Кој е Груевски?

Бошкоски:Груевски е стечаен управник на Македонија

Љубе Бошкоски и неговата партија Обединети за Македонија од премиерот Никола Груевски бара да си поднесе оставка и да овозможи формирање експертско-техничка влада, поддржана од сите политички партии. Тој вчера оцени дека Груевски е стечаен управник на Македонија и дека по негова вина државата е во сериозна криза на економски и на политички план. Бошковски соопшти дека ОМ има информации дека излез од катастрофалната состојба и бегство од одговорноста ВМРО-ДПМНЕ гледа во широка коалиција со СДСМ.

- Новата влада нема да биде заложник на фамилијарните интереси на раководствата на ВМРО-ДПМНЕ и на СДСМ. Новата влада ќе треба да го раздвижи македонскиот интелектуален капацитет, да ја внесе Македонија во НАТО, да добие датум за преговори, да го прочисти избирачкиот список и да организира предвремени парламентарни избори - рече Бошкоски на вчерашната прес-конференција. Бошкоски оцени дека Македонија е во сериозна криза, бидејќи четири години немаме датум за преговори со ЕУ, прашање е дали ги исполнуваме критериумите за членство во НАТО, меѓународно сме изолирани, економијата слабее, стануваме презадолжени, граѓаните се се' посиромашни, расте криминалот и корупцијата, а за сето тоа највиновен е премиерот Груевски.

- На економски план, преродбата наместо револуција доживеа крах. Евентуалната реконструкција во Владата ќе биде само шминка. Министрите се убедуваат кој е истрошен, а кој не е, а од нивното владеење најистрошена е Македонија - рече тој. Претседателот на ОМ ја критикуваше и опозициската СДСМ поради ставот дека целата одговорност е кај власта и дека во ваква криза секој треба да го направи најдоброто што може.