Танушевци вчера и денес?

"Џезаир Шакири не е дома. Беше утрината и замина во планина. Тој не е тука, вратете се назад од каде што дојдовте", изјави за Вечер машко лице кое стоеше пред домот на таканаречениот командант Хоџа во Танушевци

Со неприродна тишина, без детски џагор и селско довикнување од една кон друга куќа. Не се слуша ни звукот на сечење дрва или орање земја. Ова е впечатокот по влегувањето на екипата на Вечер во пограничното село Танушевци, на македонско-српската граница во делот кон Косово. Малото планинско село на врвот на Скопска Црна Гора целосно е напуштено. Нема жени, ни деца ни мажи. Куќите и покуќнината се оставени. На патот низ селото, сретнавме само еден човек, кој стоеше пред куќата на Џезаир Шаќири Хоџа. Тој најави дека Танушевци, на референдум, ќе се отцепува од Македонија. Неговиот чувар ни порача:

- Џезаир Шакири не е дома. Беше утрината и замина во планина. Тој не е тука, вратете се назад од каде што дојдовте.
Албанско национално знаме високо поставено на јарбол се вееше пред напуштените 30-тина куќи во Танушевци.

Шетајќи така низ Танушевци, ние и екипата на Сител успеавме дури и да налетаме на неколкумина мажи на возраст меѓу 25 и 35 години кои не сакаа да зборуваат со нас. Македонската погранична полиција, исто така не беше присутна таму. Последната полициска контрола која ја видовме беше поставена на 17 километри пред Танушевци. Сите полицајци на контролниот пункт на патот пред селото на себе носеа панцирни елеци, вооружени со автоматски пушки. Во разговор со нив, ни беше речено дека опасност по безбедноста нема.

Тие секоја вечер, во соработка со специјалната единица за брзо распоредување на МВР, тврдат дека патролираат во селото. Граничарите ни напоменаа дека и при нивните контроли во селото тоа веќе неколку дена било напуштено и празно.

Меѓутоа, иако Танушевци е комплетно напуштено од жителите и немате чувство дека влегувате во нормално село, другата крајност која ја забележавме е дека видовме најмалку 15-тина паркирани автомобили кои во најголем број беа со странски регистарски ознаки. Сето ова беше спротивно на тврдењата на контролните полицајци дека во селото се е во ред и ништо не се случува невообичаено за селскиот живот.

Но никој неможе ниту да потврди, ниту да демантира дека командант Хоџа на теренот располагал со вооружени милитантни групи. Според она што тој го соопшти, освен во Танушевци тие биле подготвени да дејствуваат и реагираат во реонот на Гошинце, Брест и Маалино Мало.
Инаку, Џезаир Шакири попознат како командант Хоџа беше пратеник во Собранието на Република Македонија. Тој беше учесник во воениот конфликт во 2001 година во редовите на ОНА.

Директорот на Агенцијата за разузнавање поднесе оставка!
Директорот на Агенцијата за разузнавање, Кире Наумов, го известил претседателот Бранко Црвенковски, дека во најкус можен рок бара да биде разрешен од функцијата.

Кабинетот на Наумов преку соопштение објасни дека тој нема да биде повеќе во можност да ја врши оваа функција поради лични причини. Како главни се наведуваат обврските околу неговото натамошно научно доусовршување, како и поради преземање на некои идни работни ангажмани кои се неспоиви со вршењето на функцијата директор на Агенцијата за разузнавање.

Еленовски: нема безбедносна закана
Во врска со тоа дали на границата на Македонија кај Танушевци се распоредени армиски сили, министерот за одбрана Еленовски рече дека за безбедноста на границата надлежна е Граничната полиција.

- Војската не е таму, таа е онаму каде што треба да биде во ова време. Ако има некаква потреба војската е тука да го штити територијалниот интегритет и суверенитет на државата и таа тоа ќе го прави. Меѓутоа, ќе повторам како и сите други институции до сега дека во моментов нема поголема безбедносна закана, посочи министерот за одбрана Лазар Еленовски.

