F1 Вести

ФОРМУЛА 1 - И ПОКРАЈ ТОА ШТО ДИТРИХ МАТЕШИЦ ГИ ПРОДАВА СВОИТЕ 50% ОД ТИМОТ

На Торо Росо им е ветена стабилност за 2009

Спортскиот директор на тимот на Торо Росо, Франц Тост вели дека не постои загриженост за блиската иднина на тимот, и покрај тоа што шефот на Ред Бул, Дитрих Матешиц планира да ги продаде своите 50% од акциите. Матешиц јасно стави на знаење дека сака да го продаде Торо Росо за да се фокусира на "големиот" Ред Бул Рејсинг Тим.

Торо Росо од тогаш преговара со повеќе заинтересирани инвеститори, вклучувајќи го и формула 3 тимот од Британија, Ултимејт. Тост вели дека и покрај намерите да се продава тимот, Матешиц го гарантирал буџетот на тимот за во 2009.

"Шпекулациите за продажбата на тимот беа посилни на почетокот на сезоната, и секако влијаеја на нас, но само кратко време. Ако има секоја недела приказна за продажба на тим, не е многу забавно за тие кои работат во него. Пораката која ја добивме од Матешиц е јасна, дека за 2009 се останува стабилно, не само околу вработеноста, туку и околу биџетот. Потоа ќе видиме што ќе се случи за 2010. Во моментов ние одиме напред, чекор по чекор", вели Тост.

БУРДЕ И ФЕТЕЛ СЕ ОДЛИЧНИ ВОЗАЧИ

Возачите на Скудерија Торо Росо, Себастијан Фетел и Себастиен Бурде не треба да се плашат за нивната позиција во тимот, бидејќи Тост вели дека во тимот се задоволни од првиот дел од сезоната. Торо Росо се смета за Б тим на Ред Бул, така што сите очекуваат следната година да го видат младиот Германец Фетел во Ред Бул, но од Торо Росо велат дека се надеваат дека тој ќе остане и во 2009.

"Фетел скокна во формула 1 по многу кратка тркачка кариера. Не можете да дојдете во формула 1 и да им покажувате на сите како се вози. На млад возач му е се потребни три години да научи се за формула 1, не само болидот, туку целото опкружување. Затоа сум задоволен од нашите возачи. Фетел учи се повеќе и станува подобар, додека Бурде имаше неколку добри трки. Затоа тие се сигурни", вели Тост.

ДОЦНИОТ СТАРТ Е УМЕН ПОТЕГ

Техничкиот директор на тимот, Џорџо Асканели пак вели дека не жали за одлуката да се промовира новиот болид во средина на сезоната. Тимот од Фаенца се натпреваруваше со минатогодишниот СТР2 на првите пет трки од 2008 пред да го воведат СТР3 во Монако. Иако ова беше ризичен потег, тимот освои пен во дебито на новиот болид.

"Одлучивме да стартуваме со модифицирана верзија на болидот од 2007 и од сегашна перспектива тоа беше исправно. Сега сме на половина од поените од минатата сезона, така што мора да сме направиле нешто исправно! СТР3 е далеку подобар болид, и иако имавме проблеми со деловите, сега се е решено", вели Асканели.

Брандл: "Хамилтон ќе загуби во битката со медиумите"

Овие денови пред Британското ГП сите имаат совет за Луис Хамилтон. Поранешниот возач, а сега ТВ водител, Мартин Брандл инсистира дека младиот возач на Мекларен мора да "престане со војната со медиумите", бидејќи во спротивност "ќе загуби катастрофално". Хамилтон беше под лупата на критичарите во 2008 за неговите активности надвор од патеката, како во неделата кога Њуз оф д Ворлд објави дека поранешната британска мисица Вивијан Буркхард изјави дека Хамилтон ја напуштил само два дена пред на Фестивалот во Кан да се појави со Никол Шерцингер од бендот Пусикет Долс.

По катастрофалната трка во Мањи-к*р, Хамилтон прво не сакаше да зборува со британските медиуми, по што Брандл, кој и самиот беше возач на Мекларен го предупреди дека не треба да води војна со медиумите.

"Тоа е битка која ќе ја загуби и тоа страшно. Медиумите ќе работат со тебе, но се треба да има реципроцитет, и подобро е тие да ти се пријатели отколку непријатели. Лут возач секогаш ќе вози како Луис во Мањи-к*р, со многу грешки. Тој сега треба да заборави на статусот на мега-ѕвезда и да работи како Ф1 возач", предупредува 49-годишниот Брандл.

Но Хамилтон веднаш одговори на советите на поранешните британски шампиони Џеки Стјуарт и Дејмон Хил.

"Јас сум во единствена ситуација и никој не се чувствувал како мене досега. Единствена личност од која примам совети е мојот татко", вели Хамилтон.

Ф1 ФЛЕШ

Пред Британското ГП има се поголеми шпекулации дека Дејвид Култхард ќе го објави своето повлекување од формула 1 токму во Силверстоун. Култхард во кариерата има 15 победи и скоро 250 ГП трки, а со 37 години е најстариот возач во Ф1. Следната година на негово место се очекува да дојде Себастијан Фетел.

Познатиот дизајнер на Ф1 патеки Херман Тилке наводно бил во посета на Донингтон Парк, како дел од плановите за големо преуредување на патеката. Донингтон се почесто се споменува како замена за трката во Силверстоун, чии сопственици се во остар конфликт со Ф1 шефот Берни Еклстоун.

Тојота Ф1 тимот ќе има посебен партнер на Британското ГП, откако доби поддршка од филмот на Ворнер Брос "Темниот Витез", кој е последен филм од Бетмен серијата и ќе има премиера на крајот на овој месец (25 јули). За да се одбележи филмот, болидите на Тојота ќе бидат освежени со логото на филмот. Покрај ова "вистинскиот" Бетмобил ќе излезе на патеката во Силверстоун во четврток покрај ТФ108 болидите.

