Ferrari Клуб

Кими Раиконен е на повидок да си замине од Ферари на крајот од сезоната по само една година мината во тимот на Скудерија.

Германскиот „Ауто билд мотоспорт“ објави дека Ферари веќе се впуштил во потрага по наследник на Финецот, откако овој не ги оправда очекувањата како најскапоплатен возач во Формула 1 иако дојде на голема врата од тимот на Мекларен како долгорочна замена за пензионираниот седумкратен шампион Михаел Шумахер.

Раиконен во моментов се наоѓа на четвртото место во генералниот пласман, зад третопласираниот тимски колега Фелипе Маса, кој се очекуваше да вози во сенка на Скандинавецот, а не да биде пред него. Некои возачи и Ф1-работници веќе го отпишаа 27-годишниот возач од борбата за титулата.

Освен победата на првата трка во Австралија, Раиконен немаше други значителни успеси, а раководството на Ферари веќе било загрижено за неговата концентрација на натпреварот и почетничките грешки.

Повеќе медиуми засега шпекулираат дека на негово место ќе дојде Фернандо Алонсо од Мекларен или пак младиот возач на Вилијамс, Нико Розберг.

Од друга страна, Раиконен го селат во Тојота.