МАКЕДОНИЈА во НАТО: кога, како, зошто...?

Помошникот-секретар за Европа во американскиот Стејт департмент, Даниел Фрид смета дека ако во Македонија постои политичка волја, лесно и брзо може да се најде решение за името. Фрид во ексклузивното интервју што го емитуваше националната телевизија А1 вели дека членството во НАТО, значи дека САД, најсилната земја на светот, ќе се заложи да ја брани Македонија. Господине Фрид, ги завршивте средбите со македонскиот претседател Бранко Црвенковски и со премиерот Никола Груевски. Какви пораки им пренесовте од американската администрација?
Пораката беше дека Америка е пријател на Македонија и сакаме да ја видиме Македонија во нашиот заеднички систем на вредности. Во НАТО постои голема отвореност кон Македонија, но потребно ни е решение за прашањето со името. Навистина ни е потребно. Мојата порака беше: Ајде да се обидеме да го најдеме решението. Централна тема на Вашите разговори во Скопје претпоставувам беше проблемот со името. Гледате ли можност во наредниве 30 дена до самитот на НАТО да се реши проблемот и Македонија да добие покана за влез во НАТО?
Да, ако има доволно политичко водство и политичка волја, мислам дека може. Членството во НАТО, а за тоа станува збор, значи дека САД, најсилната земја на светот, ќе се заложат да ја бранат Македонија. Тоа значи дека другите големи европски нации, Велика Британија, Германија, Франција, Италија, Шпанија... и сите ваши соседи ќе гарантираат дека ви се сојузници. Тоа е големо достигнување и се надевам дека Македонија и Грција ќе го надминат овој проблем. Можно е и да не се постигне успех. Но, размислете за тоа. Многу сте блиску. Бев во Министерството на НАТО со секретарката Рајс и во кабинетот имаше силно чувство за Македонија. Со оваа шанса, кога сте толку блиску, силно посакувам лидерите да станат и да кажат: Ајде да го решиме овој проблем и да ја донесеме нашата земја во НАТО и во Европа. Имате ли впечаток дека македонската Влада е подготвена понатаму да направи нови компромиси и да прифати име што би било прифатливо и за Грција и со тоа да се надмине проблемот?
Мислам дека претседателот и премиерот се големи патриоти и лидери, кои сакаат да ја видат својата земја успешна. Не можам да зборувам за нив, но тие имаат лидерски капацитет да го сторат тоа. Но, јас не сум овде да зборувам за деталите. Господине Фрид, во Скопје пристигнавте од Косово. Дали таму стана збор за проблемот со границата меѓу Косово и Македонија, проблем што во последните неколку недели повторно ескалираше? Сметате ли дека се работи за реален проблем којшто може да предизвика нови неволји во регионот?
Не мислам дека е вистински проблем. Не слушнав ни еден шепот, ниту навестување за претензии од Косово или лутина кон Македонија. Немаше такво нешто. Тие сакаат да бидат добри соседи. Сакаат да бидат сила за стабилноста во регионот. Очекуваат добрососедски односи со вас и јас не слушнав ни збор на приговор. Тоа исто така е добар знак. Дали останувате оптимист дека, сепак, Балканот ќе остане мирен?
Секако. Кога е тоа во прашање, секако. Македонија никогаш немала толку добра шанса. Се надевам дека ќе го надмине проблемот со Грција и ќе работи со Грција во партнерство за иднината. Според мене, надвор од прашањето за името, Грција многу сака да соработува пријателски со Македонија. Доколку ја надминеме ова тешка препрека, знам колку е тешко, но ако ја надминеме, ситуацијата е многу подобра. Нема да има никаква пречка меѓу Македонија и нејзината европска иднина. Доколку го решиме ова прашање. САД сакаат да помогнат. Но еднаш за секогаш треба да се реши спорот со името.