ИЗБОРИ 2009 - генерална дискусија

Претседателските кандидати, со отворање на популарните блогови, смислија нов начин да се доближат до гласачите. Интернет стана место каде што кандидатите и нивните приврзаници, но и противници, ги искажуваат своите ставови, посебно со помладите. Веќе неколку недели кандидатот на ВМРО-ДПМНЕ, Ѓорѓе Иванов, преку својот блог со гласачите комуницира на интерактивен начин. На блогот се поставени сите активности што тој ги имал досега, можност за директен контакт со граѓаните, како и неговата биографија. На неговиот блог се наоѓаат линкови до сервисот „Ју тјуб“, од каде што може да се видат сите негови активности досега. А токму предизборните активности на кандидатите изминатиов период беа предмет на интерес на институциите задолжени да ги следат нивните настапи по медиумите. Советот за радиодифузија ги оквалификува како предвреме почната кампања, спротивно од одредбите во Изборниот законик. Кандидатите на ВМРО-ДПМНЕ и на СДСМ за претседател беа најактивни во борбата да ги придобијат гласовите од граѓаните. Иванов досега се сретна со поглаварите на верските заедници, стопанската комора, организации на лица со хендикеп, амбасадорите на земјите-членки на ЕУ, како и со здруженија на децата-бегалци. Кандидатот на СДСМ, Љубомир Фрчкоски, пак, интензивно се обидуваше да биде со луѓето за кои смета дека би можеле да гласаат за него. Фрчкоски ги посети производителите на млеко и жителите на Миладиновци кои протестираа поради загадувањето од „Окта“, а завчера беше и меѓу раселените лица од воениот конфликт. Претендентите за претседател велат дека средбите со граѓаните во никој случај не може да се сметаат за кампања, туку за запознавање со гласачите. Тие и деновиве беа особено активни. Бошковски, Иванов и Фрчкоски беа меѓу лозарите, а Ружин кај стечајците во Битола. И независниот кандидат Љубе Бошковски на интернет- форумите има свој клуб на обожаватели кои секојдневно испраќаат пораки за негова поддршка. Во последно време на интернет-страниците на дневните весници и на телевизиите забележителни се организирани групи граѓани кои оставаат пораки за поддршка или критика за кандидатите за претседател. Станува збор за организирана група на т.н дигитални лепачи на плакати, како што партиите ги нарекуваат своите активисти. Повеќето од пораките се праќани приближно во исто време и се со слична содржина, и најчесто содржат навредливи пораки за противничкиот табор. Од партиите велат дека сигурно знаат дека во спротивниот табор има луѓе задолжени да го креираат јавното мислење низ медиумите. По правило, за своите активисти на интернет не сакаат да зборуваат.