Бурмали џамија на плоштадот?!

Исламската верска заедница најавува радикализација на ставовите, ако не се изгради Бурмали џамијата на плоштадот и ако не им се врати одземениот имот. Заканувачки пораки стигнаа од ИВЗ.

„Ќе бидеме приморани нашите имоти, како што се Капан Ан, Сули Ан, Бурмали џамија, запалената чаршиска џамија во Прилеп за време на кристалната ноќ кога се палеше имотот на муслиманите, ќе ги браниме со сите можни средства. Бидете уверени, ако затреба и со жив штит“, вели Аваз Ислами, ИВЗ.

Бурмали џамијата, според ИВЗ, ќе покаже дека плоштадите се места за зближување и спојување, а не за делби и подвоеност. Ја обвинија Владата дека нема чувство за духовните и за другите потреби на муслиманите во Македонија.

Бедните и сиромашните ќе живеат на левата страна на Вардар, а за сите оние кои не припаѓаат на Исламот, Скопје ќе стане рај.

Аваз Ислами

„Оваа Влада, впрочем, за нас не беа подобри и другите, не доведе во состојба, да ги сплотиме редовите, да ги радикализираме нашите ставови и со сите демократски мерки да ги штитиме нашите верски права и имотот на Исламската верска заедница“, додаде Аваз Ислами, ИВЗ.

Се огласија и од турските невладини организации. Не го поддржуваат проектот Скопје 2014. Бараат на плоштадот, освен Бурмали Џамијата да се постават скулптури од султани од Отоманската империја.

Наместо Јустинијан Први, на скалите пред Камениот мост, треба да се постави скулптурата на градителот на мостот, Фатих Султан Мехмет.

„Во проектот можат да се видат скулптурите на Александар Македонски, Гоце Делчев, Даме Груев, Цар Самуил и други. Но, неможат да се видат скулптури на ниту еден султан од Отоманската империја“, изјави Сулејман Баки, сојуз на турски невладини организации.

Во понеделник Исламската верска заедница ќе ги каже натамошните мерки што ќе ги преземе, за да го спречи реализирањето на проектот Скопје 2014.