Бркаат дечковци он-лајн

   "Доволно е да имаш интересен профил и добри фотки. Машките сами се лепат, праќаат пораки, покани за пријателство, а по неколку СМС контакти, покани за кафе и за интимно дружење", вели 27-годишна скопјанка, која ги користи Интернет порталите

Дваесет и седумгодишна слободна скопјанка, црна со сини очи, висока 175 сантиметри на потпетици, згодна, бара дечко и нови пријатели. Вакви податоци стојат на Интернет профилите за дружење, кои се почесто ги користат младите за забава или потреба. Сега е ин дечко или девојка да се брка на Интернет, бидејќи директните контакти во дискоклубови и кафулиња речиси не се ни случуваат.

Покрај личните податоци, ударно место на профилите имаат фотографиите. Најголемиот дел од Интернет корисниците ставаат лични фотографии во нивното најдобро издание, но има и такви што ставаат фотографии на познати актери, пејачи и модели. Корисниците на Интернет велат дека е најдобар начин за да се запознаат најлесно и најбрзо луѓе за дружење од целиот свет.

"Доволно е да имаш интересен профил и добри фотки. Машките сами се лепат, праќаат пораки, покани за пријателство, а по неколку СМС контакти, покани за кафе и интимно дружење. За еден саат Интернет чет запознавам по 10 луѓе, а кога излегувам по дискотеки, никој никому не приоѓа. Сите си тераат некој свој филм", вели 27-годишна девојка, чие Интернет корисничко име е Лавица.

За разлика од девојките, партнер за дружење преку Интернет многу полесно се наоѓа ако си момче. 26-годишниот момче од Скопје, чие Интернет корисничко име е Џоле, вели дека на својот профил има 566 Интернет пријатели, од кои дури 500 се девојчиња.

Тој ни се пофали дека половина од овие девојчиња први му пратиле порака за дружење, па дури и покана за директна средба.

"Пораки од девојчиња добивам секој ден. Буквално ме бомбардираат. Пишуваат нешто во овој контекст: 'Леле, колку си убав, ухххх. Дури веќе и почнуваш да ми се допаѓаш. Слободен ли си за дружење? Бакнежи... П.С. Те посакувам!!!' или 'Постојано те гледам низ град и ептен сум среќна што те најдов на Интернет. Сега можам да ти кажам дека си пресладок и дека ептен ми се допаѓаш'", ни откри тој дел од пораките кои секојдневно ги добива на неговиот Интернет профил.

"Лесно е да фатиш девојка преку Интернет, девојчињата сами се нудат. Немам проблем да фатам девојка и кога непосредно ја запознавам, ама преку Интернет е полесно, па и побрзо", вели тој.

Интернет љубов практикуваат и постарите. Овој начин на запознавање и комуникација во Македонија е се поупотребуван од повозрасни девојки и машки, па дури и од такви што се во сериозна врска и брак. И тие имаат профили на повеќе Интернет страници, но, за разлика од младите, не ставаат свои фотографии.

"Кога ќе ја поминеш 30-тата, многу е тешко да запознаеш слободни момци во кафуле. На таа возраст луѓето најчесто работат, не излегуваат или, пак, тие што успеале да украдат малку слободно време, најчесто го минуваат така што ќе испијат со пријателите по некоја пијачка. Никој не перципира што се случува од страна. Затоа има се повеќе немажени девојки во градот. Па како последна шанса ни се гледа да најдеме сродна душа преку Интернет", вели 35-годишната скопјанка Жанета.

Искуствата на Интернет корисниците што бараат љубов, секс или забава се различни. Има примери кои навистина го нашле својот животен сопатник на ваквите онлајн страници. Има и такви кои среќата успеале да ја најдат надвор од границите на оваа земја, успеале да создадат семејство и сега, со насмевка на лицето, се сеќаваат на деновите поминати пред компјутер. Но не сите ја имаат таа среќа. Најголемиот дел од Интернет барачите на љубов доживуваат големи разочарувања.

"Секоја договорена средба не е онаква каква што сте ја замислувале, па дури и ако човекот претходно сте го виделе на слика. Кога се случува директниот контакт, тогаш на виделина излегуваат сите тајни. Почнувајќи од: 'Извини што не ти кажав, но женет сум', 'Имам девојка за сериозно', 'Со тебе сакам само секс' и слични непристојни понуди. Треба да испиеш сто кафиња на слепо за да најдеш сродна душа. Јас досега не ја најдов мојата", ни раскажа нашата 35-годишна соговорничка Жанета.

Најголеми разочарувања се оние кога средбата е тотално слепа, односно кога ниту еден од Интернет соговорниците не го има другиот видено на слика. Тогаш се случуваат работи од криење зад кола додека се чека едниот, до лажење дека си во сериозна врска и оти си излегол од љубопитност.

