МАКЕДОНИЈА во НАТО: кога, како, зошто...?

Повеќе од една милијарда евра ќе потрошат државните институции до 2010 година на усогласување на македонското со европското право и на завршување веќе почнати проекти, кои треба да ја зголемат ефикасноста во речиси сите општествени сегменти и да го подобрат животниот стандард во земјава. Во владиниот секретаријат за европски прашања информираа дека по 220 милиони евра годишно ќе се одвојуваат за имплементација на Националната програма за усвојување на правото на Европската Унија, што е до 2 отсто од вкупниот бруто-домашен производ во земјава. Оттаму велат дека освен од буџетот, дел од овие пари ќе се обезбеди и преку кредити. До 2010 година за завршување на почнатите проекти и на нови проекти што се дел од ЕУ-агендата ќе се трошат по околу 135 милиони евра годишно. - Трошоците за реформи што се потребни за подобрување на живеењето во Македонија се зголемуваат ако се земат предвид и измените што треба да се прават во секторот животна средина. Процените се дека за оваа намена ќе бидат потребни од 300 до 400 милиони евра. Меѓутоа, како и за другите потенцијални кандидати за членство, ЕУ има разбирање и овие реформи во принцип можат да се одложат на извесно време - велат во Секторот за европски интеграции.
На прашањето колку ќе ја чини Македонија членството во ЕУ, односно колку пари ќе треба нашата земја да одвојува од буџетот откако ќе стане членка во Унијата, во секторот велат дека најверојатно нашата земја како нова членка нема да има обврска од буџетот директно да одвојува пари за членство во Унијата.
- Оваа обврска ја исполнуваат само земјите што имаат буџет што е околу или над 70 отсто од просекот на буџетите на земјите-членки на Унијата. Бидејќи Македонија располага со буџет што е многу помал од овој просек најверојатно нашата земја нема да има обврска да исплаќа таканаречен нето-придонес во европскиот буџет - велат во СЕП. Оттаму додаваат дека во иднина, откако ќе стане членка на Унијата, Македонија од европските фондови ќе црпи многу повеќе пари отколку што ќе треба да уплаќа во европската каса. Сепак, и нашата земја ќе мора да одвојува пари од царинските давачки и процент од наплатата на ДДВ. Европскиот буџет се финансира од буџетите на земјите-членки и од парите што се собираат на име на данок на додадена вредност, 1,3 отсто од буџетот се финансира од давачките во земјоделството, а 10,4 отсто се финансира од царинските давачки. Во Македонија уште никој не спровел истражување за финансиските импликации од членството на нашата земја во Унијата. Во СЕП велат дека во моментов е прерано за една таква сериозна анализа.
Економскиот институт во Загреб неодамна по нарачка на Владата на Хрватска на 1.500 страници изработи детална студија насловена како „Пристапување кон ЕУ, очекувани економски показатели“. Истражувањето покажало дека откако ќе стане членка, Хрватска во буџетот на ЕУ ќе треба да уплаќа 1,6 милијарда евра годишно, дека просечната бруто-плата ќе изнесува за 800 евра и дека цените ќе пораснат за 1,4 отсто. Според истражувањето, членството во ЕУ на Хрватска ќе и донесе пад на банкарските камати, зголемена стапка инвестиции, подобрување на кредитниот рејтинг, намалување на невработеноста на границата од 10 отсто, меѓутоа и поскапување на недвижностите, енергијата, образованието и културата.