Црни прогнози за иднината на Балканот

Албанците во Македонија многу скоро ќе организираат референдум за политичка и културна автономија на Илирида, тврди Невзат Халили, претседател на движењето за Илирида, во вчерашна изјава за весникот „Лајм“.

- Имаме целосна поддршка од албанскиот народ и затоа нема што повеќе да чекаме. Јас не барам поделба на Македонија, туку внатрешно преуредување. Би ја запрашал само министерката Гордана Јанкуловска каде беа таа и другите како неа кога МАНУ и Љубчо Георгиевски се изјаснија за поделба на Македонија - вели Халили.

Тој тврди дека за референдумот за автономија на Илирида контактирал со сите организации на меѓународната заедница и со странските амбасади.

- Барањето за културна и политичка автономија датира уште од 1992 година. Во тоа време највисоките македонски институции, како што се претседателите на државата, на Владата и на Собранието, потпишаа документ што предвидува Албанците во Македонија да добијат специјален статус. Сите подготовки се поминати и сега ќе почнеме да ја реализираме автономијата за Илирида - вели Халили.

Претседателот за движење за Илирида уште минатата недела најави реализација на идејата за Илирида и со дваесетина делегати во Тетово формира собрание на Илирида.Тој изјави дека неуспешниот референдум во 1992 година бил прва етапа за политичка и културна автономија на Албанците во Македонија и дека сега следувала втората и финална фаза. Тој најави дека по автономијата за Илирида, новото име на државата ќе било Република Македонија Илирида и во Уставот ќе имало два конститутивни народа - албанскиот и македонскиот.

Халили најавите за реализација на идејата за Илирида јавно ги промовираше пред седум дена, а властите сè уште не презеле никакви дејства против него и покрај тоа што неговите изјави се директно насочени против суверенитетот, интегритетот и уставниот поредок на државава.

Гордана Јанкуловска, министерка на МВР, завчера изјави дека Јавното обвинителство го разгледувало случајот и дека лицата што ја промовирале идејата за Илирида ќе биле повикани на разговор.

Љупчо Симоноски, тетовски јавен обвинител, вчера изјави дека обвинителството сè уште собирало информации.

- Работиме врз основа на допрен глас. Ги собираме информациите и бараме нови. Координирани сме со другите државни органи. Потоа ќе видиме што ќе се преземе понатаму - изјави Симоноски.