ФЕНИКСОТ СЕ ВРАЌА - ПАК

Гинеколозите-закупци, кои вчера протестираа пред Владата, од денеска ги отвораат ординациите, но ќе наплатуваат приватно за услугите. Тие не најдоа заеднички јазик со претставниците од Владата и најавуваат дека до зголемување на цената на бодот ќе наплатуваат по 200 денари.

- Никакви договори за работа не сме потпишале и затоа инспекциите немаат право да не' казнуваат. Бараме бодот за гинеколозите да биде 45 денари, со 2.000 пациентки, или нека не' вратат во специјалистичко-консултативната дејност - рече д-р Емилија Трајковска од Здружението на гинеколозите, по средбата во Владата.

Министерот за здравство Имер Селмани не ја исклучува можноста да биде подготвен пакет со основни гинеколошки услуги, а на гинеколозите им порача да се потрудат да заработат барем дел од парите.

- Некои гинеколози би сакале да даваат помалку услуги за повеќе пари. Пациентките имаат право на избор на друг гинеколог. Оние што ќе работат со Фондот не може приватно да наплатуваат за услугите. Или нека ги раскинат договорите или нека не наплатуваат - рече Селмани.

Тој најави дека ако гинеколозите не склучат договори со Фондот, ќе се преиспита и решението со кое ординациите им се дадени под концесија.