Скоро е сигурно дека Кими Раиконен ќе има нов мотор за трката во Силверстоун. По инцидентот во Мањи-к*р, каде што Финецот имаше среќа да заврши на второто место откако десниот ауспух му откажа, шефот на тимот Стефано Доменикали самиот призна дека скоро е невозможно да се користи истиот мотор. Според новите правила возачите имаат право на едно "слободно" менување на моторот во текот на сезоната без казната од 10 места.

Хамилтон маестрално на дождот!

Луис Хамилтон одговори на своите критичари и ја врати потерата по светската титула на вистински пат со неверојатна победа на дождливото Британско ГП. Асот на Мекларен фантастично се снајде на тешката патека, а неговиот тим ги направи сите можни правилни одлуки, додека неговите главни ривали имаа ден за заборавање. По неговата победа, Хамилтон се израмни на врвот во генерален пласман со дуото на Ферари, Кими Раиконен и Фелипе Маса, кои беа четврти, односно 13. Ник Хајдфелд го освои второто место за БМВ пред изненадувањето Рубенс Баричело во Хонда, кои беа единствени возачи во ист круг со Британецот.

Победата на Хамилтон дојде во можеби најдобрата трка во неговата кратка кариера и доаѓа во вистинско време откако не успеа да освои поени на предходните две трки. Пред Силверстоун, Англичанецот беше под притисок и како да го чувствуваше кога поради грешките на квалификациите беше само четврти на стартот.

"Дефинитивно најдобрата победа која сум ја имал досега, но доаѓа една од најтешките трки. Ова ќе се запише како мојата најдобра трка, не само бидејќи е домашна патека, туку бидејќи навистина возев добро. Сакам победата да ја посветам на моето семејство, бидејќи сите имавме проблеми последните недели и беше тешко. Но, како и секогаш семејството е тука кога е најпотребно", вели Хамилтон.

Дождот му даде шанса на Хамилтон да го покаже својот талент. Тој имаше импресивен старт и од четвртото место се доближи до својот колега и освојувач на пол-позицијата Хеики Ковалаинен, кого го помина во петтиот круг. Тој веднаш направи предност, но веднаш беше пристигнат од Раиконен кој го помина Ковалаинен во 10 круг. Одлучувачкиот момент дојде во 21. круг, кога Хамилтон и Раиконен првпат влегоа во боксот.

Мекларен му поставија на Хамилтон "средни" гуми, додека Ферари се коцкаа дека ќе остане суво, ги оставија користените гуми на Раиконен. По еден круг повторно почна да врне и Раиконен се мачеше да ја заддржи контролата на болидот. Хамилтон притисна и до 26. круг имаше 21.8 секунди предност пред Раиконен, кој потоа го загуби третото место за Ковалаинен.

Времето остана тешко за предвидување, и Мекларен направија нова добра одлука кога во второто влегување во боксот во 38. круг му поставија "средни" гуми иако условите беа толку тешки што Хонда се одлучи за гуми за влажно, што беше на крајот успешна приказна за Баричело.

"Беше толку екстремно, како во Фуџи лани. Немаше многу дожд, но имав проблеми со видливоста, посебно од десната страна", вели Хамилтон.

Хајдфелд веднаш дојде под притисок на Баричело во Хонда, кој го имаше најбрзиот болид поради гумите за дожд. Бразилецот го помина Хајдфелд за второто место во 43. круг, но мораше да влезе во бокс во 46. круг поради проблеми со горивото при второто влегување во боксот. Хајдфелд, кој не направи ниту една грешки заслужено дојде на второто место, но Баричело, кој е познат како специјалист за возење на дожд остана како трет.

"Имаше момент кога за малку ќе удрев во ѕид и решивме да одиме со екстремни гуми, бидејќи иако имаше само 5 круга, во тие можев да добијам 10 секунди. Тоа се случи зарем не?", вели Баричело.

Раиконен кој двапати се изврте во трката, во последните кругови се созеде и го грабна четвртото место победувајќи во импресивната битка со Алонсо. Шпанецот во своето Рено исто така се обиде да го заддржи Ковалаинен зад него, но на два круга пред крајот беше поминат.

"Реков дека ако врне се може да се случи, и тоа се виде денеска. Ги искористив гумите многу бргу и при крајот на трката како да возев на мазни гуми. И три поени се доволни", вели Алонсо.

Убедливо најлоша трка оваа сезона имаше Фелипе Маса, кој по сите проблеми на квалификациите, се изврте неверојатни пет пати и заврши како 11., последен од болидите кои финишираа.

РЕЗУЛТАТИ (БРИТАНСКО ГП):

