Деца

КОГА ДЕЦАТА НЕ САКААТ ДА СПИЈАТ...

За многу деца спиењето е губиток на време и тие се би направиле само за да не легнат во креветот. Навиките при заспивањето се градат од раѓањето, тврдат психолозите, па така, на пример, децата кои се навикнати да ги лулате и држите за рака тешко ќе го напуштат тој ритуал дури и до училишната возраст.
Педијатрите советуваат децата да ги научите сами да се заспиваат, а кога ќе го усвојат тоа како модел на однесување нема повеќе да има проблеми. Додека се бебиња, децата главно имаат исти навики и ритуали и заспиваат онака како што сте ги научиле. Може да се случи нешто да ги мачи, или, пак, интензивните дневни случувања малку да им го нарушат сонот, но тоа не би требало да биде секојдневно.
Децата растат и се менуваат, па лесно може да се случи детето кое само спиело одеднаш да почне да го бара присуството на родителите, да измислува разни барања и желби, да бара да мочка, јаде, плаче и кенка...
Статистиките покажуваат дека дури 60 отсто деца помлади од шест години неколку пати неделно се обидуваат да го ескивираат одењето во кревет.

КАКО ДА РЕАГИРАТЕ ВО ТАКВИ СИТУАЦИИ?

Иако тоа им се случува речиси на сите родители, веројатно повремено ги губите нервите и не знаете што да правите. Педијатрите советуваат да ја контролирате нервозата, бидејќи вашето викање, карање и казните уште повеќе ќе го разбеснат измореното и сонливо дете.
Обидете се да го сместите детето во кревет секоја вечер во исто време, а педијатрите велат дека времето поминато во капење, миење заби, средување и заспивање не треба да биде подолго од 30-45 минути.
Никогаш не велете му на детето, на пример, дека нема да му ја раскажете омилената приказна затоа што имате други обврски. Тоа е нивно време со вас и ако сте создале навика секоја вечер да бидете со него пред да заспие, не прескокнувајте го тој ритуал. Со малку повозрасното дете можете да се договорите што може да прави пред спиење (на пример, да изгледа еден цртан филм или да му прочитате дел од некоја негова омилена книга). И држете се до тоа, двете страни мора да ги почитуваат „правилата“.
Децата не би требало да спијат во потполна тишина и мрак, бидејќи на тој начин ќе се будат на секој шум. Обрнете внимание собата да биде проветрена, температурата да биде околу 20 степени, на детето да не му е премногу топло, но ниту ладно. Ако децата сакаат, можете да им пуштите некоја бавна, тивка музика, но ништо премногу гласно или интезивно. Игрите пред спиење не треба да бидат премногу активни, а вечерата треба да биде барем два часа пред спиење.
Кога децата ќе дојдат на возраст кога ќе можете да се договарате, воспоставете систем на награди, па секој пат кога одат на спиење без негодување и расправање, на пример, запишете им ѕвездичка во календарче, а тогаш за викенд наградете ги со одење во кино, театар, шетање во омилена продавница играчки, во слаткарница...