МУЗИЧКИ ВЕСТИ

Компанијата на Girls Aloud ги демантираше написите дека групата планира да се реобедини без Nadine Coyle. Нивниот претставник за печат тврди дека потпишале договор за снимање на шестиот студиски албум како петорка, но дека датумот на неговото издавање се уште не е определен.

Претходно, британскиот таблоид Сан објави дека женскиот бенд Girls Aloud ќе се врати идната година, но дека во новата постава нема да има место за  Nadine Coyle.

Наводно, Sarah Harding, Nicola Roberts, Kimberly Walsh и Chеryl Cole веќе започнале да работат на идеите околу нивниот камбек, а Coyle не се вклопува во нивните планови. Наводно, девојките чувствуваат дека се оттуѓиле од неа.

“Одлуката беше тешка за Sarah, Nicola, Kimberly и Chеryl. Но, тие сметаат дека иднината на Girls Aloud e без Nadine. Односите меѓу Nadine и останатите девојки се заладија откако групата е на пауза . Тензиите меѓу нив всушност се појавија уште пред разделбата,“ се вели во изјавата на извор близок до девојките, објавена во таблоидот.

Girls Aloud беа формирани во 2002 година, преку шоуто за таленти “Popstars: The Rivals”. После 7 успешни, но и напорни години, девојките решија да направат пауза во 2009 година. Тие издадоа 21 синглови и 5 студиски албуми.

По разделбата Nicola лансираше успешен козметички бренд, Cheryl се посвети на својата соло музичка кариера, а стекна популарност и како судија во X Factor, Sarah отвори ноќен клуб, додека Kimberly стана ТВ презентер.

Nadine ги залади односите со бендот кога одлучи да се пресели во САД во 2006 година, откако започна врска со ѕвездата на серијата “Очајни домаќинки”, Jesse Metcalfe. Оттогаш живее таму, а отвори и свој бар во близина на Л.А.

Таа дополнително ги налути останатите девојки кога одби да учествува во ТВ проектот “The Passions Of Girls Aloud” од 2008. Наводно, работи и на соло албум.