НАТО или ИМЕТО?

Франција ја поддржува Македонија во нејзините аспирации за прием во НАТО и ЕУ, но до влезот во овие организации потребно е исполнување на критериумите кои ги бара Брисел.

За официјален Париз, Алијансата не треба да се двоуми дали да им даде зелено светло на земјите од Јадранската група - Македонија, Хрватска и Албанија. Влезот на трите земји ќе значи и стабилизирање на регионот.

Овие пораки во Париз му се пренесени на шефот на дипломатијата Милошоски, кој заедно со неговата претходничка Илинка Митева го опипуваат пулсот кај француските власти околу македонските шанси за прием во Алијансата и ЕУ, но и грчките закани за вето.

Иако за шефот на француската дипломатија Кушнер не е исклучена Атина да ја блокира Македонија во НАТО, сепак тој се надева дека Грција нема да се одлучи на таков чекор.

„Постојат формалности за влегување во НАТО, како и формалности за зачленување во ЕУ, но за сето тоа Франција е спремна да работи со Македонија која е пријателска земја“, изјави Бернард Кушнер, министер за надворешни работи на Франција.

„Го истакнавме нашето очекување Македонија да биде поканета, затоа што заслужува. Во однос на ЕУ имаме очекувања за време на француското претседателство, со постигнати резултати, со убедливи реформи да им овозможиме на нашите пријатели да донесат одлука за отпочнување на преговорите за членство“, рече Антонио Милошоски, министер за надворешни работи.

Дипломатска офанзива ја надополнува и денешното писмо на македонскиот Претседател до земјите членки на НАТО.

Црвенковски ја изразува подготвеноста на земјата во остварувањето на стандардите за членство во Северноатлантскиот сојуз. Претседателот се надева дека Алијансата нема да дозволи да се реализираат заканите на Грција за вето.

„Поканата за Македонија, но и за останатите држави од Јадранската група ќе биде од неизмерно значење во насока на натамошна и конечна стабилизација на регионот, за негов натамошен просперитет. Длабоко сум уверен дека на тој план ќе ја имаме вашата поддршка“, се наведува во писмото до земјите членки на Северноатлантскиот сојуз.