Новинари - рекетари

Благица ИВАНОВА-"SPIC"

Министерот за образование, Сулејман Рушити, вчера присуствуваше на поставувањето на камен-темелникот на оградата на касарната „Христијан Тодоровски Карпош“ во Куманово. Министерот за правда, Михалјо Маневски, пак, беше во Центарот за деца со церебрална парализа, за да им подели новогодишни пакетчиња. Ресорниот министер за здравство Имер Селмани вчера не беше никаде. Затоа, пак, завчера вицепремиерот Зоран Ставревски отвораше спортска сала во селото Облешево. Министерот за надворешни работи, Антонио Милошоски, одмора од преговорите за спорот со Грција и од силните обиколки на македонските села пред неколку месеци.
Новогодишната треска ги натера владините функционери да излезат од своите кабинети и да се сликаат. Сликањето со новогодишни пакетчиња за болните деца, на кои сите се сеќаваме главно за празници, на политичарите им носи поени. Познавачите на етиката и на политичкиот морал велат дека ова е чисто фејкерство или лажирање за да се придобијат гласачите.
Борче Давитковски, професор по Управно право, вели дека министрите имаат обврска да работат во рамките на своите ресори.
- Невообичаено и непријатно е тоа што министрите стасаа да се сликаат пред секоја ограда. Оваа еуфорија единствено би се разбрала ако е вистина дека Владата се спрема за предвремени избори напролет - вели Давитковски.
Во институциите каде што се сместени болни деца велат дека е лицемерно тоа што политичарите се сеќаваат на нив токму во периодот кога изминува годината. Во Центарот за церебрална парализа во Скопје велат дека на децата не им требаат пакетчиња и чоколади, туку апарати и услови за да живеат подобро.