ВО 2013 ГОДИНА ПОЧНУВА ИЗГРАДБАТА НА ДЕЛНИЦАТА КУМАНОВО - БЕЉАКОВЦЕ

ЕБОР ни даде 47 милиони евра за пругата кон Бугарија

Договорот за заемот вчера го потпишаа вицепремиерот и министер за финансии, Зоран Ставрески и директорката за транспорт на ЕБОР, Сју Барет

На почетокот на 2013 година, конечно стартува изградбата на железничката делница Куманово - Бељаковце, што е дел од пругата што треба да не поврзе со Бугарија за што и официјално го добивме кредитот во износ од 46,4 милиони евра од Европската банка за обнова и развој (ЕБОР). Договорот за заемот го потпишаа вчера вицепремиерот и министер за финансии, Зоран Ставрески и директорката за транспорт на ЕБОР, Сју Барет.

Како што информираше Ставрески, кредитот го добивме под многу поволни услови - со рок на отплата од 15 години, со 4 години грејс-период, а каматната стапка е 1,7% во моментов. Проектот предвидува рехабилитација и изградба на делницата во должина од 31 километар, што практично е почеток на изградбата на источниот дел од Коридорот 8 што поминува низ Македонија и е еден од најзначајните коридори за земјава.

...

Проектот ќе се реализира во првиот квартал од 2013 година и ќе заврши до 2017 година, а во неговата имплементација ќе бидат вклучени Македонски железници-Инфраструктура и Министерството за транспорт и врски.

...

За да се подготви останатиот дел од проектот на пругата кон Бугарија, Европската инвестициона банка и обезбеди грант на РМ во износ од 7,85 милиони евра, што покажува дека на економичен начин ќе се изгради проектната документација за останатиот дел од Коридорот 8. Ставрески потсети дека од ЕБОР се користат и 50-те милиони евра за регионалните патишта, 107 милиони евра за изградба на автопатот Демир Капија - Смоквица, а за енергетско поврзување меѓу РМ и Бугарија - 37 милиони евра.

Сју Барет, директор за транспорт во ЕБОР, смета дека ставањето во функција на железничкиот Коридор 8 ќе и овозможи на Македонија пократка рута до пристаништата на Црно Море.
-Со тоа се очекува да се стимулира и регионалната економија, бидејќи протокот на транспорт ќе биде полесен. Натамошниот развој на коридорот ќе го поврзе Црното Море во Бугарија со Јадранското Море во Албанија - вели Барет и додава дека и понатаму банката ќе помага во развојот на македонската инфраструктура, притоа потсетувајќи дека тие ќе инвестираат и во модернизацијата на железницата во земјава. Банката досега реализирала осум транспортни проекти во Македонија во износ од 300 милиони евра, што претставува една третина од вкупното кредитирање на банката во РМ.

Според Миле Јанакиески, министер за транспорт и врски, наесен ќе се објави јавниот повик за избор на изведувач за да може градежните активности да стартуваат во првата половина на 2013 година, а се очекува да завршат за 5 години. Во моментов се обезбедува и техничка документација за останатите делови од оваа делница, како што е проектот за делот од Бељаковце до Крива Паланка кој треба да почне со изградба во 2015 година. 

http://daily.mk/forward/1475004/ebor-ni-dade-47-milioni-evra-za-prugata-kon-bugarija