1.Луис Хамилтон (Мекларен) 1:39:09.440 10

2.Ник Хајдфелд (БМВ) +1:08.500 8

3.Рубенс Баричело (Хонда) +1:22.200 6

4.Кими Раиконен (Ферари) +1 круг 5

5.Хеики Ковалаинен (Мекларен) +1 круг 4

6.Фернандо Алонсо (Рено) +1 круг 3

7.Јарно Трули (Тојота) +1 круг 2

8.Казуки Накаџима (Вилијамс) +1 круг 1

9.Нико Розберг (Вилијамс) +1 круг

10.Марк Вебер (Ред Бул) +1 круг

11.Себастиен Бурде (Торо Росо) +1 круг

12.Тимо Глок (Тојота) +1 круг

13.Фелипе Маса (Ферари) +2 круга

НЕ ЗАВРШИЈА

14.Роберт Кубица (БМВ) +21 круг

15.Џенсон Батон (Хонда) +22 круга

16.Нелсон Пике Јуниор (Рено) +25 круга

17.Џанкарло Физикела (Форс Индија) +34 круга

18.Адријан Зутил (Форс Индија) +50 круга

19.Себастијан Фетел (Торо Росо) +59 круга

20.Дејвид Култхард (Ред Бул) +59 круга

ГЕНЕРАЛЕН ПЛАСМАН

ВОЗАЧИ

1.Луис Хамилтон (Мекларен) 48

2.Фелипе Маса (Ферари) 48

3.Кими Раиконен (Ферари) 48

4.Роберт Кубица (БМВ) 46

5.Ник Хајдфелд (БМВ) 36

6.Хеики Ковалаинен (Мекларен) 24

7.Јарно Трули (Тојота) 20

8.Марк Вебер (Ред Бул) 18

9.Фернандо Алонсо (Рено) 13

10.Рубенс Баричело (Хонда) 11

11.Нико Розберг (Вилијамс) 8

12.Казуки Накаџима (Вилијамс) 8

13.Дејвид Култхард (Ред Бул) 6

14.Тимо Глок (Тојота) 5

15.Себастијан Фетел (Торо Росо) 5

16.Џенсон Батон (Хонда) 3

17.Нелсон Пике Јуниор (Рено) 2

18.Себастиен Бурде (Торо Росо) 2

КОНСТРУКТОРИ

1.Скудерија Ферари 96

2.БМВ Заубер 82

3.Мекларен Мерцедес 72

4.Тојота Панасоник 25

5.Ред Бул Рејсинг Рено 24

6.Вилијамс Тојота 16

7.Рено Ф1 15

8.Хонда Ф1 14

9.Скудерија Торо Росо Ферари 7

-.Форс Индија Ферари 0

КРУГ ПО КРУГ НА БРИТАНСКОТО ГП

Луис Хамилтон стигна до својата најимпресивна победа во кареирата откако во Силверстоун го совлада Ник Хајдфелд за повеќе од една минута, додека само уште Рубенс Баричело беше во негов круг.

- Пред стартот иако немаше дожд, патеката беше влажна и сите 20 возачи стартуваа на "средни" гуми. На стартот Хамилтон од вториот ред скокнува и го предизвикува освојувачот на пол-позицијата и колега Ковалаинен пред да имаат мал контакт со гумите. Пред крајот на првиот круг има многу извртувања, Марк Вебер од петтото место, но и Култхард, Фетел, Розберг и слабиот Маса.

- Во 2. круг, Ковалаинен останува прв, Алонсо го поминува Хајдфелд за 5. место, Накаџима излегува од патеката, а Маса повторно се извртува.

- Во 5. круг, Хамилтон лесно го поминува својот тимски колега Ковалаинен за првото место на Бекетс кривината.

- Во 6. круг, Хамилтон има половина секунда предност по круг и направи 2.4 секунди пред Ковалаинен по што следуваат Раиконен (4.0), Алонсо (6.4), Хајдфелд (14.7), Пике (15.9), Трули (18.0), Кубица (18.8), Глок (22.9) и Баричело (25.1). Вебер, кој стартуваше како втор е 15., додека Маса е 18.

- Во 9. круг, Вебер ги поминува Бурде и Зутил за 12. место.

- Во 10. круг, Ковалаинен зе исвртува на Клаб кривината, губејќи шест секунди и второто место на Раиконен.

- Во 12. круг, Зутил губи контрола и излетува.

- Во 14. круг, Раиконен со најбрз круг.

- Во 18 круг, Хамилтон води со 2.3 секунди пред Раиконен, Ковалаинен е трет со 11.7. Маса стигнува до 15. место.

- Во 21. круг, Хамилтон и Раиконен влегуваат во боксот, само Хамилтон зема нови гуми, се враќаат на патеката на прво и второ место.

- Во 24. круг, дождот почнува да паѓа, Накаџима се извртува, Хамилтон е по 2 секунди побрз од сите останати.

- Во 26. круг, Алонсо го поминува колегата Пике. Возачите кои не земаа нови гуми како Раиконен и Алонсо се мачат со брзината.

- Во 27. круг, Ковалаинен го поминува Раиконен, но Хајдфелд ги поминува двајцата и е втор. Физикела излетува.

- Во 30. круг, Хамилтон има 25 секунди предност пред Хајдфелд.

- Во 34. круг, Кубица го зема третото место од Ковалаинен и заостанува 50 секунди. Силниот дожд на патеката значи дека Кубица и Глок излетуваат.

- Во 38. круг, Хамилтон прави грешка, но останува прв, Маса повторно се извртува како и Раиконен. Хамилтон влегува за гориво и за нови гуми (средни).

- Во 41. круг, Хамилтон води пред Хајдфелд (42.6), Баричело (48.7), Трули (57.3), Алонсо (64.5), Ковалаинен (70.8), Раиконен (77.8), Глок (98.9), Накаџима (1 круг) и Вебер (1 круг).

- Во 49. круг, Ковалаинен се извртува, губејќи места од Баричело и Алонсо.

- Во 54. круг, упорниот Раиконен конечно го поминува Алонсо.

- Во 59. круг, и Ковалаинен го поминува слабото Рено на Алонсо.

Алонсо не жали што заминал во Рено

Фернандо Алонсо вели дека не жали што се врати во тимот на Рено за сезоната 2008 иако Марк Вебер во саботата се квалификуваше во првиот ред. Поранешниот двократен светски шампион по несреќната сезона 2007 со Мекларен, за малку ќе го избереше токму тимот на Вебер, Ред Бул, но се одлучи за враќање во тимот каде што освои две титули. Но, иако неговиот тим Рено не покажува добра форма, Шпанецот вели дека е задоволен.

"Се ми покажуваше дека Рено е сигурниот и најлогичен избор, иако одлуката не беше лесна. Понекогаш Тојота и Ред Бул се подобри од нас оваа година, но ние сме попостојани. Ако би можел сега да избирам за кого да возам и следната трка, повторно ќе биде Рено. Во теорија можеме да бидеме шести или седми", вели Алонсо.

Покрај се, Алонсо вели дека е среќен што не останал во Мекларен, тим со кој имаше спектакуларни несогласувања минатата сезона.

"Можеби немаме најдобри резултати, не сум на прес-конференциите за места на подиумот, ниту се борам за светската титула. Но, за мене лани беше многу потешко. На крајот знаев дека нема да можам да победам. Дали ми недостасува Хамилтон? Не, бидејќи тие дуели таму не беа фер. Немам добри сеќавања од Мекларен. Оваа година беше тешка околу резултатите, но од друга страна е навистина за уживање", вели Алонсо.

