Бугарија и Грција против Maкедонија

Македонските хотелиери и туристички агенции се откажаа од штандот на 25-тиот Меѓународен саем за туризам, кој денеска завршува во Софија, бидејќи им било речено дека треба да се презентираат со името ФИРОМ, а не со Република Македонија. Според Тоше Чочороски, менаџер во хотелот "Дрим" во Струга, се било во ред во средата, кога пристигнале за да го наместат штандот.
"На таблите пишуваше Република Македонија, Министерство за економија, но проблемот настана откако пристигнаа грчките претставници кои бурно реагираа и се заканија дека веднаш ќе си заминат", вели тој. Веднаш потоа организаторите ги покриле таблите со бели налепници, на кои требало да се напише ФИРОМ, но македонските претставници, на своја одговорност, ги одлепиле налепниците, по што организаторот бил принуден да ги отстрани рекламните табли од целиот штанд. Претставниците на ХОТАМ и на Министерството за економија не реагирале туку мирно се повлекле од штандот. Претседателот на ХОТАМ Дончо Таневски вели дека тие само ја испочитувале одлуката на македонскиот амбасадор во Бугарија, кој им рекол дека ако не се прифати презентација под името Македонија, веднаш да го напуштат штандот.
"Ние нашата работа, сепак, си ја завршивме. Плативме неколку девојки да го разнесат рекламниот материјал низ штандовите и, според мене, целта е постигната", изјави Танески.
За хотелиерите, пак, ова е голем пропуст за кој некој ќе треба да одговара, особено поради тоа што тие дури вчера дознале дека Министерството за економија, со кое требаше да имаат заеднички штанд, уште пред десетина дена било информирано дека на претстојниот саем Македонија ќе мора да го користи името ФИРОМ. Тоа го истакна и Бисерка Огњанова, претставник на организаторот на Саемот, која тврдеше дека лично разговарала со господинот Зоран Николовски од Министерството за економија и му пренела дека на македонскиот штанд единствено може да биде поставено логото на Македонија, но буквите мора да бидат покриени, токму поради протестната нота од Република Грција.
"Ние многу жалиме што се случи ова, поради тоа што досега не сме имале никакви проблеми со Македонија. Дури за вашиот штанд го обезбедивме најубавиот простор на првиот кат со површина од 40 квадратни метри, за кој уште лани во ноември договорот го потпиша министерката Вера Рафајловска. Од наша страна се беше подготвено за презентација, дури не направивме проблем ни поради тоа што до денеска штандот не е платен, бидејќи знаевме дека ќе се плати. Ние, како организатори, само ја извршувавме одлуката на Министерството за надворешни работи", вели Огњанова.
Инаку, на годинашниот Меѓународен саем за туризам во Софија се претставуваат околу 350 излагачи, а еден од четирите катови во Националниот дворец на културата и е целосно отстапен на Грција.
З.Атаносовска