Ваши предлози до владата

Иако Владата нема вистински работодавец, туку одговара пред Собранието, нејзина морална обврска е и во изборна кампања повеќе да се грижи за државните отколку за партиските работи, оценуваат експертите

Од Кабинетот на премиерот тврдат дека Груевски како премиер постојано има средби со граѓаните, но, немаа објаснување зошто во вчерашната најава за неговата агенда тој беше посочен само како претседател на ВМРО-ДПМНЕ

Премиерот Никола Груевски и речиси сите министри во Владата наместо на своето работно место, изминативе денови водеа изборна кампања, лобирајќи за своите кандидати за претседател и за градоначалници. Иако станува збор за претседателски и за локални избори, кои немаат никаква врска со парламентарните, целата Влада активно се вклучи во изборите и не штедеше ниту време ниту зборови за да ги фали своите кандидати. Експертите по трудово право велат дека иако Владата нема вистински работодавец, туку одговара пред Собранието, морална обврска на извршната власт е и во изборна кампања повеќе да се грижи за државните отколку за партиските работи.

СРЕДБИ СО ГРАЃАНИТЕ

Груевски вчера од 11.30 до 15 часот имаше средби со граѓани во Крушево, Ресен, Демир Хисар. Во партиското соопштение кое информира за неговите активности тој не беше посочен како премиер, туку како претседател на ВМРО-ДПМНЕ. Потпретседателот на Владата, Зоран Ставревски, среде бел ден одеше по пазари и ги убедуваше граѓаните да гласаат за нивните кандидати. Слична е состојбата и со другите министри, заменик-министри и други функционери во Владата, кои изминативе две недели беа ангажирани во кампањата. Медиумите и јавноста останаа без одговори од Владата, откако портпаролот Шефик Дураку е кандидат за градоначалник на Арачиново. Изминативе неколку недели Дураку не може да се добие за изјава бидејќи не одговара на телефонските повици.

Од Кабинетот на премиерот Груевски вчера демантираа дека неговите активности изминатиов период, се исклучиво партиски и тврдат дека тој како премиер постојано има средби со граѓаните. Но, во Владата немаа објаснување зошто во вчерашната најава за неговата агенда тој беше посочен само како претседател на ВМРО-ДПМНЕ, а не како премиер.  Веројатно е грешка во комуникацијата. Тој на тие средби оди како премиер. Работата на Владата изминатиов период воопшто не е запоставена. Ако до почетокот на изборната кампања, Владата одржувала по една или две седници неделно, сега се случува во неделата да има и по три седници. Работното време на премиерот секој ден трае до полноќ - велат во неговиот Кабинет.

ФЛЕКСИБИЛНО РАБОТНО ВРЕМЕ

Професорот по трудово право Тито Беличанец вели дека за премиерот и министрите не може стриктно да важат одредбите од Законот за работните односи, но тие имаа морална обврска и во услови на изборна кампања да не ги занемаруваат работните обврски заради партиските активности.  Не станува збор за работни односи, премиерот и министрите имаат флексибилно работно време. Тие немаат вистински работодавец, туку одговараат пред пратениците. Но, нивна обврска е да се грижат за состојбата во државата, а тоа тешко може да се постигне ако некој постојано е ангажиран со партиски активности - вели тој.

За Беличанец е спорно што Владата комплетно се вклучила во изборите, иако станува збор за претседателски и локални избори, функции одделени од извршната власт.  Во други земји владите воопшто не се мешаат при локални избори. Тоа е сосема одделено од централната власт - додава тој. Раководителот на секторот за стоматологија во Министерството за здравство, Бранко Милошевски, кој е истакнат функционер и во ВМРО-ДПМНЕ, вели дека деновиве отсуствувал од работа, но само службено.

- Кога некој би отсуствувал заради партиски цели, би требало да земе слободни денови или одмор. Денеска сум на манифестација во Кавадарци за стратегија за намалување на кариесот, а не за партиски цели. Никој пат не сум отсуствувал по таа основа, туку само службено со патен налог. Вчера, предадовме донација во Охрид, а тоа случајно се совпадна со предизборието. Па ние не умираме во предизборието, активностите и тогаш продолжуваат - вели Милошевски. Во Државниот инспекторат за труд велат дека не се надлежни да контролираат отсуства од работа на работниците и државните службеници кај работодавците.

За смртниците други правила

Според Законот за работните односи, секое отсуство од работа мора да се оправда. Ако некој го напушти работното место за лични работи, тие часови му се одбиваат од дневницата. Законот наложува и електронско евидентирање на вработениот на работното место, а за тоа постојат повеќе програми - доаѓање и заминување од работа, евидентирање на паузата, дури и движење од кат на кат. На оној што оди на пауза во време што за тоа не е предвидено, може да му се одбие од дневница.

 (Љ.Б.-Т.П.)