Ф1 ФЛЕШ

Џенсон Батон го нарече својот Ф1 ривал и сонародник Луис Хамилтон "многу слаб" откако се повлече од предизвикот за триатлон трка за добротворни цели. Откако минатата недела изјави дека физички подобро подготвен од Батон, Хамилтон доби предизвик да се трка против Батон, кој прво го прифати, пред неговиот татко и менаџер Ентони половина час подоцна да се повлече од ова ветување. "Тоа е слабо, многу слабо. Искрено изненаден сум бидејќи тој е спортист, јас сум спортист и двајцата сакаме предизвик", вели Батон. Кога Хамилтон ја прифати битката Батон изјави дека ќе донира 10.000 фунти ако загуби. "Што се случува со парите сега? Се надевам дека барем ќе ги донира", вели Батон.

Луис Хамилтон е блиску до инвестиција од неколку милиони долари во Гренада, малиот карипски остров од каде што доаѓа неговиот татко. Според Дејли Телеграф, асот на Мекларен е подготвен да даде 20 милиони $ за изградба на еден хотел и преговарал со премиерот на малата држава Кит Мичел. Покрај одличното време, Гренада нуди и големи даночни олеснувања.

Дејвид Култхард вели дека не жали за ништо во својата Ф1 кариера. Пред трката во Силверстоун, 37-годишниот Шкотланѓанец објави дека на крајот на својата 15. сезона ќе се пензионира. "Имав долга кариера и многу добри шанси. Ќе си заминам знаејќи дека сум возел болиди со кои можев да освојам титула. Нема да мислам дека никогаш немав шанса. Добив шанса, но не го испорачав резултатот", вели Култхард.

ФИА неправилно ги казни Мекларен со 100 милиони $ минатата сезона, објавува британскиот Индипендент. Според анализата, казната со која се заврши Степнигејт шпиунската сага за поседување на детални планови на болидот на Ферари, ги прекршила статутите на ФИА. Членот 14 од статутот на ФИА вели дека без претседателот Макс Мозли, 26. членови на Светскиот Моторспорт Совет (ВСМЦ) мораат да ги претставуваат националните федерации, што не било член. На пример, Берни Еклстоун самиот гласаше иако не претставува ниту една национална федерација.

Берни Еклстоун ги демантираше шпекулациите дека тој е човекот со пари зад Ф1 договорот со патеката Донингтон Парк. ФИА објави дека Донингтон ќе го замени Силверстоун како дом на Британското ГП од 2010 година, но патеката мора да се реновира да ги достигне стандардите кои ги бараат Еклстоун и ФИА, акција за која се потребни 100 милиони фунти. Берни Еклстоун ги демантираше шпекулациите дека тој е зад трката, туку открива дека се работи за еден (засега анонимен) англиски бизнисмен.

ФОРМУЛА 1 - НЕ ПРЕСТАНУВААТ ШПЕКУЛАЦИИТЕ ОКОЛУ СЛЕДНИОТ ТИМ НА ДВОКРАТНИОТ ШАМПИОН

Алонсо повторно поврзуван со Ферари

Големите спонзори на Мекларен Мерцедес, шпанската банка Сантандер, би ја променила страната за 2009 година и би била голем спонзор на Ферари. Германскиот магазин Спорт Билд тврди дека договорот е вреден 25 милиони евра по сезона и во него речиси сигурно е вклучен и ангажманот на поранешниот двократен шампион Фернандо Алонсо.

Сантандер почнаа со спонзорството на Мекларен минатата година, кога 26-годишниот Алонсо го почна повеќегодишниот договор со британскиот тим. Но, неговите односи со тимот како што се знае беа никакви поради наводното преферирање на Луис Хамилтон, и Шпанецот оваа сезона се врати во Рено, тим со кој ги освои двете титули во 2005 и 2006. Кога тој си замина од Мекларен, многу шпански спознори како Мутуа Мадрилења го напуштија тимот, а сега, по с$ изгледа, и Сантандер сака да го направи тоа.

Спорт Билд вели дека Сантандер-Алонсо-Ферари договорот вклучува реклама на тркачките костуми и на предното и задното крило, како и 30 милиони евра годишно "помош" за платата на Алонсо.

Во Силверстоун, Шпанецот изјави дека ќе почека до септември пред да одлучи каде ќе вози во 2009. Фасцинантно, Ферари, иако има договор со своите двајца возачи Кими Раиконен и Фелипе Маса, речиси секогаш го објавува тимот за следната сезона на трката во Монца, која оваа година се одржува на 14 септември.

Шефот на Сантандер, Емилио Ботин, беше во Силверстоун за Британското ГП. Шпанскиот Диарио АС шпекулира дека колега на Алонсо за следната година ќе биде Кими Раиконен, по катастрофалната трка на Бразилецот Маса во Силверстоун во која се изврте пет пати.

"Не знам дали тие шпекулации се точни, но не гледам зошто би било проблем да се има тим со Кими и Алонсо, или Фелипе и Алонсо", вели тест-возачот на Ферари, Шпанецот Марк Хене.

АЛОНСО НЕ ОЧАЈУВА ЗА ПОДИУМИ ВО 2008

Фернандо Алонсо, пак, вели дека се помирил со своето отсуство од подиумите во сезоната 2008. Шпанецот признава дека некои членови на Рено се очајни да видат Р28 болид меѓу најдобрите три во формула 1 пред да заврши сезоната. Но, откако беше шести на дождливото Британско ГП во неделата, Алонсо изјави дека враќањето на подиумот не е некој голем приоритет.

"За мене тоа нема посебна важност. Сакам да го стигнеме четвртото место во генерален пласман на конструктори до крајот на сезоната", вели Шпанецот за Ел Паис додавајќи дека во моментот се седми, и пред нив се само Хонда, Торо Росо и Форс Индија.

Во средината на Ф1 оваа година по три години борење за титулата, Алонсо признава дека може да се случи пласман на подиумот, но само со среќа.

"Подиумот за Ред Бул во Канада се случи поради среќа. А во Силверстоун тоа го направија Хонда по серијата лоши резултати, и сега како да возат ракети. Мораме да останеме смирени и да продолжиме со освојување поени. Има години во кои си среќен и други кога не си. Подобро да немам среќа сега кога не се бориме за титулата", вели Алонсо.

