Свечено пуштена во употреба Северната трибина

Арената „Филип Втори“ прогласена за најубав стадион на Балканот! 

Националната арена „Филип Втори“ доби големо признание од најпрестижниот европски спортски магазин „Гуерин спортиво“, кој во својот избор на стоте најубави стадиони на светот, ја прогласи за најубав стадион на Балканот.

Популарниот „Градски“, според списанието, најубаво сјае во Југоисточна Европа, откако во изминатите три години доби комплетно нов лик и заличи на вистински репрезентативен фудбалски и спортски храм во земјава и во регионот. За своето архитектонско решение според магазинот, „Филип Втори“ е на 70. место на светската листа на најубави фудбалски објекти.

„Нема никаква врска со оригиналната верзија, особено сега, откако реновирањето и доградбата се завршени. Дури и во мали земји може да добиете луксуз. Во вечерните часови, кога ќе се запали, „Филип Втори“ е најзабележливо здание во Скопје“, пишува во објаснувањето на магазинот за нашата национална арена.

„Филип Втори“ во рангирањето остави дел од попознатите стадиони зад себе, како домовите на европските бивши шампиони, „Велодром“ (Олимпик Марсеј), „Жозе Алваладе“ (Бенфика) и белградска „Маракана“ (Црвена Звезда), потоа „Луј втори“ во Монте Карло, каде што традиционално се игра Суперкупот на Европа, како и најголемиот и најимпозантен светски стадион – во Пјонгјанг, кој има капацитет од 150.000 гледачи.

Два турски стадиони се најдоа на рангирањето – иако поголем дел од Турција е на друг континент, географски таа се смета за балканска држава. Но, со оглед дека и двата стадиони се сместени во азискиот дел од Турција, му даваат највисоко место на „Филип Втори“ во нашиот регион. Стадионот во Кајзери, „Кадир хас сити“ е на 38. место, а „Шукру Сарачоглу“ на Фенербахче е 49-ти. Изненадувачки е фактот што на рангирањето го нема сплитски „Пољуд“, домот на Хајдук, кој важеше за најубав југословенски стадион низ годините.

Арената Филип Втори моментно го реконструира теренот, со што ќе заврши втората фаза од комплетната реконструкција, која почна некаде пред крајот на 2007 година со изградбата на северната трибина. По спектаклот за 100-годишнината од фудбалот во Македонија против Шпанија на 12 август 2009 година, кога беше и пуштена во употреба северната трибина, започна изградбата на страничните трибини на Арената. Комплетниот лик на Арената беше заокружен и пуштен во употреба на Велигден 2011 година, а првиот меч се одигра пред преполни трибини на 4 јуни лани со мечот Македонија – Република Ирска во рамките од квалификациите за Евро 2012. Крајната трета фаза е осветлувањето на стадионот и застаклувањето однадвор, со што Филип Втори ќе го потврди признанието на Гуерин спортиво дека е еден од најубавите стадиони во Југоисточна Европа.

Италијанскиот магазин, кој на 4 јануари годинава прослави сто години постоење, нема некој посебен критериум за рангирањето на стадионите во својот избор, туку во објаснувањето стои дека секој стадион е рангиран според некој посебен критериум, и тоа: според спомените и историјата, архитектурата, привлечноста или според прифатливоста за удобноста од навивачите… На листата има и стадиони што веќе не постојат, односно се урнати, но носталгијата и емоциите од минатото се неповратни, па и затоа се нашле во рангирањето, пред сè како стариот Вембли, Олимпискиот стадион во Минхен…

Најубав светски стадион е лондонскиот „Вембли“, чија вредност беше над една милијарда евра, а во топ десетте се и Бомбоњера на Бока јуниорс, Ацтека во Мексико, стариот Вембли, Маракана во Рио де Жанеиро, стадионот на Далас Каубојс, Монументал во Буенос Аирес, Сан Сиро во Милано, Ноу Камп во Барселона и Алијанц Арена во Минхен

http://www.mkd.mk/12810/udarna-vest/arenata-filip-vtori-proglasena-za-najubav-stadion-na-balkanot/