F1 Вести

Без помпезност, Ферари објави први фотографии од новиот болид, педесет и трети произведен за натпреварувања во Формула 1, а воедно дистрибуираше соопштенија за јавноста во врска со техничките новитети. Според нив, дел од новитетите кои доаѓаат со персоналните промени се тие што новиот технички директор Марио Алмондо сега под своја јурисдикција го има и одделението за моторот, а Рос Браун досега беше одговорен само за шасијата. Лука Балдизери е новиот прв оперативец кој ќе ја води екипата на трките, додека Кими Раиконен ќе го наследи тимот на механичари кои лани работеле на болидот на Михаел Шумахер.

- Михаел беше вчера на шопинг во Милано со мене, а сега го разгледува болидот во фабриката. Рос Браун е на риболов, инаку веројатно и тој ќе дојдеше,- вели во своето соопштение Тод, наведувајќи дека ова е почеток на нов циклус во Ферари. – Претстојното првенство ќе биде тешка битка, бидејќи имаме силни и амбициозни конк*ренти. Ние секогаш сме биле амбициозни, а сега ќе се обидеме да бидеме доволно силни, да реплицираме со факти, за кои сега ги имаме елементите. Подобрувањата се видливи на сите нивоа на симулации, а сега тоа ќе се обидеме да го докажеме и на патеката. Сепак, поради промената на гумите, очекуваме да бидеме две до три секунди побавни од лани,- вели Тод.

Шефот на одделот за шасијата, Алдо Коста, кој го заменува легендарниот Рори Брн, во своето соопштение дава повеќе детали, меѓу кои и тоа дека болидот е десет килограми потежок од лани, поголемо меѓуоскино растојание, но со зголемена безбедност.

- Ќе го задржиме агресивниот пристап од лани. Аеродинамиката беше комплетно ремоделирана, со акцент на предната суспензија, а поради новата архитектура на менувачот ја намаливме и задната оска. Поради новите правила за креш тестот работевме на цврстината на шасијата и постигнавме одлични резултати во поглед на безбедноста. Предната суспензија е сменета за да одговара на новите гуми, додека менувачот сега ќе ги менува степените на пренос многу побрзо и нема да има загуба во време.

Ферари тврди дека само крилата на болидот, напред и назад ќе бидат модификувани за трката во Мелбурн, иако од разни извори се тврди дека поради недореченост кај некои новитети, некои инженери на Ферари останале на работните места и за време на Божикните и новогодишните празници. Алдо Коста потврди дека промени ќе има, но тврди дека болидот е дефинитивен во својата структура.

Честа прв да го испроба новиот болид вчера ја имаше Фелипе Маса, а потоа и Кими Раиконен. Бразилецот во пресрет на пробното возење изјави дека пневматиците имаат многу послаб контакт со подлогата и ќе биде потребно секој возач да простудура нови можности за штелување на болидот.

Претставувањата на новите болиди продолжуваат следниве денови со Мекларен и БМВ Заубер.

Хуан Пабло Монтоја на прес конференција во САД беше запрашан за очекуавњата оваа година во Формула 1, но и за неговите евентуални планови околу враќањето во „циркусот„.

- Добив порака на мобилниот телефон, но нема да кажам од кого. Таа гласеше дека ако НАСКАР ми здосади, вратите на тој тим ќе ми бидат отворени. Пукнав од смеа кога ја прочитав! Но, немаше да ја смени мојата одлука ниту ако беше од Рено. Во Ф1 имав уште 3-4 години кариера, а во НАСКАР може да возам до 45 и повторно ќе бидам млад. Што се однесува до новата сезона, сметам дека со новите гуми на Бриџстоун, Ферари не само што ќе освои титула, туку ќе доминира на сите трки!

19.01.2007

Марк Вебер ја критикуваше Светската автомобилистичка федерација дека не ги почитува мислењата на возачите кога ги носи правилата за натпреварување. Коментирајќи ја одлуката (која се уште не е официјално потврдена) дека во текот на трката возачите ќе мораат да употребат две различни компоненти на гумите, Австралијанецот избезумено ја обележа идејата како глупава и чудна. Тој саркастично потенцираше дека правилото нема да придонесе во зачинувањето на спектаклот.

- Што ќе кажат возачите е апсолутно не важно,- изјави Вебер, потсетувајќи дека кога возачите изјавија дека Монца е небезбедна, добиле закана од Макс Мозли дека на тие што си дозволуваат со свои оценки да ја девалвираат работата на ФИА (која имала своја комисија за утврдување на безбедноста – з.а.) ќе им ги одземе лиценците за настап во Ф1.

- Вториот тип на гуми кој всушност ќе значи дека болидот ќе биде побавен, ќе го користиме во последните мигови од трката, кога всушност и нема многу престигнувања. Всушност, тоа правило нема да донесе некое поголемо возбудување,- изјави Дејвид Култхард, сметајќи дека лесно ќе се справат со наметнатото правило.

Ваквиот тип на правило е користен во американската КАРТ серија, при што возачите имаат една гума како примарна опција за поголемиот дел од трката, но и задолжителна употреба на втората опција гуми од производителот, кои се обележани со црвена лента од страната, за да публиката може да разликува кој возач кога ќе ги употреби оние гуми кои претходно ги оценил како побавни и помалку компатибилни со неговото штелување на болидот. Оправдувањето е дека на тој начин ќе се оправдаат трошоците на производителите на гуми, кои трошат огромни средства за да развијат одреден тип на гума, а можно е никогаш да не се употребат во трка. Пред еден месец Бриџстоун демантираше дека вакво правило е донесено и инсистираше дека според актуелната спортска регулатива возачите ќе имаат на располагање две опции од пневматиците со цел да изберат една. Дали користењето на вториот тип на гума барем еднаш во трката (односно квалификациите) ќе стане задолжително, треба да објави ФИА.