Сепак, Шпанецот додаде дека е задоволен што во Силверстоун "бил еден од ретките" кои не направиле поголема возачка грешка.

Хајдфелд се врати во форма

Ник Хајдфелд ја врати својата сезона на вистински пат во Силверстоун, смета шефот на БМВ Заубер, Марио Тајзен. 31-годишниот Германец се мачи да остане во линија со својот колега Роберт Кубица цела сезона зголемувајќи ги шпекулациите за неговата иднина во швајцарско-германскиот тим. Но, тој заврши како втор зад Луис Хамилтон без ниту една грешка на дождот во Британија, додека Кубица имаше технички проблеми во квалификациите и потоа излета од трката.

"На тренинзите тој секогаш беше на исто ниво со Кубица. Сега покажа дека повторно се чувствува добро во болидот и дека може да оди до крај. Очекуваме да биде во иста форма и на следната трка. Во Силверстоун повторно бевме брзи откако само 14 дена претходно во Мањи-к*р почнав да се сомневам дека ривалите одат побргу од нас", вели Тајзен.

Самиот Хајдфелд призна дека се чувствува одлично откако ги решил проблемите со квалификациите.

"Викендот беше добар, а посебно квалификациите. Имав доста претекнувања и завршив како втор, но главен проблем досега беа квалификациите. Ова ми е трет подиум во сезоната и сега сум петти во генерален пласман со само 12 поени заостанување, што е одлично ако се земат предвид сите проблеми кои ги имав", вели Хајдфелд.

Мозли: "Секс тајните уништија се!"

Претседателот на ФИА, Макс Мозли, признава дека никогаш нема да може да ја поправи штетата која е нанесена на неговото семејство од шокантните извештаи на Њуз оф д Ворлд за неговиот личен живот. Мозли ова го кажа на судењето за случајот во Лондон и додаде дека "не можам да кажам ниту да направам нешто што ќе го поправи тоа".

"Во еден викенд тие уништија с$. Тешко е да се опише јавното засрамување. Јас го правам ова 45 години и во ниту еден момент немаше да излезе во јавноста да не беа подмитувањата и нелегалните акти. Мојата сопруга Џин и јас сме заедно повеќе од 50 години - се сретнавме како тинејџери. Сега не можам да направам ништо. За моите двајца синови секако дека не постои ништо полошо да го видат тоа во весник како Њуз оф д Ворлд", признава Мозли.

Ф1 ФЛЕШ

Дури и обично националистичкиот шпански печат мораше да го пофали британскиот возач Луис Хамилтон по неговата победа на Британското ГП во Силверстоун. 23-годишниот Хамилтон немаше најдобри односи со шпанските медиуми, посебно поради ривалството со Фернандо Алонсо минатата година и расистичкиот скандал на тестот во Барселона оваа година. Но, сега Диарио Ас ги прогласи Хамилтон и Алонсо "најдобри во хаотичната трка", Ел Паис додаде дека "Хамилтон танцуваше на водата со чиста глава и ги замолчи критичарите", додека Марка на насловот имаше "Хамилтон доминираше на трката, без дилеми".

Такума Сато вели дека одбил понуди надвор од формула 1 по колапсот на Супер Агури тимот во мај. Како и неговиот колега во сега непостоечкиот тим Ентони Дејвидсон, 31-годишниот Сато беше гостин на Британското ГП. Сато има речиси 100 ГП трки со Џордан, БАР и Супер Агури и вели дека целта повторно е Ф1. "Немам ништо конкретно сега, но разговарам со неколку тимови. Одбив некои понуди за Ле Ман и за американските трки бидејќи мојата иднина е во формула 1", смета Сато.

Ферари застанаа во одбрана на светскиот шампион Кими Раиконен откако Финецот турна еден познат фотограф пред стартот на трката во Силверстоун. Французинот Пол-Анри Кахие, кој е Ф1 фотограф речиси 40 години, падна на грб откако Раиконен го турна бидејќи објективот бил преблиску до лицето на Финецот и му газел на опремата. Кахие издаде соопштение во кое вели дека не ја допирал неговата опрема и го нарече Раиконен најнепристојниот Ф1 шампион. "Јас целосно ја сфаќам реакцијата на Кими. Тоа беше малку остро, но мораме да сфатиме што се случуваше", вели портпаролот на Ферари, Лука Колајани.

Луис Хамилтон ги отфрли шпекулациите дека размислува за ангажирање на професионален менаџер кој би ја водел неговата формула 1 кариера. Сегашниот негов менаџер, неговиот татко Ентони Хамилтон во неделата во Силверстоун беше забележан во друштво со познатиот менаџер на Ф1 возачи, Џулијан Џакоби, но синот Хамилтон вели дека нема ништо да се промени. "Не, тоа не е точно. Задоволен сум од работата на мојот татко и на мојот менаџерски тим", изјави Хамилтон.

ФОРМУЛА 1 - ФЕРАРИ И МЕКЛАРЕН СЕ БОРАТ ЗА СЕКОЈА СТОТИНКА ОД СЕКУНДАТА

Време на иновации или за копирање во формула 1?

На последниот ден од тестирањето во Херез, Ферари станаа последниот тим кој го користи ткн. дизајн на "наковално" на покривката на моторот, со Фелипе Маса зад воланот на преуредениот Ф2008 во Шпанија. Тимот од Маранело се надеваше дека ќе се обиде со продолжената покривка за моторот во четвртокот, но на крајот одделија само едно попладне за споредба на новиот и стариот дизајн.

Овој потег на Ферари доаѓа откако нивните главни ривали Мекларен тестираа со слична покривка пред трката во Хокенхајм, а дизајнот за првпат беше искористен на болидите на Ред Бул, како дело на познатиот Адријан Њуи, а беа прифатени и од БМВ и Рено. Иако покривката не создава надолна сила, со неа има подобар проток на воздухот кон задното крило на болидите.

