Закон за патриотски фискални каси

   Надградбата на „патриотскиот“ софтвер на фискалните апарати, која чинеше од 50 до 200 евра, си ја платија трговците и оние што се занимаваат со услужни дејности. Патриотска фискална мораа да имаат и бербери, фризери, психолози, стоматолози иако нивната услуга е исклучиво домашна. Откако граѓанин од Охрид поднесе иницијатива за оспорување на владината одлука, правни експерти предупредија дека ако таа падне на Уставен суд, Владата ќе мора да им плати отштета на трговците. Владините претставници тогаш изјавија дека ќе ги сносат евентуалните последици што ќе произлезат од судска одлука. Управата за јавни приходи никогаш не кажа колку трговци ги надградиле фискалните каси со „патриотски“ софтвер, ниту излезе со бројка колку од нив се казнети за непочитување на законската обврска.

Владата мора да ги врати парите

Ако Владата сама не им ги врати парите на сопствениците на „патриотските“ фискални, тие имаат основа да ја тужат и да си ги вратат вложените 50 евра, изјави вчера Борче Давитковски, универзитетски професор по управно право.Тој предупредува дека освен ова, Владата мора да ги сноси и трошоците за бришењето на ознаката „македонски производи“ од софтверот во фискалните каси. Тоа значи дека Министерството за финансии треба да ги плати трошоците и за оваа операција. Според некои пресметки, државата за отстранување на оваа неуставна мерка ќе треба да плаќа по 100 евра за една фискална каса или околу 5,5 милиони евра.