Бесплатно “ЗДРАВЈЕ ЗА СИТЕ“?

Сиромаштијата ги натера граѓаните да дојдат масовно на пеколните горештини и да направат бесплатни прегледи. На плоштадот „Македонија“ беше поставен пункт каде што граѓаните во редици чекаа да измерат притисок, тежина, како и шеќер и холестерол во крвта.

Секој можеше да направи преглед, без разлика дали е здравствено осигуран.

„Ако продолжи вака масовниот интерес, сигурно јас ќе предложам до Владата да се зголеми сумата на средства издвоени за оваа намена“, изјави Имер Селмани, министер за здравство.

На граѓаните им се виде интересна акцијата за болници под отворено небо.

„Оваа акција е одлична за нас пензионерите. Ова им е добар потег. Да има повеќе вакви акции“, велат граѓаните.

Поради големиот интерес во попладневните часови снема материјали за лабораториските испитувања. Сепак, граѓаните трпеливо чекаа. Бесплатниот преглед на крвта им беше поважен од последиците од долго престојување под жешкото сонце.

Оваа акција на Министерството за здравство ќе трае во наредните четири месеци. Од буџетот беа издвоени околу 100.000 евра. Денес медицински екипи, покрај во Скопје, имаше и во Тетово, Штип, Неготино, како и во селата Боговиње, Карбинци и Пепелишта.