"Тоа е уред за средување на протокот на воздухот. При висока брзина, над 200 км/ч, не е можно целиот воздух да влезе во моторот, така што тој излегува од страната на покривката. Затоа ги гледаме овие експерименти", вели Гери Андерсон, поранешниот технички гуру на Џордан и Стјуарт.

Дека во Ферари заканата од Мекларен се сфаќа сериозно, покажуваат и изјавите на Кими Раиконен, кој предходно изјавуваше дека е збунет од недостатокот на форма на тимот во Хокенхајм, но сега вели дека се е решено.

"Обидовме толку многу работи и сега ги сфаќаме работите подобро. Болидот е подобар од вчера, но не знаеме како ќе биде на следната трка. Што беше погрешно во Хокенхајм? Не бевме брзи и моравме да најдеме решение за следната трка. Не водиме во генерален пласман, но тоа е само една трка. Мекларен беа силни последните две трки, така што мораме да го средиме болидот и да победуваме. Има уште многу време", вели Финецот.

МЕКЛАРЕН СО "РОГОВИ" НА НОСОТ

Мекларен од друга страна размислуваат за радикална промена на нивниот болид пред Унгарското ГП, преку новиот "рог" на носот на болидот, кој го тестираа во Херез. Во Мекларен се сигурни дека имаат предност пред Скудерија во овој дел од сезоната, но очигледно не сакаат да ја загубат таа предност.

Ткн. "рогови" на носот е иновација на БМВ Заубер, а во последно време ги користат и Хонда Рејсинг. Дека не се работи само за експеримент потврди и генералниот менаџер на Мекларен, Мартин Витмарш.

"Гледаме на неколку можни аеродинамички решенија на последните тестови. Во моментов имаме напорна програма за развој пред летната пауза", вели Витмарш.

ХАМИЛТОН ЌЕ ВНИМАВА НА ЦРВЕНИТЕ БОЛИДИ

Луис Хамилтон пред Унгарското ГП следната недела влегува со две победи по ред во Британија и Германија, но вели дека се уште смета на заканата на Ферари.

"Не сакам да правам некои предвидувања. Да, бевме силни последните две трки, но само две трки предходно имавме големи проблеми, така што е невозможно да се прогнозира. Во моментов болидот е фантастичен и ни треба само мала дополнителна сила", вели Хамилтон.

Британецот исто така смета дека нема ризик дека формула 1 нема да биде на врвот на моторспортот, кога во 2009 година ќе се направат големиот број на ограничувања - како во аеродинамиката, така и кај моторите.

"ГП2 бргу ја пристигнува формула 1 и мораме да останеме побрзи. Секој пат кога има нови регулативи, само одиме побргу. Не е вистина дека Мекларен и Ферари имаат некоја не-фер предност. Сите тимови се блиски. Не се работи за тоа кој има повеќе пари, туку кој ги троши подобро", вели Хамилтон.

Дали Макс Мозли сега оди во офанзива?

Охрабрен со победата пред Врховниот Суд во Лондон, претседателот на ФИА, Макс Мозли сега размислува за нова легална постапка против британскиот таблоид Њуз оф д Ворлд, објавува британскиот Тајмс. Тајмс, кој исто како Њуз оф д Ворлд е во сопственост на Њуз Интернешнл, компанијата на магнатот Руперт Мурок, тврди дека Мозли ќе бара нов случај.

Првата победа со која Њуз оф д Ворлд треба да плати 60.000 фунти, беше базирана на нарушување на приватноста, а следната ќе се фоксуира на лажните тврдења дека неговиот "состанок" со петте проститутки оваа година беше "болна наци-оргија".

Иако официјално Њуз оф д Ворлд треба да плати 60.000 фунти, сумата вистински достигнува вредност од 1 милион фунти. Њуз оф д Ворлд ќе треба да платат 450.000 фунти за легалната одбрана на Мозли, и 400.000 фунти на својата одбрана.

Дека Мозли има добри шанси и во вториот случај, добро се гледа од тоа што жената која ги продаде правата за вклученост во оргијата, ткн. Жена Е инсистира дека не се работело за нацистичка забава.

"Парите не се важни. Бев глупава, наивна и сега се каам. Никогаш не кажав дека се работи за нацистичка оргија, но тие поставија притисок на мене", вели Жената Е.

Ф1 ФЛЕШ

Себастиен Буеми вели дека може да направи деби во формула 1 со тимот на Торо Росо веќе во 2009. 19-годишниот Швајцарец, кој настапува во ГП2 серијата и е тест-возач на Ред Бул, вели дека скоро сигурно Себастијан Фетел ќе оди во Ред Бул, со што ќе има празно место во Торо Росо. "За мене главната цел е да ја завршам добро ГП2 сезоната, но вистинската цел се подразбира - место во Торо Росо во 2009. Ако Ред Бул создава јуниорски тим, тие не го прават тоа само за забава. Сакаат возачи со кои ќе успеат во формула 1", вели Буеми.

Основачот и поранешен шеф на Спајкер, Виктор Милер е казнет со 150.000$ поради "инсајдерско" тргување со акции. Холандската финансиска полиција АФМ одлучи фека Милер давал информации за Спајкер (тимот кој го купи Виџај Малја и стана Форс Индија) на една банка, советувајќи ги да не купуваат акции од тимот.

ФИА ќе изврши детална инспекција на моторот на Мерцедес-Бенц кој беше во болидот на Луис Хамилтон на Германското ГП во Хокенхајм. Иако ова е прва ваква инспекција, од ФИА велат дека се работи за рутинска проверка на правилото на еден мотор за две трки и "замрзнувањето" на развојот на технологијата на моторите. Инспекцијата ќе се изврши пред Унгарското ГП следната недела.

Хеики Ковалаинен вели дека не е исфрустриран од тоа што се уште нема формула 1 победа. 26-годишниот Финец имаше доста проблеми со Мекларен оваа година по солидното деби за Рено во 2007, и нема победа за разлика од четирите победи на колегата Луис Хамилтон. Покрај тоа, тој на Германското ГП го пушти Хамилтон да го помине за четвртото место. "Морам да го пронајдам мојот начин, и тоа ќе се случи наскоро. Треба да ги искористам можностите, но ако треба да чекам до 96. трка за прва победа, како Мика Хакинен, тогаш подготвен сум за тоа", вели Финецот.

