РАКОМЕТ - новости

 

СКАНДАЛ - ГРУПАТА "А" ОСТАНА СО ТРИ ЕКИПИ ОТКАКО ЕДЕН ОД ТИМОВИТЕ ОДЛУЧИ ДА НЕ ИЗЛЕЗЕ НА ПАРКЕТОТ ВО САЛАТА "МАКЕДОНИЈА"
Мегас Александрос се откажа

Не можејќи да се помират со фактот дека нема да им биде прифатено барањето Жито Прилеп да го повлече амблемот на клубот, раководството на Мегас Александрос одлучи екипата да не излезе на теренот. Ја вмешаа политиката во спортот и се откажаа од турнирот на кој синоќа требаше да играат против Астра од Ирска.

По два дена минати во Прилеп, екипата на Мегас Александрос одлучи да се откаже од играње на турнирот. Како причина го наведуваат амблемот на клубот Жито Прилеп. Иако беа предупредени од ЕХФ дека ќе ги очекуваат санкции, а тоа е добро познато дека во вакви ситуации тие се ригорозни, во ниту еден момент Гркинките не се поколебаа и одлучија да останат на ставот да го напуштат турнирот.

Неспортскиот потег со мешањето на политиката беше причина тие да се откажат од играњето и синоќа да ги остават љубителите на ракометот во Прилеп со еден натпревар помалку во салата "Македонија". Така ќе биде и денеска и утре бидејќи ќе се игра само по еден натпревар во денот.

После овој потег на Мегас Александрос сигурно ќе следува суспензија за тимот од натпреварите во Челенџ купот, но и парична казна. Ова секако не оди во прилог на спортот и е срамен чин кој го направија гостите од Грција со што само покажаа дека во моментов им е повеќе до политиката отколку до спортското надигрување.

Екипата на Мегас Александрос денеска би требало да го напушти Прилеп. Синоќа беше потпишано дека се откажуваат од играње, но останаа уште една ноќ во градот, па денеска најверојатно ќе си заминат. Нивните натпревари, пак, ќе бидат регистирани со службен резултат.


ПРЕТСТАВНИЦИТЕ НА МЕГАС АЛЕКСАНДРОС ПРОВОЦИРАА ОТКАКО ДОЈДОА ВО ПРИЛЕП, ПА СЕ ДО НИВНОТО ЗАМИНУВАЊЕ

Грците бараа да се повлече амблемот

Пред вчерашниот старт на женскиот турнир од Челенџ купот, чиј домаќин е екипата на Жито Прилеп се случи скандал. Кој друг би можел да го предизвика ова, ако не Грците, кои одново во спортот ја вмешаа политиката.

Претставникот на Мегас Александрос, на техничкиот состанок побара да се повлече амблемот на домаќинот, Жито Прилеп, оти содржи сонце со 16. краци. За да се дојде до вакво нешто немаше шанси бидејќи претставниците на Жито Прилеп не попуштија во ниту еден момент. Затоа делегатот Штефан Југ од Словенија мораше да направи консултации со одговорните во ЕХФ. Оттаму беа категорични дека амблемот е клупски и не е државен, па провокациите од грчкиот претставник не дадоа резултат. Жито Прилеп, само доби потврда дека има право и понатаму да го употребува своето лого и да го користи во натамошните натпревари.

"Никој нема да ни кажува како треба да изгледа нашиот амблем, кој е преземен од спонзорот. Сонцето не е сопственост на Грците. Познато е дека тие само смислуваат провокации, но не доаѓа предвид да попуштиме", категоричен е Оливер Деркоски, претседател на прилепскиот клуб.

Прилепчаните во ниеден момент не беа подготвени за никакво попуштање. Сметаат дека во прашање е достоинството и не дозволуваат некој да си поигрува кога сме на домашен терен. Грците само покажаа дека не знаат да се однесуваат спортски ниту на еден ваков настан и покажаа дека ја мешаат политиката онаму каде е најмалку потребно, во спортот.

"Не ни треба никаков Челенџ куп, ако сме понижени. Ако случајно ни наложеа да го повлечеме амблемот, ќе го откажевме турнирот без секунда размислување. Додека траеше расправијата, украинската Дњепрјанка и ирската Астра немо ги следеа расправиите. Без коментар се и судијките од Полска и Турција, како и супервизорот од Австрија. Само креваат раменици бидејќи воопшто и не знаат во што е проблемот. Сите се чудат на овие бесмислици кои се појавија во момент кога е најмалку потребно. Дојдоа за да играат ракомет, а ја вмешаа политиката. Затоа додека тие се занимаваат со политика, нам ни останува да се свртиме кон играта и таму да извојуваме голема победа", истакнува Деркоски.