот каде што работи Кирк. Тој ќе и го врати и од тука е веќе се познато.

„She’s out of my league“ е совршен филм за Свети Валентајн ( за тие што го празнуваат). Лесна, смешна комедија, која ќе ве расположи. Нема да влезе во аналите на романтичните комедии, најверојатно ќе го заборавите по 15 минути, но сепак не може да се смести во кошот на филмовите како „Down to you“ (со кој всушност има сличен крај) . Тоа што го издвојува овој филм од повеќето романтични комедии е што има навистина солиден хумор кој доаѓа од сценариото. Да, тоа е шаблонско, но во одделни сцени каде Кирк е опкружен со другарите Стајнер (Ти Џеј Милер), Девон (Нејт Торенс) и Џек (Мајк Вогел) и тие му даваат совети за тоа како да се однесува околу жените, е урнебесно. Одлични се и сцените со неговото семејство, каде трпи постојано малтретирање особено од братот Дилан (Кајл Борнхајмер). Џеј Барухел во улогата на Кирк е солиден и навистина се труди, но за жал неговата глума ја засенуваат споредните актери, особено комичарот Ти Џеј Милер, но и Кај Борнхајмер како братот на Кирк.

Позитивната работа во овој филм, е тоа што на припадничките на понежниот пол им дава претстава за стравовите, мислењата, кои мажите ги имаат кон врските, жените, романсата. И мажите се доверуваат на пријателите и бараат совет од нив како и жените, ( помислете на Sex and the city). Тоа што разочарува во филмот е што по кој знае кој пат Холивуд се обидува да не убеди дека згодните личности треба да бидат со згодни личности. Дека тие што не се привлечни не треба ни да помислуваат дека ќе бидат со атрактивна девојка, бидејќи не се вредни за неа.

Уште од филмовите на Џон Хјуз „Breakfast club“ „16 candles“ прекрасните кул деца се дружеа со кул деца. И по 20 години, работите не се променети ниту во филмовите, а за жал ниту во општеството. Во филмот дури се даваат и примери каде што убавицата ја привлекол ѕверот и тоа се кажува со многу фрапантност: Џулија Робертс и првиот сопруг Лајл Ловет, Ричи Самбора и Хедер Локлир, Николас Саркози и Карла Бруни, па дури и Кинг Конг и Ен Дароу. Пред фактите и боговите молчат. Факт е дека „She’s out of my league“ не е ниту првиот, а нема да биде ниту последниот филм на оваа тема. Но, факт е и дека постои нешто под кожата кое нема да се збрчка со годините. Тоа е внатре кај секој човек и само е потребно да се пронајде, да се препознае и да се цени.