Шансите на Џенсон Батон да стане светски шампион не постојат, вели поранешниот британски возач Дерек Дејли. Според Дејли, кој се натпреваруваше во 80-тите, кариерата на Батон стагнира во Хонда и сега на 28 години е предоцна да мисли за титула. "Тимот не успеа да му даде вистински болид. Џенсон го загуби чувството кое го гледаме кај Хамилтон и Кубица и понекогаш тоа не може да се врати", вели 53-годишниот Дејли.

ФОРМУЛА 1 - ДАЛИ ПОВТОРНО ВО ИГРА ВЛЕГУВА "ВИСОКАТА ПОЛИТИКА" ВО ФОРМУЛА 1

Тимовите со нова "унија", Мозли со свои планови

На состанокот во седиштето на Ферари во Маранело десетте формула 1 тимови се согласија да воспостават нова организација, Асоцијација на Формула 1 тимови (ФОТА). Во соопштение издадено од Ферари се вели дека состанокот на кој присуствувале и Берни Еклстоун и Доналд Мекензи од ЦВЦ, носителите на комерцијалните права, имало "екстремно конструктивна атмосфера).

"Тимовите едногласно се согласија да се формула ФОТА и да се работи со регулаторите во ФИА и со комерцијалните носители во ФОМ за условите кои треба да ги создадеме за да имаме силен и динамичен спорт", се вели во соопштението.

Според портпаролот на Ферари нема одлука кој ќе ја води асоцијацијата. Тимовите се уште немаат нов Конкорд договор, кој претставува комерцијален документ кој треба да биде потпишан од ФИА, ФОМ и тимовите во милијардерскиот спорт.

На состанокот претседаваше претседателот на Ферари, Лука Ди Монтеѕемоло, а на него беа и шефовите на Мекларен Рон Денис и Мартин Витмарш со што се гледа новиот дух во спортот. Ферари и Мекларен беа вклучени во шпиунскиот скандал минатата година, кој заврши со казна од 100 милиони $ и одземање на титулата во конструктори за Мекларен.

Помеѓу шефовите во Маранело беше и Флавио Бриаторе, шефот на Рено, кој претходно изјави дека на формула 1 & недостасува работа од претседателот на ФИА, Макс Мозли, кој беше преокупиран со секс-скандалот.

"Неговото отсуство се чувствува како немање на проект за формула 1. Тимовите се чувствуваат напуштени", вели Бриаторе.

МОЗЛИ ВЕЛИ ДЕКА Е ПОДГОТВЕН ЗА РАБОТА

Мозли од друга страна вели дека сега фокусот се враќа на спортот. Тој е под притисок и од носителите на комерцијалните права ЦВЦ, кои според шпекулациите дури размислуваат да ги продадат своите 75% акции. Но, самиот Мозли има право да стави вето на оваа продажба.

"Според тоа што го слушнав, ЦВЦ не брзаат да ги продадат своите акции во спортот. Не се откажувам од своето вето бидејќи правата може да ги купи некој што ќе сака да кажува што ќе се случува на секоја трка. Во моментов нема никаков проблем меѓу мене и Берни", вели Мозли.

По неговата победа во судскиот случај против Њуз оф д Ворлд, Мозли вели дека планот е да се повлече од позицијата на крајот на мандатот.

"Не сакам повторно да се кандидирам во 2009 бидејќи повеќе не сакам да работам секој ден. Не се чувствувам старо, но има и други работи во животот", вели 68-годишниот Мозли.

Ф1 ФЛЕШ

Германската компанија за дизајн на алати Формтех, која веќе вклучена во формула 1, оваа недела ги купи деловите и алатките на непостоечкиот Супер Агури тим. Формтех вели дека базата на тимот кој возеше со помош на Хонда, а се наоѓа во Лифилд, Британија, ќе биде искористена за отворање на прва компанија во оваа земја. "Се надеваме на бизнис соработка со сите области на моторспортот, вклучувајќи го и производството на делови за формула 1 тимови. Ќе вработиме дел од поранешниот тим на Супер Агури", вели директорот на Формтех, Франц Хилмер.

Двајца поранешни ривали на неговиот татко не се сигурни дека Нелсон Пике направил доволно во својата деби сезона за да остане во спортот. Бразилскиот ас стигна до својот прв подиум во Хокенхајм, но Австралиецот Алан Џонс, шампионот од 1980 година и Британецот Дерек Ворвик не се убедени во неговите квалитети. "Ако се спореди со успесите на возачите како Раиконен, Маса, Кубица, Алонсо или Хамилтон, Пике направи премногу малку", вели Ворвик. Од друга страна Џонс, кој во 1980 ја освои титулата со 13 поени предност пред Пике Сениор исто така не е импресиониран. "Во првата сезона на таткото Пике во 1979, тој како колега го имаше Ники Лауда, двократен шампион и го држеше под контрола", објаснува Џонс.

Топол и најверојатно сув викенд ја очекува формула 1 на Унгарското ГП во Будимпешта. Локалните метеоролози предвидоа влажен четврток пред првите тренинзи, но во петок ќе биде сончево и суво со температури од околу 30 степени. Шансите за дожд во текот на трката се од 5 до 10 проценти.

ФОРМУЛА 1 - ВО ХУНГАРОРИНГ СКУДЕРИЈА ПОКАЖА ДЕКА НЕ СЕ ОТКАЖУВА ТАКА ЛЕСНО

Враќањето на Ферари не ги плаши Мекларен

Шефот на Мекларен, Рон Денис вели дека не е загрижен од враќањето на формата на Ферари на Унгарското ГП, и покрај тоа што Фелипе Маса беше многу блиску до победа. Маса беше на три круга до импресивен триумф откако ги помина двајцата возачи на Мекларен на стартот, но му откажа моторот, предавајќи му ја победата на Хеики Ковалаинен во Мекларен.

