ВМРО-ДПМНЕ: Премиерот нема врска со споменуваното земјиште на Водно

Најостро реагираме и ги демантираме написите на медиумите финансирани од СОРОС, а под контрола на СДСМ, во врска со написот “Алсат-М: Камчев нов сопственик на плацевите на Груевски на Водно” и било каква поврзаност на Претседателот на ВМРО-ДПМНЕ Никола Груевски со посоченото земјиште.

Со такво соопштение се огласи владејачката ВМРО-ДПМНЕ, порачувајќи дека премиерот немал никаква врска со тоа земјиште.

„Тој ниту порано, ниту сега има било каква врска со тоа земјиште и бараме неговото име да не се вмешува во вакви наводни афери кои се неточни“, се вели во реакцијата.

„Ние знаеме и за нас е разбирливо во недостиг на програма, проекти и резултати, СДСМ да продолжи со ваквата ниска, гнасна и црна пропаганда, но ние исто така знаеме и дека граѓаните ја препознаваат разликата помеѓу секојдневната работа и присутност помеѓу нив и црната и лажна пропаганда што ја креираат медиумите на СДСМ и СОРОС врз неосновани и невистините информации“, „заклучува“ партијата на власт.

Никола Груевски очигледно се обидува да го заташка криминалот со овие парцели на Водно тежок 17 милиони евра. Како што јавија медиумите, компанијата Орка Холдинг ја купила фантомската фирмата „Сирах Инженеринг“ од даночниот рај Белизе, инаку сопственик на овие парцели. Така, сопственоста на парцелите на Водно од 11.000 м2 сега завршува во оваа фирма, исто така блиска до фамилијата на власт.

Освен промената на газдата, сменето е и раководството на фирмата која ги поседува парцелите. Избришан е досегашниот управител Ристо Новачевски, кум на Никола Груевски и брат на неговата лична секретарка.

Јавноста многу добро знае за алчноста на Груевски за илјадници метри кавдратни на Водно, вредни милиони евра, порача денеска Дамјан Манчевски, потпретседател на СДСМ на партиска прес-конференција.

 - Од аудио доказите коишто ги објави СДСМ евидентно е дека токму Никола Груевски, лично и прецизно договора со Миле Јанакиевски каде и колкава да биде парцелата на Водно.

Граѓаните ги слушна разговорите каде што Груевски и Јанакиевски договараат промени на ДУП-опт и ГУП-от, како Груевски бара начини да се прошири парцелата, се интересира за „највисоката точка“, да нема никој „над него“, бара пат, ѕид, тргува со плацевите...

Се е јасно.

Врз основа на аудио доказите поднесена е и кривична пријава до Јавното обвинителство за организиран крминал и корупција против Никола Груевски, Коце Трајановски и други лица кои се директно инволвирани во криминални и коруптивни дејствиа во врска со парцелите на Водно.

Со овој случај ќе се занимава и Специјалниот јавен обвинител.

Постапката на Груевски со промената на сопственоста, многу наликува на постапките на неговиот политички ментор, Георгиевски, со продажбата на куќата на Водно, кога тој беше откриен од јавноста.

Промената на сопственикот на земјиштето, не може да го спаси Никола Груевски и неговите соработници за целокупниот криминал со овие парцели.

На Никола Груевски ако досега не му стана јасно веќе мора да му биде кристално јасно: бегање од одговорноста нема! - рече Манчевски.