АНКЕТИ и РЕЈТИНЗИ на политичарите и партиите

ГОРДАНА ДУВЊАК

Граѓаните се задоволни и даваат поддршка на она што се обидува да го направи Владата преку своите политики, но, засега, тие не ги чувствуваат ефектите од нејзиното владеење, па дури во некои сегменти мислат дека се живее полошо отпорано. Ова е основната порака што може да се прочита од последното истражување на јавното мислење што го направи Институтот за демократија, смета аналитичарот од овој институт Дане Талески.

Околу реакциите на ВМРО-ДПМНЕ, кои тврдат дека овие податоци не се идентични со оние што ги добиле, исто така, од Институтот за демократија, Талески појаснува: „Не станува збор за различни резултати добиени во рамките на едно истражување, туку за две различни анкети, кои се сосема комплементарни и даваат целосна слика за вкупното расположение на граѓаните. Првото истражување, на кое се повикува ВМРО-ДПМНЕ е направено од 1 до 3 септември и го отсликува генералното расположение на граѓаните во однос на нивните очекувања од владините политики на макроплан. Второто испитување на јавното мислење е направено две недели подоцна, од 14 до 16 септември, а со него сакавме да ги согледаме перцепциите на граѓаните на микроплан. Односно, да видиме дали граѓаните чувствуваат некакви промени врз квалитетот на својот живот во последната година“.

Според резултатите од последната телефонска анкета на јавното мислење на Институтот за демократија, на прашањето дали економската состојба е подобра или влошена во споредба со онаа од пред една година, 36,5 проценти од испитаниците се изјасниле дека таа е влошена, за 35,3 отсто таа е непроменета, додека 26 проценти мислат дека е подобра. Бројките се уште повисоки во одговорите на прашањето за оцена на политичката состојба, каде што 43,1 од испитаниците сметаат дека има влошување на овој план, 26,7 проценти не гледаат никакви промени, а 18,1 отсто дека бележи подобрување.

Во однос на стандардот, 48 отсто од анкетираните сметаат дека нема никакви промени во споредба со лани, 34 проценти дека е полошо отпорано, а 16,8 проценти дека има подобрување. Што се однесува до условите за лекување, 42, 4 отсто одговориле дека сега се полоши од лани, 28,1 процент не гледаат никакви промени, а за 21,4 отсто има подобрување. Дека корупција има повеќе отпорано одговориле 34,6 од испитаниците, 24,3 - исто, а 18,3 отсто дека ја има помалку отпорано.

Според Дане Талески, овие резултати не се никакво изненадување и претставуваат реален приказ на состојбите во државата. „Овие резултатите ниту се одвоени од претходните ниту ги поништуваат резултатите што се однесуваат на високиот рејтинг на Владата“, вели Талески. Тој додава дека одговорите се очекувани и логични, бидејќи и покрај големата доверба на граѓаните во владините политики, се' уште нема битни и видливи промени во животот на граѓаните, па дури и се живее потешко. „Дури и најавите за зголемување на платите и пензиите се во проекција и треба допрва да се случат“, нагласува Талески.

Секоја власт води сметка за промоција на својот рејтинг, но, како што вели Талески, „наша цел е да бидеме објективни и непристрасни“. Тој признава дека претходното истражување било нарачано од ВМРО-ДПМНЕ и бидејќи нарачателот го има истражувањето кај себе, не му било тешко да го преобјави.

Статијата е прочитана 525 пати.