"Не мислам дека Ферари беа посебно добри во Унгарија. Маса имаше добра трка, но Кими Раиконен не беше доволно силен. Исходот на трката се реши на првата кривина, но ние тогаш ја сменивме стратегијата за гориво, за да застанеме по него и да го поминеме при второто влегување. Дупнатата гума на Луис го спречи да донесе победа", вели Денис.

Брзината на Маса во Унгарија сепак покажа дека битката за приматот во Ф1 помеѓу Ферари и Мекларен не е завршена.

"Самодовербата е слабост, така што ќе одиме трка по трка. Не мислам дека некој се сомнева дека ова ќе биде тесна трка помеѓу нас и Ферари. Задоволен сум од формата", вели Денис.

ЛУИС ПОПРЕТПАЗЛИВ

Неговиот возач Луис Хамилтон пак го предупреди тимот дека треба да очекуваат силен противник во Ферари кога Ф1 ќе се врати на програмата на крајот на август. Ферари беа "уништени" од Хамилтон на дожд во Британија и Германија, но во Унгарија сликата беше поинаква.

"Тие беа силни, тоа е сигурно. Да останевме на првите места од стартот ќе беше поинаку, но во Унгарија се покажа дека имаат силен болид. Не направив некои грешки, но се случи проблемот со гумата", вели Хамилтон.

КИМИ САКА ДА ГИ РЕШИ ПРОБЛЕМИТЕ НА КВАЛИФИКАЦИИТЕ

Кими Раиконен пак вели дека мора да биде далеку подобар на квалификациите ако сака да има реална шанса да ја одбрани светската титула. Финецот нема победа во последните седум трки и во Унгарија и Германија не можеше да ја достигне брзината на колегата Маса. Раиконен двете трки ги стартуваше од шестата позиција.

"Не можам да демантирам дека на последните трки нешто не одеше како што треба. Секојпат се случуваше нешто чудно и не успевавме да го најдеме вистинскиот сет-ап. Тој проблем мора да се реши пред Валенсија. Квалификациите беа одлучувачки во Будимпешта за мене. Во вториот обид во последните квалификации не можев да го заддржам болидот на патека и тоа беше моја вина. Не можам да очекувам да ја освојам титулата ако стартувам од шестото место. Дури иако подоцна си една секунда побрз од тие пред тебе, не можеш да ги претекнеш. Но, ситуацијата во шампионатот не е толку лоша, иако во Унгарија се беше разочарувачко освен резултатот", оценува Раиконен.

Алонсо не очекува голем скок од Рено во 2009

Фернандо Алонсо верува дека Рено тешко можат да ги достигнат врвните тимови следната сезона и покрај новите регулативи кои ќе се воведат.

"Искрено мислам дека тоа е тешко, бидејќи иако ќе има комплетно нови правила, никогаш не сум видел болид кој е на дното една година, а следната се бори за победи. Затоа во Рено мора да се оди чекор по чекор. Тешко е да се намали разликата, дали се работи за аеродинамиката, моторот или гумите. Кој и да е проблемот мора да се работи напорно. Ќе биде многу тешко да се направи подобар болид од тој на ривалите", вели Алонсо.

Рено, светски шампиони во 2005 и 2006 со Алонсо, не успеаја да направат ништо позначајно оваа година и имаат само еден подиум во 11 трки. Тие се 80 поени зад лидерите Ферари, а слабата форма ги зголеми шпекулациите дека Алонсо ќе си замине од тимот, со Хонда како најверојатна дестинација во 2009.

"Од Хонда кажаа многу убави работи за мене и го ценам тоа. Но, засега јас сум фокусиран на оваа сезона. Нема да се предадам предвреме. Во секој случај да останев во Мекларен ќе беше полошо. Немаше да добијам шанса да се борам за титулата, ниту да имам добар резултат со тој тим", вели Алонсо.

Ф1 ФЛЕШ

Поранешниот светски шампион Дејмон Хил пред Унгарското ГП веруваше дека неговиот британски сонародник Луис Хамилтон ќе биде шампион ова сезона, но откако го виде Унгарското ГП, тој вели дека би се обложил на Кими Раиконен. "Да ме прашавте пред неделата на кого би се обложил, секако би кажал на Луис. Но, сега не го сакам тоа. Би рекол дека Ферари изгледаат доста силно и затоа облогот оди на Раиконен", вели Хил.

24-годишниот Бруно Сена повторно се поврзува со трансфер во формула 1, откако не само што е внук на трикратниот легендарен шампион Аиртон Сена, туку е и се поимпресивен во ГП2 серијата. Шпекулациите сега велат дека бразилската нафтна компанија Петробрас, која е спонзор на Вилијамс, би сакала да му помогне на Сена да влезе во Ф1. Слободно место во Ф1 може да има во Хонда, Вилијамс, но и БМВ Заубер и Тојота. "Ако добар тим ми понуди место на тест-возач за една година и потоа место во тимот, секако дека би прифатил. Но, во моментов би преферирал место на возач", вели Сена Јуниор.

Шефот на БМВ Заубер, Марио Тајзен призна дека неговите двајца возачи "не беа присутни" на трката во Унгарија. По одличниот старт на сезоната, Ник Хајдфелд беше катастрофален од квалификациите во Унгарија, а Роберт Кубица освои еден поен само бидејќи Фелипе Маса се откажа три круга пред крајот. "Унгарија беше трка во која како да не бевме присутни. Во ниту еден момент нашите возачи не ги поставија очекуваните времиња", изјави бесниот Тајзен.

Тимот на Мекларен нема да се трка со ткн. "наковално" покривка на моторот барем во следните неколку трки, вели генералниот менаџер Мартин Витмарш. Повеќе тимови решија да го користат "наковалното" во Унгарија, но Мекларен утврдија дека не се подобруваат перформансите на болидот. "Ја тестиравме покривката за моторот пред трката во Германија и со неа требаше да се зголеми чувствителноста на болидот, но таа предност донесе други проблеми. Мислиме дека нашиот болид е доволно добар и без овој експеримент", вели Витмарш.