Косово сака да се спои со Албанија?

Владејачката Демократска партија на Косово најави дека е можно да се организира референдум за припојување на Косово кон Албанија, јави Макфакс.

- Прво мора да стекнеме надгледувана независност, каква што се предлага во документот на Марти Ахтисари. Но, жителите на Косово и Албанците се еден народ, кој сака да живее во една држава. Имаме еден јазик, една традиција, а Косово било одвоено од Албанија - изјави Наит Хасани, функционер на Демократската партија на Косово.

Според него, ако народот сака референдум за припојување кон Албанија, Приштина е должна да го распише. Хасани прецизира дека Приштина е подготвена да чека прогласување независност само до мај в година, но се надева дека тоа ќе може да го направи и порано.

Советот за безбедност на ОН на прексиноќешната седница не постигна никаков договор за Косово, ниту усвои одлука за идниот статус на провинцијата. Во своите обраќања пред Советот, косовскиот претседател Фатмир Сејдиу побара независност, а српскиот премиер Воислав Коштуница да продолжат преговорите за идниот статус на покраината.