"Контактирав со едно девојче цел месец, се додека не го убедив да излеземе на кафе. Бидејќи на нејзиниот профил немаше ставено фотографија, пред да се сретнеме решив да ја шпионирам од кола, за да видам како изгледа. Средбата требаше да се случи пред 'Фреш', а јас се паркирав на уличката кај 'Чичко Стоилко'. Не ми направи ич мерак, па за да не си го губам времето залудно, си ја завртив колата и си отидов. Таа не ни забележа дека ја надгледувам. Повеќе не и пратив ниту една порака и таа не ми пиша. Сигурен сум дека сфати оти не ја бендисав", раскажува 23-годишниот Бојан.

Психолозите експанзијата на барање партнер преку Интернет го објаснуваат со фактот дека денеска луѓето се отуѓени еден од друг. Се помалку си веруваат меѓу себе, суетни се и се плашат дека ако на некоја девојка или дечко им пристапатат директно, ќе бидат одбиени, што за нив е навредливо и не сакаат да си го дозволат.

Психологот Милка Ололовска објаснува дека кога луѓето немаат личен контакт меѓу себе, полесно се отвораат еден кон друг и полесно комуницираат.

"Момчињата во денешно време се плашат од девојките и ги сметаат за супериорни. За нивното машко его е навредливо ако девојката на која ќе и пријдат ги одбие, па затоа за да се заштитат од таков срам, се затвораат во себе. Кај мене доаѓаат млади момчиња и ми велат: 'Нема шанси јас да пријдам прв, девојките провоцираат, а кога ќе им пристапиш глумат лудило и ти удираат корпа'. А девојчињата, пак, ми се жалат дека нема вистински машки, сите се швалеришта и бараат девојки само преку Интернет. Таму им е полесно да кажат се што ќе им падне на памет, бидејќи непосредно не се гледаат в очи, можат да создадат идеална слика за себе", објаснува психологот Ололовска.

Таа вели дека денешниот начин на излегување тешко дозволува да се оствари непосредна комуникација меѓу луѓето

"Па денеска младиве излегуваат во дискотеки и кафулиња кои се преполни со луѓе и во кои ечи гласна музика. Од мешаницата не можат да си пријдат еден на друг, а од гласната музика ниту можат да се чујат додека разговараат. Порано се беше поинаку. Се излегуваше на корзо каде што контактите меѓу младите беа непосредни. Тие што имаа симпатија, ќе и саснеа трипати, и тоа беше знак дека некому му се допаѓаш", вели Ололовска.

Според психолозите, Интернет контактите не ја отсликуваат вистинската слика за личноста и карактерот на луѓето. Интернетот е вистински начин да се создаде идеална слика за себе, а кога двајца Интернет пријатели ќе се сретнат, најчесто доаѓа до разочарување. Затоа луѓето Интернет комуникацијата да ја практикуваат само за забава, а во потрагата по партнер да практикуваат директна комуникација", објаснува Ололовска.

***

Хомосексуалците се наоѓаат на Интернет

Хомосексуалците најчесто своите партнери ги наоѓаат преку Интернет, бидејќи во Македонија хомосексуалноста се уште е табу-тема. Затоа оваа категорија луѓе се плаши да ја открие својата сексуална ориентација, па комуницира преку Интернет. На овој начин полесно запознаваат партнери за дружење, а притоа не се појавуваат јавно на места каде што излегуваат хомосексуалци.

***

Со провокативни фотки полесно се фаќа дечко

Во последно време во мода е на Интернет профилите корисниците да ставаат провокативни фотографии. На тој начин многу лесно привлекуваат внимание и добиваат поголем број понуди за дружење. Низ профилите може да се видат девојки во бикини и долна облека, а момчињата најчесто се фалат со стомачните мускули и со добриот задник.

***

Интернетот виза за мажење во странство

Голем е бројот на Македонки кои преку Интернет контактите единствено што бараат е шанса да се омажат во странство. Нивна цел е, преку Интернет, да контактираат единствено со гастарбајтери што живеат и работат во некои од европските градови, во Америка или во Австралија. Ваквиот начин на барање сопруга преку Интернет се помасовно го користат и македонските момчиња кои се иселени во светот, а сакаат да запознаат девојка од, како што тие го викаат, стариот крај.

"Не сакам да живеам во Македонија и цел ми е да се омажам во странство. Преку нет контактирав со наш иселеник во Шведска, кој минатото лето дојде во родниот град Ресен. Среќата ми се насмевна и со прстен на рака ќе заминав за Шведска", со доза на возбуда ни раскажа една млада девојка.

Ана Антевска

Биљана Божиновска 

http://vest.com.mk/default.asp?id=146555&idg=8&idb=2282&rubrika=Revija

Изменето од LouWeed - 28.Јануари.2008 во 13:35

Внеси реплика	страница 12 3 >
Tweet