BMW

BMW X6 е најновиот модел во гамата на германскиот производител и за разлика од многу други модели, нема претходник. Неговата концепција е новитет во светот на автомобилизмот – уникатниот спој на спортско купе и чистокрвен SUV го прави овој автомобил единствен во светот.

За прв пат, еден производител ќе понуди автомобил, кој ќе ги задоволи сите спортски настроени возачи, било дали се работи за возење по асфалт или надвор од него.

Новата BMW X6 премиерно за нашиот пазар беше претставена на 18.06.2008 во летниот клуб Hard Rock, на презентација на која посетителите, преку автентичниот аудио – визуелен перформанс, можеа од блиску да го доживеат новиот автомобил. На презентацијата беа присутни управителот на МАККАР, г-дин Мирослав Вранешевиќ и претставникот на BMW, г-дин Синиша Кецман.

Иновативниот автомобил, припаѓа на една нова класа на возила, која од BMW ја нарекоа SAC, односно Sports Activity Coupe. Дизајнот не е воопшто карактеристичен – се работи за купе со пет врати, по теркот на Mercedes CLS, но подигнато од земјата, во стилот на класичниот брат Х5. Спојот е навистина интересен и мора да се признае предизвика многу воздишки кај присутните на презентацијата кај нас.

Но, за разлика од многуте други иновативни решенија, BMW успеа да го задржи својот дизајнерски потпис. Х6, од каде и да се погледне, кажува од каде потекнува. Гледан од напред, дури и тешко е да се разграничи со другите модели од компанијата. Најинтересен е задниот дел, кој е изведен во стил на спортско купе, но, за разлика од таквите автомобили е подигнат од земјата и изгледа напрчено и одважно.

За разлика од надворешноста, внатрешноста е изведена како и кај другите модели на баварската компанија, поточно како во Х5, модел со кој Х6 ги дели корените. Предната табла е целосно преземена од Х5, па седењето напред нема многу да се разликува од тоа на постариот брат. Сепак, вториот ред на седишта ќе има видливо помалку простор за главата на патниците, поради дизајнот на кровот, кој паѓа во задниот дел. Но, Х6 не е ни конструиран за простор и функционалност нели?

Материјалите кои се употребени во внатрешноста се на уште повисоко ниво од тие на Х5, или на серијата 5 на пример, што јасно укажува на тоа дека овој уникат е наменет за одбрани купувачи, кои знаат што сакаат. За завршната обработка не треба да се трошат зборови – едноставно таа е првокласна.

Моторизацијата ќе ја сочинуваат четири моќни агрегати – два дизели и два бензинци. Сите мотори овозможуваат единствено спортско доживување, сила во секој режим на работа, но и првокласна економичност. Секој од нив е опремен со еден или два турбо полначи, со чија помош е извлечена максимална сила до 407 КС кај најголемиот V8 мотор. Податоците за моторите можете да ги видите во табелата подолу.

Шасијата на Х6 е преземена исто така од Х5, но е дополнително преработена, за да повеќе им одговара на возачите кои сакаат поголема забава при возењето. Агилноста на автомобилот поставува нов репер во класата на SUV-та (и покрај тоа што не припаѓа во неа), а погонот на сите четири тркала овозможува лепење за подлогата, како во ниту еден друг автомобил.

За тие кои ќе претераат, на помош доаѓаат системите за стабилност, кои ги има многу на број, се со цел побезбедно и поудобно возење. За возењето по терен пак вграден е диференцијал, кој не дозволува пролизгување на тркалата. Едноставно, Х6 е автомобил кој без проблем ќе го прифати секој предизвик.

Уникатните можности и единствениот изглед, го носат овој автомобил во една нова димензија, каде владеат луксузот, перформансите и престижот – накусо кажано BMW X6 е драгоцениот камен на баварската компанија.