Уште долго нема да ни биде јасно, кој вчера во Универзалната сала беше паднат од Марс? Едвај собраната публика, неколкуте залутани пејачи кои мислеа дека имаат хит, или сепак организаторите на МАРС, првиот Македонски радиски фестивал чија кратенка значи Македонска радио селекција.

Водителите кои беа најдобриот дел од повеќе од скромното шоу цело време и се заблагодаруваа на прекрасната публика. А која публика? Неколкуте девојчиња фанови на "Некст тајм", новинарите и пријателите на организаторите. При крајот на месецот, не секој ќе оддели 200 денари по студеното време да се потера до Универзална и да гледа "шоу" кое директно се емитува на ТВ. М2 продукција, на времето кога бираше таленти не сметаше на заработка од продажба на билети. Делеа влезници по училиштата, а талентите си собираа свои другарчиња. Седиштата од партерот беа извадени, децата играа и фрлаа балони, и атмосферата беше барем весела. Тоа на радио "Марсовците" не им текнало да го направат.

Рака на срце, имаше хитови што биле хитови. Но, имаше и пејачи за кои малкуте луѓе се чудеа кои се воопшто, и песни кои беа таму за да ја пополнат "хитовската" програма. За да не ги навредиме изведувачите кои не се виновни што се нашле на сцената вчера, нема да именуваме. Само ќе ги запрашаме организаторите: како се одредува кои песни се хитови, а кои не се? Според одлуката на радио станиците или според тоа кој е пријател, а кој непријател со газдите на телевизијата која го пренесуваше фестивалот?

Каролина по долго време се појави со "Крај", Тони Зен го утепаа од вртење со "Спушти се доле", Слаткар со "ФМ", Калиопи по долго време испеја македонска песна "Мене ми е име", а има и уште песни кои заслужија да се наречат хитови. Најсмешен дел во целиот циркуз е што за наслушана песна од Хрватска избраа песна која е најавна шпица на сапунска серија!

Хрватските глумици фала богу не дојдоа во празната Универзална!   

Организаторите веројатно сакале да направат радиски фестивали како во Србија и во Хрватска. Ама чуле и не дочуле. Гледале и не догледале. Гламур нула, шоу нула, забава нула. Скромна сцена, реклами на ТВ маратонски, а за тоа време никаква забава за гледачите во салата. Како на улица собрани деца, посетителите во салата си довикуваа едни со други, си се распрашуваа за спортските резултати, им довикуваа на водителите и свиркаа.
Луѓето кои стојат зад вториот МАРС, нека се спуштат на земјата. За лошото шоу и празната сала до утре можат да се вадат на спортската среда и турската серија која завбрши пред тие да почнат. За џабе им е.