Македонците се плашат да ја сменат работата

Само 18 отсто од вработените во земјава активно бараат нова работна средина, за разлика од Колумбијците и Американците, кај кои овој процентот е 55, односно 47 отсто

Малкумина македонски работници се одлучуваат да ја сменат компанијата за која работат, без разлика дали се задоволни од работното место. Само 18 отсто од Македонците (или приближно двајца од десет вработени) активно бараат нова работа, за разлика од Колумбијците и Американците, кај кои овој процентот е 55, односно 47 отсто, т.е. речиси секој втор), покажа меѓународното истражување на компанијата „ГФК кастм рисрч“.

Со истражувањето беа опфатени 30.556 вработени од 29 земји во светот, меѓу кои е и Македонија. Извештајот на ГФК покажува дека компаниите во Македонија имаат многу постабилна средина за да ги задржат вработените од повеќето други земји. Во најповолна ситуација во поглед на задржувањето на вработените се компаниите во Бразил, Белгија и во Украина. Само 15 отсто од Бразилците и Белгијците активно бараат ново вработување, додека овој процент кај Украинците изнесува 17 отсто.

Младите најподготвени за преселба

На светско ниво, повеќе од една четвртина од вработените се подготвени да се преселат во друга земја за да најдат подобро вработување. Прашањето за преселба било поставено во 17 земји од светот, меѓу кои ја нема Македонија. Според ова истражување, најподготвени да се селат се младите квалификувани работници до 29 години. Така, секое трето дипломирано лице би заминало да бара подобра работа во странство, исто како и секој четврти доктор на науки. За разлика од високообразованите кадри, секој петти со завршено средно школо е подготвен да се пресели во друга земја во потрага по работа.

Боге Божиновски од ГФК Скопје објаснува дека постои ризик од одлив на високообразовани кадри следната година, што ќе им предизвика суштински проблеми на компаниите и земјите што закрепнуваат од рецесијата.

- Една четвртина од работниците што работат физичка работа и од службениците што имаат канцелариска работа се подготвени да бараат работа во странство, а таа бројка расте кај високообразованите работници. Пресудна беше третината од луѓето во дејностите за истражување и развој, кои се подготвени да бараат работа во странство. Тоа се дејности што самите земји ги идентификуваа како клучни во закрепнувањето - вели Божиновски.

И Американците бегаат во странство

Најпогодени од преселбите се Централна и Јужна Америка. Дури шест од 10 вработени во Мексико, половина од работната сила во Колумбија и две петтини од вработените во Бразил и во Перу се подготвени да ја минат границата барајќи подобра кариера. Според ГФК, трендот не се однесува само на пазарите во развој. Па така, меѓу првите места на листата со земји каде што работниците сакаат преселба се Турција на 3. место, Унгарија на 7., Русија на 8., како и Португалија и Велика Британија на 9. место. Ситуацијата се менува и во САД и Канада, кои традиционално се стереотипни земји чии жители се релативна незаинтересирани за преселба во странство. Една петтина од работниците во овие земји се изјасниле дека се подготвени да заминат преку границата за да најдат подобра работа.

Според Божиновски, резултатите од истражувањето истакнуваат колку пазарот на трудот во многу земји станал глобализиран и променлив.

- За многу вработени преселбата во друга земја веќе не им влева страв, за разлика од промената на самата компанија. Компаниите бараат да го привлечат, ангажираат и задржат најдобриот персонал во одмерувањето на силите не само со конк*рентите во нивната земја, туку и од целиот свет - вели Божиновски.

Според него, работа на друго место најчесто бараат вработени во мултинационални компании. Тоа, пак, значи дека компаниите што им овозможуваат на своите вработени да работат во странство, освен дополнителен приход, ќе добијат и поголема можност да ги задржат на работа.

Нашите работници најлојални на газдите

Последното истражување на ГФК е надополнување на претходните податоци што ги презентираше компанијата, според кои Македонците се наоѓаат на врвот на листата со работници кои им се најлојални на газдите. Според тоа истражување, дури 36 отсто од работниците во Македонија им се лојални на работодавците, меѓу кои најбројни се младите од 18 до 29 години. Меѓу „најприврзаните“ се и младите во Франција и во Турција. Најнелојални на газдите им се младите работници од Србија, Чешка и од Унгарија.