ПРЕГОВОРИ ЗА ИМЕТО - 1

Њујорк, 30 септември (МИА) - Грција под покровителство на ОН преговара со северниот сосед за решение за името, што ќе биде прифатливо за двете страни, кое соседната земја ќе го користи со гордост и во односите со сите, решение што ќе ги направи сите победници.

Ова се наведува во говорот на шефицата на грчката дипломатија Дора Бакојани што пред 64. Генерално собрание на ОН синоќа го прочита амбасадорот на Грција во Светската организација Анастасиос Мицијалис.

Бакојани, која поради здравствени причини не дојде во Њујорк, посочува дека „Грција преговара за решение што ќе го почитува дигнитетот на двете држави и двата народа“.

- Грција со добра волја веќе 15 години учествува во преговорите за прашањето за името на ПЈРМ под покровителство на ОН. За жал досега не  е постигнат позначаен прогрес, иако Грција направи огромен чекор кон компромис. Прифативме употреба на името Македонија, заедно со географска одредница, што ќе ја рефлектира реалноста. Од целиот географски регион Македонија, само дел му припаѓа на нашиот северен сосед. Затоа се поставува прашањето, како може таа земја да го презема ексклузивното право на тоа име, вели Бакојани.

„Однесувањето на властите во Скопје“, како што истакнува, „со инсистирање на ексклузивност врз името, одбивање на географска одредница и анахронична реторика и политика, е спротивно на принципите на добрососедски односи и предизвикува загриженост за тоа кои се вистинските мотиви“.

Обраќањето на грчката министерка за надворешни работи, следува неколку дена по говорот на македонскиот претседател Ѓорге Иванов пред Генералното собрание, во кој истакна дека Македонија е подготвена за решение за името што ќе претставува разумен и фер компромис, кој нема да го повредува националниот, културниот и јазичниот идентитет. Иванов нагласи дека Македонија ќе разговара со Грција исклучиво за она што е содржано во резолуциите на ОН. Ја обвини Атина дека иницирала апсурден спор, оти во разговорите за името настапува од позиција на сила и недобронамерно, дека не ја почитува Привремената спогодба и ја блокира ЕУ и НАТО-интеграцијата на Македонија.