F1 Вести

Од деветти до единаесетти јануари во Мадона ди Кампиљо се одржа редовниот ски митинг на Скудерија Ферари, што беше прва можност да се чујат изјавите на возачите и другите официјални лица на тимот. Стандардно, изјавите дадени на прес конференцијата беа добро испеглани од секторот за односи со јавност, а Вечер ќе се обиде да проникне во она што не сакале да се чуе.

- Трансферот во Ферари нема да ме смени,- порача Кими Раиконен кога потпиша за италијанската екипа, нарекувајќи го Рон Денис „фрик“ кој сака се да има под своја контрола.

Вечер од својата архива подготви повеќе слики на кои Раиконен се забавуваше во зимски услови со сноуборд, хокеј на мраз, картинг на снег, возење санки и така натаму. Во Мадона ди Кампиљо, Раиконен не доби шанса за ништо слично, туку класично се спушташе по снежните падини во алпски стил.

На прес конференцијата, неговите први зборови беа „Бонџорно а тути“ што укажува на два битни елементи: Кими стана љубезен со новинарите и почнал да учи италијански. Михаел Шумахер „долгот“ кон седмата сила го одработуваше максимално професионално, а често беше и во прегратки со италијанските новинари, негувајќи блиски релации. Кими, досега беше познат како немтур по прашање на односите со медиумите, но Ферари секогаш има редовна програма по ова прашање. Секој четврток во нивниот моторхоум, пред одржување на една гран при трка, возачите имаат по три прес конференции: за италијанските новинари, за англиските (и сите останати) и за оние кои доаѓаат од татковината на возачот (барем така беше во случајот со германските и бразилските медиуми).

Трета работа која паѓа во очи е најавата за наводната еднаквост на возачите. Жан Тод најави дека нема да има автоматски број 1, туку дека во втората половина на сезоната оној што ќе биде послабо пласиран на табелата ќе треба да внимава да не се конфронтира со оној што има повеќе шанси. Сепак, во Мадона ди Кампиљо, Кими имаше на располагање Алфа Ромео Брера, а Фелипе Маса, Фиат Седичи. Разликата во цената на автомобилот е речиси двојна. Треба ли и по ова прашање да читаме меѓу редови, или доволна е информацијата дека Кими е платен како Дејвид Бекам, со еден милион долари неделно?