Сите „најголеми“ политичари во Бугарија-

139 бугарски пратеници соработувале со тајните служби

За 139 пратеници од неколку парламентарни состави во Бугарија е утврдено дека соработувале со поранешната Државна безбедност во Бугарија.

Како што покажува истрагата на Комисијата за отворање на досиејата меѓу соработниците на поранешните тајни служби биле и политичките лидери Ахмед Доган, Георги Прванов, Георги Марков, Жан Виденов и Красимир Каракачанов.

За вкупно 19 пратеници од сегашниот парламентарен состав е утврдено дека соработувале со поранешната Државна служба за безбедност.

Актуелниот бугарски претседател Георги Прванов бил соработник на тајните служби. Тој бил врбуван во 1989 година, а го користел псевдонимот „Гоце“.

Лидерот на ДПС Ахмед Доган бил агент на поранешната ДС и соработувал под псевдонимите Ангелов, Сергеј и Сава.

Првиот човек на ВМРО Красимир Каракачанов, познат по својата антимакедонска дејност, исто така, бил агент на поранешната ДС, за која работел под името „Иван“.

Комисијата за отворање на досиејата соопшти дека и поранешниот премиер Жан Виденов бил врбуван да соработува со тајните служби. Тој бил познат под псевдонимот „Дунав“, а од оперативната програма е симнат во 1990 година.