МВР не коментира!
"Министерството за внатрешни работи не ги коментира изјавите на поединци во медиумите" е официјалниот став на МВР по вчерашното огласување на командат Хоџа, кој објави дека со вооружени сили го контролира реонот околу Танушевци. "Припадниците на Министерството за внатрешни работи ги вршат своите секојдневни задачи и активности" беше единственото што Началникот на Секторот за пристап до информации при МВР Броче Пешевски, го изјави како официјален став на МВР.

Командант Хоџа порача: Еленовски е градско дете и не може да ме победи
-Лазар Еленовски е градско дете. Тој не знае да војува и не може да ме победи. Можам и него како и армиските генерали од 2001 година да го научам како се држи пушка.

Вака, поранешниот пратеник од редовите на ДУИ, актуелен политички лидер на Танушевци и поранешен припадник на ОНА, Џезаир Шакири, алијас командант Хоџа, вчера за ВЕЧЕР, ја коментираше изјавата на министерот за одбрана Лазар Еленовски, кој минатата недела во интервју за Македонското радио рече дека Македонија ја контролира целата територија и дека безбедносната ситуација е стабилна, Шакири вели дека реонот на селата Танушевци, Брест и Малина Маала е под негова контрола.

-За моменталната ситуација неколку пати досега сме разговарале со припадниците на граничната полиција кои патролираат во овој реон. Сепак мислам дека ако полицијата се обиде да влезе во селото, тоа нема да биде со добра намера за преговори, туку ќе влезат специјалните единици на МВР за да ги малтретираат локалните жители. Ја имам потребната логистика. Веќе формиравме воен штаб и за 3-4 часа успеав да го обезбедам потребното количество муниција, а ми се приклучија и многу поранешни припадници на ОНА, изјави Хоџа.

Вели дека доколку дојде до референдум за отцепување на Танушевци и одлуката не биде испочитувана од власта, до независност може да дојде и на друг начин. Прифаќа посредништво за преговори единствено од американската амбасада и од НАТО. (Г.Ма)

Црвенковски: МВР да преземе мерки
Никакви активности кои имаат за цел загрозување на интегритетот и суверенитетот на земјава не смеат да се дозволат, изјави претседателот на Македонија Бранко Црвенковски, запрашан дали како Врховен командант ги сфаќа сериозно изјавите на Џезаир Шакири, поранешен пратеник и случувањата во порганичното село Танушевци. Претседателот Црвенковски рече дека "ги повикува надлежните институции, а пред се МВР, да ги преземат сите неопходни мерки со цел да се обезбеди почитување на уставот и спроведување на законите на територијата на цела држава без никаков исклучок".

ОПОЗИЦИЈАТА ОБВИНУВА
Полицијата не смее да влезе во Танушевци
Игнорантскиот однос на Владата кон ситуацијата во Танушевци во многу нешта потсетува на 2001 година. Очигледно е дека Министерството за внатрешни работи нема контрола врз целата територија на државата, бидејќи полицијата не смее да влезе во Танушевци, обвинија вчера пратениците од СДСМ и ЛДП.

-Се плашам дека ароганцијата и самобендисаноста на министерката за внатрешни работи е толку висока што може да се случи нешто многу лошо. Албанија го подигна степенот на безбедносни мерки на нејзината северна граница по бегството на некои луѓе од затворите. Ситуацијата е загрижувачка. Информациите кои доаѓаат од таму се многу контроверзни. Граѓаните од Танушевци, во тој реон, не ги гледаат припадниците на безбедносните сили. Политиката која ја води министерката за внатрешни работи е потценување на сопствената полиција и на граѓаните, изјави Јани Макрадули од СДСМ.
Партиите од владејачката коалиција ги отфрлаат ваквите обвинувања од опозицијата.

- МВР ја следи состојбата во Танушевци. Доколку таму се случува нешто посериозно парламентот ќе биде информиран на време и Собранието заедно со комисијата за одбрана и безбедност ќе одлучи дали ќе расправа по тоа прашање. Сметам дека работите се под контрола и нема потреба за вознемиреност, рече Силвана Бонева од ВМРО-ДПМНЕ.