Ако нема леб, нека јадат колачи!

Марија Антоанета Жозефина Јоана фон Хабсбург-Лотринген (гарант ни таа самата не можела да си го запомни сопственото име, па затоа сите ја нарекувале нагалено Мадам Мари Антоанет) е родена на 2 Ноември 1755 и не живеела премногу долго, починала на 16 Октомври 1793 година. Била родена со титулата  надвојвотка на Австрија, и бидејќи се навикнала постојано да биде ословувана со некоја титула, на 14-годишна возраст ја презема титулата Кралица на Франција. Нормално, за да ја добие оваа титула морала да се омажи за Кралот на Франција, почитуваниот господин Луј Август, (Daufin de France) или попознат како Луј 16. За разлика од неговите претходници, Петнаесетката, и уште попознатиот Четиринаесетката (Кралот Сонце), Луј 16 и покрај неговата разгалена жена се обидувал на некој начин да ја реформира монархијата, но за жал не успеал во тоа. Но да се вратам на Мари Антоанет...Таа е потомок на Хабсбурговците и е ќерка на познатата владетелка Марија Тереза од Австрија и Франсоа Први.  И нормално, и во тоа време важела девизата ЗАЕДНО СМЕ ПОСИЛНИ, па затоа мајка и, Марија Тереза, решила да се посвати со Луј 15 и ја дала својата четиринаесетгодишна ќерка да му биде жена на петнаесетгодишниот Луј Август, т.е. Луј 16. (Ех колку напредни биле децата во тоа време.) И нормално, малава била научена на раскошен живот дома, па си ја продолжила традицијата и во Франција, и за жал, и покрај напорите на мажот и, ја довела Франција на работ на егзистенцијата. (Не за џабе рекле старите, мажот со лопата да внесува, а жената со игла да изнесува, пак нема да имаат за јадење.) Така било и во овој случај, и еден ден, кога некој и се пожалил на Кралицата дека народот нема леб да јаде, таа мртва ладна рекла-ПА АКО НЕМААТ ЛЕБ, НЕКА ЈАДАТ КОЛАЧИ!!! Ех, а брашно од каде?!? Но народот нормално е злопамтило, па затоа ја начекале еден ден неспремна, кренале револуција, и на 16 Октомври 1793 година и ја отсекле главата на дигноглавата Кралица Марија Антоанета. И така, нејзиниот живот завршил без да остави рецепт какви колачи Французите треба да спремаат.