Не за Democratic Republic of Macedonia

ЕКСКЛУЗИВНО: ИДНИОТ, И НАЈВЕРОЈАТНО ПОСЛЕДЕН, ПРЕДЛОГ НА НИМИЦ

Предлогот е - Демократска Република Македонија?!

Во игра биле уште три имиња: Суверена Република Македонија, Независна Република Македонија и Republic of Makedonija. Одлуката паднала за ДР Македонија, бидејќи американските дипломати процениле дека единствено тој предлог може да биде прифатлив за Македонија

Демократска Република Македонија ќе биде предлогот, веројатно и последен пред очекуваната покана за НАТО и датумот за преговори околу членството во ЕУ, за решавање на 15-годишниот спор меѓу Скопје и Атина околу името на нашата држава.

Во вторник во Атина посредникот Метју Нимиц ќе го презентира последниот предлог пред важните датуми на македонската надворешна, но и севкупна политика со последици за наредниве неколку децении. Предлогот, велат нашите дипломатски извори, е спонзориран од Соединетите Американски Држави.

Според информациите, тој предлог бил формулиран во Стејт Департментот уште минатата недела. Освен Демократска Република Македонија, во игра биле уште три имиња: Суверена Република Македонија, Независна Република Македонија и Republic of Makedonija. Одлуката паднала за ДР Македонија, бидејќи американските дипломати процениле дека единствено тој може да биде прифатлив за Македонија, при што сосема одоговара на сегашниот македонски Устав, а префиксот демократска е присутен кај десетици други држави, членки на ООН .

Според истите извори и Скопје и Атина ќе треба многу сериозно да го разгледаат предлогот, бидејќи во спротивно ризикуваат да ја изгубат меѓународната поддршка.

- Предлогот е фер. Ниту една од земјите нема да биде задоволна, но и ниту една нема да биде пресреќна. Тоа е компромис. Тоа име би се користело за членство во меѓународните организации во кое сега сте примени како Поранешната Југословенска Република Македонија, како и во НАТО и ЕУ, и во билатералните односи со земјите за кои не е прифатливо вашето уставно име, меѓу кои и Грција. Истовремено, очекуваме бројот на земји што ќе ве признаат под уставното име да се зголеми со уште една земја-членка на Советот за безбедност и две високоразвиени земји од Далечниот Исток - велат дипломатските изворите.

Дури откако бил прецизно формулиран предлогот, Државниот секретар на САД, Кондолиза Рајс, решила лично да им го соопшти на македонскиот шеф на дипломатијата Антонио Милошоски и грчкиот Дора Бакојани. Неофицијално таа и на двајцата им порачала дека: ова не смеете да го одбиете.

Според нашите извори, најверојатно решението ќе биде прифатено од двете земји, но сепак помали се шансите предложеното име да биде прифатено во Грција бидејќи останува уставниот назив Република Македонија со кој Грција не се согласува.

- Вие нема да мора ниту да го промените Уставот, бидејќи во него според уредувањето сте определени како демократска држава - велат дипломатите.

Тие тврдат дека доколку Македонија го прифати предлогот, со сигурност ќе си ја чекира картата за влез во НАТО. Ако се случи Атина да не го прифати, велат тие, тогаш целата меѓународна заедница ќе застане на македонска страна, и во иднина меѓународниот притисок би се свртел само кон Атина. Два дена по шефот на македонската дипломатија Антонио Милошоски, на разговори со американскиот државен секретар Кондолиза Рајс во Вашингтон дојде грчката министерка за надворешни работи Дора Бакојани.

Каков и да биде македонскиот став кон овој предлог, компромисното решение, сепак мора да биде поддржано и во Парламентот - од блокот партии на власт, но и од оние кои сега се во опозиција.

Груевски: Уставното име не го менуваме
Премиерот Никола Груевски завчеравечер на трибина во Штип порача дека Македонија нема да прифати промена на уставното име.
- Еден и пол месец пред самитот во Бук*решт на сите им е јасно дека единствен проблем за приемот на Македонија во НАТО е нашиот јужен сосед и проблемот што го наметна за името. Ние продолжуваме да разговараме со Грција, но со јасен став дека во Македонија нема атмосфера за промена на уставното име, рече Груевски.

Луксембург: Името е билатерално прашање
Иако официјално треба да ве нарекувам ПЈРМ, јас ќе ви се обраќам со името Македонија, изјавил министерот за надворешни работи на Луксембург, Жан Аселборн, по вчерашната средба со шефот на македонската дипломатија Антонио Милошоски, јави МИА. За Луксембург, разликите за името со Грција се билатерален проблем.

- Бук*решкиот самит ќе биде значаен за Македонија. Проблемот со името е билатерален и треба да се реши во ОН со посредство на Метју Нимиц. Членството во НАТО е поважно од името на една земја, затоа ве молам, моја желба е во име на сите европски земји ова прашање да се реши билатерално со помош на Нимиц пред априлскиот Самит во Бук*решт. Ако недела и понеделник се важни за регионот, тогаш и Самитот во Бук*решт ќе биде многу важен - нагласи Аселборн.
Се согласувам со Аселборн дека ова е билатерално прашање, рече министерот Милошоски.