Заев нов лидер на СДСМ

   19.09.2008 10:27  

Зоран Заев 

Досегашниот потпретседател на Социјалдемократскиот сојуз на Македонија и градоначалник на Општина Струмица, Зоран Заев, синоќа на 8. Конгрес на СДСМ едногласно и со јавно гласање на 615 делегати беше избран за в.д. лидер на опозициската партија.

Заев ќе биде лидер на СДСМ до мај 2009 година кога на челното место на партијата ќе се врати претседателот на државата Бранко Црвенковски. Едногласно беше поддржан предлогот на Централниот одбор по завршувањето на претседателскиот мандат Црвенковски да се врати на лидерската позиција на СДСМ.

„Заедно со идниот тим со кој ќе работам, имам намера да создадам атмосфера во која нема да глумиме единство. Нема ниту да го спомнуваме единството, нема ни да манифестираме единство за да се покажеме пред другите. Ќе ја водам партијата во духот на тоа што секој ден ќе го потврдуваме единството“, рече Заев во обраќањето пред делегатите.

На граѓаните тој им порача дека Македонија е заедничка земја.

„Сите ја сакаме толку колку што работиме за неа. На Република Македонија не и е потребна декларативна љубов, туку љубов која се потврдува со дела“, рече привремениот лидер на опозициската партија.

Зоран Заев функцијата ја наследува од Радмила Шеќеринска која во јуни поднесе неотповиклива оставка поради поразот на предвремените парламентарни избори.

На петчасовниот Конгрес во хотелот „Александар Палас“, делегатите дискутираа за причините за изборниот пораз на СДСМ.

Беше усвоена и измена во Статутот со која генералниот секретар наместо на конгрес ќе биде избиран од Централниот одбор на предлог на претседателот на партијата.

На конгресот и Горан Минчев, досегашниот генерален секретар, поднел оставка, а според партиски информации, еден од најсериозните кандидати за оваа функција е Андреј Петров.

http://www.a1.com.mk/vesti/default.aspx?VestID=97762

Внеси реплика	страница 12 3 8 >
Tweet